Ka Lahui Hawaii, Volume I, Number 15, 8 April 1875 — Page 1
KA LAHUI HAWAII.
"Ua mau ke Ea o ka Aina i ka Pono."
HOL Y BIBLE
BUKE I.} HONOLULU, POAHA, APERILA 8, 1875. {HELU 15.
KA NUPEPA KA LAHUI HAWAII.
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKAHI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na le ta no KA LAHUI HAWAII ia H. H. Paleka, Honolulu, Oahu.
[NO KA LAHUI HAWAII.]
Jesus Knows.
1. A piha ko'u mau la a pau
Ina mea luhi a luuluu,
Na paio, me na hoo paapaa,
Hookahi mea e hoona,
Ua ike no Ie su.
2. A uhi mai Maluna o'u
Na pilikia a eha no,
A ikiiki, a uwe,
Hookahi mea e olu ai,
Ua ike no Ie su.
3. A komo au iloko ae
O na hoowalewale nei,
A ane haule a poho,
Hookahi mea hoolana ia'u,
Ua ike no Ie su.
4. A hopohopo wale au
Ke hai ae i kuu mau lalau,
Ke kau nei au la i kuu poo
Ma kona poli a uwe no,
Ua ike no Ie su.
5. A hoomau na hoa nei,
A lilo i mau enemi,
A owau hookahi wale no,
Alaila paa iloko o'u.
Ua ike no Ie su.
6. A hala e ke ala e
A kuu wawae e hehi nei,
A pouli e imua o'u,
Ka hua nei ke hoona ia'u,
Ua ike no Ie su.
HAWAII.
HE MOOLELO KAAO
NO KE
KEIKI ALII IULESIA
NO KA LAHUI KAULANA O NA AU I HALA MA HELENE—ME KANA MAU KAAPUNI ANA I NA AINA MA KA HIKINA.
MOKUNA VII—HELU 17.
OIAI ka lehulehu e hauoli nui ana no ka hui pu ana me keia 'Lii Helene opio, ua lohe ia'ku la ke kauoha i na makaainana e hoopau i na hauwawa; a oiai ke anaina nui e meha ana, ua lohe ia'ku la ka leo o ka Moi, e haawi aku ana i na olelo mahalo imua o Iulesia, penei: "E palua a pakolu ia ko makou pomaikai nui no ka ike ana, ka hui pu ana a me ke kamailio pu ana me ka mea a makou i lohe mua ai i na la i au aku la no ke kaulana ma ke kupaa o na manaolana, a wiwo ole hoi ma kana mau hana e hoala ai, a me he la, ke hoike mai nei ke au o ka manawa i ka oiaio o oia mau mea a makou i lohe mua ai. A oiai, aole a makou mau mea i oi ae ke ake nui ana mamua ae o kou luana pu ana me makou e Iulesia kaulana, aka, mamuli o kou hoike akea pinepine ana i kou aloha no kou home a me ke kau nui o ka manao e huli hoi aku ia aina mamao, ua hiki ole ia makou ke hookaulua iho i kou manao paa, me ka maopopo no ia makou, o kou haalele ana mai i ko makou aupuni nei, he poho nui ia no Paesiana holookoa. Ua maopopo lea no paha ia oe he aupuni kaulana ko makou no ka lehulehu o na moku, a ma na wahi a pau o ka honua nei e hiki ana i ka moku ke kaalo aku, ua hoea aku no ko Paesiana mau auwaa ma ia wahi. Ua oleloia, no ka lanakila loa o ko makou mau moku ma ka moana, ua makehewa ke ku ia o ka hoe, aka, na ka makani wale no e lawe maalahi aku a hiki i kahi i manaoia. Nolaila, e kuu malihini a makamaka alii o ka lahui wiwo ole, mai hopohopo kou manao no ke kau ana aku maluna o kekahi o ko makou mau moku, a i ka la apopo, ke oluolu i kou noonoo ana, e hehi ai kou mau kapuai i ka oneki a huli hoi aku, a i keia la hoi, e ae mai i ko makou hauoli pu ana me oe, no ka mea, aole e lawa ko makou hauoli ana imua o kekahi malihini o kou ano e ke 'lii opio, a na kupua i hookipa mai imua o makou."
