Ka Lahui Hawaii, Volume I, Number 16, 15 April 1875 — Page 1

KA LAHUI HAWAII.
"Ua mau ke Ea o ka Aina i ka Pono."
HOL Y BIBLE.
BUK E I.}  HONOLULU, POAHA, APERILA 15, 1875.  {HELU 16.

KA NUPEPA KA LAHUI HAWAII.

          He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
          HOOKAHI DALA ka uku no ka pepa no ka makahiki hookahi. Hapa makahiki, Hapalua.
          E hoouna mai i na le ta no KA LAHUI HAWAII ia H. H. Paleka, Honolulu, Oahu.

[NO KA LAHUI HAWAII.]
Wha t shall I do for Jesus.
Golden Censer, p. 23.

1. Heaha ka'u no kuu Ie su,
Ka mea eha, a luuluu,
A moe anu ma ka po,
Hoinoia a make no'u ;
C ho—Heaha la ka'u, aha la ka'u,
Heaha la ka'u no Ie su?
Heaha la ka'u, aha la ka'u no Ie su?
2. Heaha ka'u no kuu Ie su
Ua kahe kona koko no'u,
A make ma ke kea e
I mohai hala e ola'i.
Cho.—Heaha la ka'u, aha la ka'u, &c.
3. Heaha ka'u no kuu Ie su
Ka mea aloha wale ia'u,
Ka mea auwana naaupo
A imi ia a hoi no.
Cho.—Heaha la ka'u, aha la ka'u? &c.
4. Heaha ka'u no kuu Ie su,
I imi i ka waiwai no'u,
I hale nani ma ke ao,
I wahi maha malu mau?
Cho.—Heaha ka'u, aha la ka'u, &c.
5. E lilo au no kuu Ie su,
Kuu kino, kuu uhane pu
A iaia au e malama'i
A pau kuu ola e ola nei.
Cho.—Oia no ka'u, oia no ka'u,
Oia no ka'u no Ie su,
Oia no ka'u, oia no ka'u no kuu Ie su.
HAWAII.

HE MOOLELO KAAO
NO KE
KEIKI ALII IULESIA
NO KA LAHUI KAULANA O NA AU I HALA
MA HELENE—ME KANA MAU KAAPUNI ANA I NA AINA MA KA HIKINA.
MOKUNA VII—HELU 18.