Ua manao o Iulesia ua lawa kana kamailio ana imua o kona mau makamaka kamaaina ma kana haiolelo mua, aka, i kona lohe ana i keia mau huaolelo aloha a kona hoa'lii, ua pane mai la oia me na waimaka e hiolo ana ma o a maanei o kona mau papalina, "E kuu makamaka Moi Alisinosa a me kou mau makaainana puuwai aloha, eia au, ke ike mai nei no oukou, ke ku hookahi aku nei imua o oukou, a he mea maopopo no paha ia oukou ko'u kulana i keia la. He oiaio, owau o Iulesia ka Moi o kekahi o na lahui waiwai a ikaika no hoi maluna a ka ilihonua nei, aka, e na puuwai aloha, ke ku aku nei ua Moi Iulesia nei iluna o oukou, he wahi kanaka ilinue, e kaukai ana maluna o ko oukou mau lokomaikai. He olulo au, he pio na na ale huhu o ka moana, a o kuu pae ana ma ko oukou aupuni nei, me ko oukou hoike ana mai i ke aloha, ua aie nui au i keia aupuni me kona mau makaainana; no ia aie, ke au nei ko'u mau maka mao a maanei aole nae o'u ike aku i kekahi mea e hiki ai ia'u ke kau aku i ko'u lima a olelo iho, na'u keia, a e lawe aku oukou ma ke ano he makana; nolaila ua piha au i ke kaumaha, aole au e hookuu aku ana i ko'u mau manaolana e paluku ia, aka, ke haawi aku nei au i kahi waiwai hookahi e waiho nei me a'u, a ke manao nei au o ka oi no ia o na makana a na lani i haawi mai ia'u, oia keia, 'E ka mokupuni o Paesiana, ke kulu nei ko'u mau waimaka hauoli nou, e ka Moi, na'lii a me na makaainana, e lawe aku oukou i ke aloha pumehana oiaio pau ole o Iulesia, a e ola mau ka lahui Paesiana i na Lani!"
Iloko o ka ia nei wa e kamailio ana, e lohe ia ana ke pine ke haule, no ka meha, a i ka pau ana ae, oia mau no ka meha, aole mea hiki ke pane mai, ua puua ae la no ka walania loa o na huaolelo a ke alii Helene opio. Oiai ke anaina e hoolauwili ia'na e na huaolelo a Iulesia, ua ku mai la ke kaikamahine alii, a pane mai la me ka leo haalulu, "E ke alii, o ka lawe maalahi aku a ka halelana Paesiana i kana ukana makamae me ke ola kino oluolu a hehi hou i ke one hanau, ka'u e noi ae nei i na lani, a e ka Helene hiwahiwa, oiai oe e hauoli ana no kou lanakila hou ana, e hoomanao ae hoi oe i ka mea nana i hoopakele i kou ola, ka mea hoi nana i hookipa mai ia oe i kou loaa ana aku iloko o ka waoakua, ma na kapa o ka muliwai Kalikoe. Aloha oe."
"E ka pua nani hiwahiwa o Paesiana nei," wahi a Iulesia, "ke noi ae nei au i na lani e haawi mai ia'u ina hauoli ana i na manawa a pau a'u e hoomanao ae ai ia la kamahao, me ka poina ole, na kou lima nani i hoopakele i ke ola o keia kino, a me na pomaikai e kau mai ana maluna o'u ma ka'u huakai home, a ma keia hope aku. Na na Lani e hoopomaikai mai ia oe e ke kaikamahine alii nani Nausika me ona koolua kane alii, a mailoko mai o ka maluhia e loaa mai ai ona mau pua alii kane opio, i mau ka pomaikai no keia aupuni a me kona lahuikanaka." Me ia iho la ka Iulesia mau noi, me ka hoomanao ae i na hana maikai a ke kaikamahine a ka Moi Alisinosa.
Mahope iho o keia mau hoike aloha ana, ua noi mai la ka Moi, oiai lakou e noho puni ana ma ka papaaina e hai aku i kahi wahi o kana mau huakai, a ua hooko aku la no hoi keia me ka oluolu. Ua noho puni mai la ke anaina e hoolohe ana i ka moolelo o ke kanaka a lakou i lohe mau ai a i heluhelu mua ai hoi ma na buke, mai kona waha ponoi mai. Ua nee mai la ke kaikamahine alii a kokoke ma ko ia nei aoao, i lohe moakaka ai i na huaolelo, me ke kulu makawalu mau ana o kona mau waimaka i na wa a pau e kamailio ia ana no ko ia nei mau poino. Ua hoomau aku o Iulesia i ke kamailio ana, a i hoopau wale ia no i ka hoea ana mai o ka maamaama o kekahi la ae, a hoomanao ae la keia i na olelo a kona hoa'loha Moi no na mea e pili ana i ka moku, me kona huli hoi ana i Itaka.
I kekahi kakahiaka ae, ua ko e like me ka olelo a ka Moi, no ka mea, ua ike ia'ku la kekahi moku nani e lana mai ana i ka ilikai, me ka makaukau i na mea a pau. Mamua o ke kiekie ana ae o ka la maluna o na kuahiwi uliuli o ua aina nei, ua piha haiamu aku la na uwapo i na kanaka, me na pua, na lei a me na hae i hoonani ia. Mamua o ka makaukau ana o Iulesia e haalele aku i ka halealii, ua hoopiha ia'ku la ka opu o kona moku hou me na waiwai makamae o kela a me keia ano; ke gula, ka dala, ke daimana a me ka momi, a i ka piha pono ana o ka moku, ua haalele aku la ke keiki alii malihini i na keena hookipa o ka halealii o ka Moi Alisinosa, a ukali ia'ku la e na'lii me na makaainana no ka haawi ana'ku i na aloha hope loa. Mamua o kona hehi ana aku iluna o ka waapa alii e kali mai ana iaia, ua lulu lima mai la oia me ka Moi, ka moiwahine, ke kama'lii opio a me kekahi poe alii o ke aupuni, a iloko oia wa, akahi wale no a ike ia'ku ko Iulesia mau helehelena e hoike mai ana i na hiohiona ano kaumaha, a huli mai la kona mau maka e nana mai i ka waiho molaelae aku o ka aina, a puana ae la, "Ua olelo mau au mai kinohi mai he mea ano ole, a he hupo ke kanaka e hoolei wale ana i na waimaka hoopulu onohi, aka, a hiki mai i keia la, ke ike nei au ua hewa ia manao o'u; a ia oukou e na waimaka o keia mau maka i ike ole mamua ae i keia mea he uwe, ua hiki ole ia'u ke paa mai ia oukou, no ka mea, ua hanini na aakoko o ko'u puuwai, a ke ano pouli mai nei ka noonoo i ke aloha i ka lahui a keia kino kanaka e aie nui nei," a alo ia'ku la keia e ka waapa malalo o na leo huro, na pu aloha, me ko ia nei nalowale i na pua me na lei i hoolei ia'ku e na makaainana. Na ke 'lii o ka moku i hookipa aku iaia nei, a he manawa pokole, ua kau ae la na pea, a e nee malie aku ana ua moku nei mamua o ke ahe makani me ka hanohano nui, me he la ua ike no oia i ke kulana o kana ukana makamae, me ka hoomaopopo iho eia maloko o kona opu ke keiki alii hiwahiwa o Helene holookoa, ka mea hoi i kapaia o "Iulesia manaopaa." I ko lakou nei kaa ana mawaho pono o ke awa, ua pii mai la o Iulesia maluna o ka oneki no ka nana hope loa ana'ku i na hiohiona o Paesiana. I ko ia nei pii ana mai, aia hoi e uhi mai ana ka noe maluna iho o na kuahiwi, me he la e i mai ana, ke hele la oe, a ano, ke huna hou ia nei ka nani o Paesiana. Ia wa, ku aku la keia nana ia uka o ka aina, a i ka aneane ana e nalo aku ka la ma ka ilikai, ua nalo aku la ka aina, a hoolei aku la keia i kona hainaka i pulu i na waimaka, me ka i ana ae, "Ua hoopulu ia oe i na waimaka, a aia maluna o ia mau waimaka ko'u aloha, a oia aloha, e huli hou aku oe a loaa na aekai o ka mokupuni Paesiana." A huli ae la ia a hoi aku la ilalo, no ka hooluolu ana iaia iho.