          MAHOPE iho o ka paina ahiahi ana a liuliu iki, ua hoomaikai ae la o Iulesia i na lani, a haule aku la maluna o kahi moe i hoomakaukau ia nona no ka hooluolu ana i na maluhiluhi o kona kino, a aole no i liuliu, ua kau iho la ke koloka o ka hiamoe paulehia maluna ona. Ia po ana iho, ua pa mai la ke ahe makani maikai mahope pono o lakou nei, a he mea e ka holo o ka moku maluna o ka ilikai. I ke kakahiaka molehulehu o kekahi la ae kaalo ana lakou nei mawaho o na palena akau o Itaka, me ka waiho no nae o Iulesia iloko o ka pauhia hiamoe, aole oia i ala iki mai kona hoomaka ana e moe a hiki mai ia manawa.
          I ka ike ana o na luina o ka moku, ua hiki lakou i ka aina o Itaka, ua hoomakaukau lakou e hoolele ia Iulesia iuka, me ka hoala ole i kona hiamoe. Me ke akahele loa lakou i hapai ae ai iaia nei a kau iluna o ka waapa, a hoe malie loa aku la a pae i ka aina. Lawe ia'ku la keia a malalo o kekahi kumu laau oliva, maloko o kekahi ana, hoomoe ia iho la, a haalele ia iho la keia me na waiwai a pau a ka Moi Alisinosa i makana mai ai. O keia wahi, aia no ia ma ka aoao akau loa o Itaka, a he kakaikahi loa ka maalo ana ae o na moku malaila, a he waoakua wale no. I ka huli hoi ana aku o keia poe luina lokoino no ko lakou home, ua piha lakou me na manao hauoli no ka hikiwawe loa o ka lakou huakai, aka, i ka ike ana aku i ka aina, a hoomaka e komo aku i ka nuku o ke awa, o ka lilo ae la no ia o ka moku me na kanaka a pau o luna i pohaku, a ua olelo ia, ke ku 'la no ia pohaku a hiki i keia la. A mamuli no hoi o ia mea, ke mau nei no ke kanawai maluna o ia lahui, aole loa e haawi aku i kekahi o ko lakou mau moku i na malihini.
          I ke ala ana ae o Iule sia, ua kau pono ka la iluna. Me ka hikilele o ka puuwai oia i hoomaopopo iho ai i kona kulana, a alawa ae la ma o a maanei, aole nae ike kanaka aku. No keia mea, kukuli iho la keia a hapai ae la i kona mau lima iluna a noi ae la i ka lokomaikai o na lani e aloha mai iaia, "E ka puuhonua o ko ke ao holookoa, ano e alakai aku i kau kauwa nei i haalele ia ma keia aina a'u i ike ole ai, a e haawi mai i ke aloha o kou puuwai, i paku a i alai hoi no keia waoakua neoneo kanaka ole." Ia wa ku ae la ia, a i ka hele ana aku e makaikai i ke ano o keia aina, aia hoi e waiho mai ana na makana a ka Moi Alisinosa, a pane iho la, "He oiaio, he poe makamaka, a aole he powa a aihue paha kela mau luina." Oiai keia e ku hookahi ana e nalu ana i ka mea hiki iaia ke hana nona iho, aia hoi ike aku la keia i kekahi kanaka kahu hipa opiopio ano ui me kona aahu ano alii, e hele pololei mai ana imua o ia nei. I kona kokoke ana mai, aloha mai la iaia nei, a ua hoihoi aku la no hoi keia i ke aloha. "E ke kanaka opiopio ano alii," wahi a Iulesia, "he oluolu anei ia oe e hai mai i keia olulo, o ka aina hea la keia, a he wahi mokupuni uuku wale no anei?" "Kupanaha," wahi a ke kahuhipa opio, "ke kuhi nei au ua ike ia e na mea a pau ko makou aina. He lehulehu no na pohaku, a he olohelohe hoi ke nana aku, aka, ua maikai no. He nui ka weuweu no na holoholona, a ua lawa hoi ma na mea no ke ola o ke kanaka, me na punawai huihui, na muliwai nani, na ululaau waonahele, me na kuahiwi kiekie. Ua kapaia keia aina o Itaka."
          I ka pae ana o ka inoa i ko ia nei mau pepeiao, he mea e kona hauoli, aka, ua komo koke iho la ka manao maalea iloko ona, a huna iho la keia i na ano hauoli a pau, me ka huna pu no hoi i kona ano iho. He luina ilihune au," wahi a Iulesia, "maluna au o kekahi moku mai ka aina mai o Creto, a na ka ino i hoonele ia'u me ka moku ole, a pae mai nei ma keia aina." Ia manawa i lalau mai ai ke kahuhipa i ko ia nei mau lima me ka hehe o kana aka, a pane mai la, "He oiaio, aia wale no i ke akamai me ka noonoo nui e loaa ai kau mau hana maalea. Aole anei e hiki ia oe ke haalele ia mau hana au, oiai hoi ua maalahi oe? O na huaolelo oiaio ole no anei kau e haawi mua mai ana mahope iho o kou lanakila ana maluna o kou one oiwi? A e manao ana anei oe ua nalo oe a me kou kulana?" Huli hou ae la o Iulesia e nana, aia hoi ma kahi o ke kahuhipa opio, e ku ana kekahi kaikamahine nani, a hoomaopopo koke aku la no ia i na hiohiona aloha o Mineva, ke kupua hoi nana i kokua mai iaia mai na la kaua mai o Karioe, a hiki mai i na poino o ka moana.
          "Mai ae i kou mau noonoo ana e hoouluku ia e ka'u mau hana ano ole e Mineva," wahi a Iule sia, "no ka mea, ma ke ano i hoikeia mai ia'u he mea hiki ole ke ike aku o oe no ia, oiai ma na mana ano e, ua hookahuliia na helehelena, a ua ano e pu me na mea a pau. He oiaio, ua moeuhane mau au no kau mau hana kokua ia'u a me ko'u lahuikanaka, a o ka mua keia o ka loaa ana mai o ka pomaikai nui e ike pono aku ai ia oe." I ka pau ana o ka Iulesia mau kamailio, ua haawi mai la o Mineva i ka ike moakaka iaia me ka noonoo kupono, a ia manawa oia i ike iho ai me ka hooia ana i kona home, a no kona piha loa i ka hauoli, ua haule iho la ia maluna o ka ilihonua a honi iho la i ka lepo, "mahope iho o na makahiki he lehulehu o ka ehaeha a me ka poino," wahi ana, "e Itaka, eia au, he mamo no kou lahui Helene."