(Aole i pau.)
NO KA PUA LILIA.
O ka inoa "Lilia ua manao ia" ua hoopili ia aku no ia i kekahi mau inoa a ka poe kahiko i kapa aku ai no ka poe o ka po; e like me ka Orepeusa kapa ana o "ka makuahine o na 'kua a me na kanaka." Ma ka olelo Suria, ua kapa ia ke ahiahi (a o ka po hoi) he "Lili," a he "Lile" (Lil, a Lilleh.) Ma ka moolelo kaao kahiko o ko Talamuda, ua hoopili ia aku no kekahi akua wahine o ka po, o Lilita ka inoa, nona ka mana iloko o kona lauoho gula—a pela hoi ma kekahi mau kaao e ae o ko Arabia, a me Asuria, e hoike ana i ka inoa o "Alilata" Halalata, a o "Luna" (mahina) hoi a me Diana. Nolaila, me he mea la no ka mahina "ka haku wahine o ka po," i puka mai ai ka inoa o Lilia, no loko mai o na olelo kahiko.
Mai ka manawa mai i hiki ai na poe Kerusade i ka aina o Palesetine, ua imi nui ia e loaa ka pua lilia nona ka nani e oi aku ana mamua o "Solomona i kona nani a pau." Aka o ka pua lilia i olelo ia ai pela e Kristo, aole loa i loaa kona mea like ma ka aina o Palesetine e hiki ai ke hooiaio ia pela, no ka mea, he mea pono ke hoomanao ia, o ka pua lilia keokeo wale no i ike ia e na Iudaio, oia ka lilia wai. Ua manao ia no e kahi poe, o ua lilia ia i olelo ia e Iesu, oia no ka "lilia o na awaawa," ma ke ano e hoike ana i ke eno haahaa o Kristo, aka, o ua lilia la nae, ma na aina anu e like la me Norewai, e ulu maikai ai lakou; a aole i ike ia ma na aina o ka poai wela. Aka hoi, malia, aole o na pua lilia a kakou e kapa nei i keia wa, ua pua lilia ia ia i hoopili ia ai e Kristo. Ua hoopili ia no paha no kekahi mau pua e ae, a no ka lilia gula paha. Me ia ano pohihihi like no hoi, no na pua lilia i olelo pinepine ia mai ai e Solomona—"Ai iho ia mawaena o na lilia."—"E like no ia me he kehau maluna o ka lilia."
Noloko mai o keia mau olelo mahalo a Kristo i ka lilia i lilo ai ia pua, he hoailona e hoike ana i ke ano o ke aupuni Farani, oia hoi ka lilia o Farani—aka nae, e hoike ana kekahi kaao penei: mahope iho o kekahi kaua ana o na Kanesade, aia hoi, ua uhi ia ka hale kaua Farani, me na lilia.
O ka lilia LO TUSA (Lotus) he pua laa ia i ko ka Hikina. Ma Aigupita, ua hoohalike ia me ka noho'lii o Osirisa, ke akua o ka la. Ua kapa aku ko Suria, he hoailona ia o ka moe hooluliluli o Mose i loaa ai ma kapa o ka muliwai o Nile i ke kaikamahine a Parao. Ma Sepania, ua olelo ia he mana ko ka lilia e hoihoi hou mai ai i ka poe i hoolilo ia i holoholona ma ko lakou ano mua.