MOKUNA VIII.
KA LILO ANA MAI KA MOI A HE MAKILO—EUMEU SA A ME KE KAHU HOLOHOLONA TELEMACUSA.

          Aole no i hooloihi loa o Mineva i ka huna ana mai o ia nei aku i na ano o ka aina mai kona haalele ana iho, no ka mea, ua hoike aku la keia iaia i na mea a pau, me ka hai pu aku no hoi i ke ano o kana wahine me ka lei a laua. "O ke ala e hiki aku ai i kou ohana a me ka halealii, aole no i hamama loa, aka, e hoea ana no oe ilaila, mahope iho nae o kekahi mau kuee kupikipikio. O ko halealii, ua haule malalo o ka mana o ka poe alii lapuwale o Itaka a me na mokupuni aku mawaho, a mamuli o ko lakou manao paa ua make oe, ke imi ikaika nei i wahi e loaa ai kou moiwahine Penilope i wahine mare na kekahi o lakou. Ke noho hookahi nei no ka moiwahine, e hoomanao mau ana nou a me ke kanikau mau. O kau keiki hoi, mamuli o ka hana ino nuiia e keia poe, ua haawi aku la au i ka manao auwana iloko ona i pakele ai, a ua hele aku me ka manao e imi ia oe, a iloko nae o kekahi mau makahiki kona nalowale ana, me kuu malama pono no nae iaia, a i keia mau la iho nei, akahi no oia a huli hoi mai. Ke noho nei keia poe alii me ka hauoli nae o ka manao ua make oe, ke uhauha nei i na waiwai a kou lahui i hiipoi ai nau na ko lakou Moi aloha; a mai kekahi kihi a hiki i kekahi kihi o Helene holookoa, ke noho nei me ke kanikau mau nou; koe wale no kau keiki, ke noho nei no oia me ka manaolana he la e hiki mai ana, e hoea hou mai ai kona makua, a e hoopai ia'i hoi ka poe hewa, a e hoolilo ia'i na kanikau o Helene i mau mele hauoli."
          Ia wa, luana iho la laua malalo o kekahi kumu laau oliva' e noonoo ana nae o Iulesia i ka mea kupono e hana aku ai i lanakila oia maluna o kona mau enemi. Ua pii ae la ka wela o kona inaina, a ua aneane oia e hoopuka i na huaolelo kupono ole, aka, hoomanao ae la no ia, eia no o Mineva ma kona aoao, a he mea hiki wale no iaia ke haawi mai i na manao koa iloko ona, e like me kana hana mau i na wa pilikia a pau. Ua ike a ua maopopo mai la no ia Mineva na mea a pau a Iulesia e noonoo nei, a pane mai la, "Me oe au me ko'u mau ikaika a pau, ke hooko pono nae oe i kau mau hana. A i hoailona mawaena o kaua e hooko no au i kau mea i hai ae la, a i kumu hoi no kou hoolohe i ka'u, he mea pono ia'u ke hoano e aku i kou kulana, i ike ole ia'i oe e na kanaka." Kulou aku la o Iulesia imua ona, a kau mai la ke kupua Mineva i ke kino me na helehelena ano e maluna ona. Ua lilo iho la keia he kanaka elemakule loa, aka, ua hoomau ia mai la no nae ke ano kulana 'lii, me ka ikaika no o na ami, e hoike ana i ke ano o ke kanaka ikaika a koa no hoi i na la opio. O na lole nani lua ole a ka Moi Alisinosa i haawi mai ai iaia nei, ua hookahuli ia ae la a lilo he mau apana welu lepo, e like me ka poe auwana makilo ma na alanui ke ano, me ke kookoo ma kona lima. A haule iho la oia mai ke kulana moi a lilo he makilo, e like me ka Tiresia i hoakaka mua ai iloko o ke anaina o na aka uhane.  (Aole i pau.)

          He leta kai hiki mai i keia keena mai ia Peiolani mai e hoike ana no ke kula haole o Keawakapu; no ka loihi loa aole hiki ke hoolaha ia aku.

          HE NINAU HELU.—Ua haawi mai o J. E. Hart he ninau helu no ka poe heluhelu i KA LAHUI HAWAII. Eia ka ninau, e hoonui ia £50 + 19s + 11¾d me £50 + 19s + 11d; heaha ka loaa? E hai mai ka poe akamai i ka helu.

          Ua hookolokoloia iho nei ka Hon. J. A. Cummins, (Keoni Kamaki) o Waimanalo, imua o ka Lunakanawai Hoomalu no ka hoeha i kekahi kanaka, a ua hoopaiia. Aole makou i lohe mai i ke kumu o ka hoeha ia ana o ke kanaka.

          Ua pau i ke ahi ka hale wiliko o Halawa, ka waiwai o J. R. Williams, Esq. Ua pau loa na hale wili, a ua poino pu me na megini. Ua lohe mai makou ke hoomakaukau ia nei e kukulu hou i mau hale hou, ma ke ano he pani no na hale mua.

          MAKE I ALOHAIA.—Ua make o Ikalaela (k). ma Kikihale, Honolulu, ma ka la 22  e Maraki, he fiva kona mai i make ai, a o ka nui o kona mau makahiki o ke ola ana ma keia ao, he eiwa me hookahi malama me elua pule a hele aku la ma ka aoao mau o ka honua.

          Ma ka auina la Sabati iho nei, ua ike ia aku kekahi mau Hawaii o ka papa hanohano o keia kaona maluna o ke kaa, e uhauha wale ana i ka maluhia o ka la o ka Haku, a hoomanao ae la makou i na huaolelo "na ka hookamani no e hoike mai iaia iho."

          NO KOHALA—Ua loaa mai ka le ta a D. M., o Kohala. E mahalo ana oia i ke ano hou loa o Kohala Akau, wahi ana, "ua paa pono i na mala ko, a me na wili." No ke alanui nae kona hoohalahala. He ikaika loa kona hoahewa ana i ka Luna Alanui.

          Ua noi ia mai makou e hoolaha aku, e kamailio ana o Mr. Moore imua o ke anaina nui o na ekalesia elua o keia kulanakauhale, ma ka luakini o Kaumakapili, i ka po la Sabati, Aperila 18. Ma ke awakea o ia la Sabati, hora umi, e hoike ai ke Kula Sabati o Kaumakapili.

          Ua ike iho nei makou maloko o kekahi o na nupepa Amerika i ka olelo a kekahi o na Hawaii Ponoi e noho 'la ma ia aina mamao. E pane ana i ka manao kue kuikahi o ka Hon. David A. Wells, a e hoike ana i ke ano a me na loina o ko Hawaii nei kulana, me ke kokua ikaika ana i ke kuikahi.

          I keia mau pule iho nei, ua maumaua ka make i keia mau la, mai ka poe kino maikai a ikaika, ua make emoole lakou, a aole hoi no ka poe i loohia ia e ka mai ka olelo ana. Aka hoi, o na mea a pau i hoohua ia ma keia honua, he mau mea mae wale no lakou, e like me ka wanana, "E hoi no ka lepo i ka lepo."