Ka Lahui Hawaii, Volume I, Number 13, 25 March 1875 — Page 4

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

No Na Makika.

E na makika lapuwale no,
Aole oukou e ae e hiamee
Au, a me kuu keiki liilii,
Maluna o ko maua moe ke hoao
E malama i ko maua mau pepeiao
Mai ke kani ana o ko oukou leo:
Ano la, ina oukou e ae mai
Ia maua e hiamoe he wa pokole,
Alaila, me ka pilikia ole,
He hiki ia oukou ke inu
I ke koko, a, aole me ka u
Ia maua, a me ka make ia oukou.
No ka mea i ko maua wa e hiaa
Aole hiki ia oukou ke loaa
I ka ai me ka inu, a nui loa,
No ka mea, e hoolei wau iluna
I ka'u mau lima e hoao e hahau
Ia oukou a pau, a hiki mai ke ao.
Aka, he mainoino loa oukou;
Ke hoonui nei oukou i ka leo.
Auwe! ke pule haahaa aku nei
Ia oukou, e na makika, e hele
Ma kahi e, a haawi ia maua
I ka maluhia, a i ole ia,
He oiaio no, e haawi no au
Ia oukou la a pau i ke kaua.
E malie, e malie, ua hele paha!
Aole nae! Ke hele hou mai lakou
Me ka helu ole, like me ke one
O ke kahakai, a i ole, na hoku.
E nahu ana, e o ana, e hae ana;
He pilikia ko'u, me ke kaumaha
I kuu keiki e hiamoe ana
Ma keia manawa, e like au
Me he pupule la me ka huhu,
Ke ala koke nei, a holo aku.  A. M.

NA KULA SA BATI.
NA HAAWINA.
Aper. 18.—Kahea ia o Gideona.—Lunakanawai VI: 11—18.

          11 Hele mai la ka anela o Iehova, noho iho la malalo iho o kekahi laau oka, ma Opera no Ioasa, he kanaka no ko Abiezera. E hahi ana kana keiki, o Gideona i ka huapalaoa, ma kahi kaomi waina, i nalo i ko Midiana.
          12 Ikea aku la ka anela o ka Haku e ia, i mai la ia ia, Eia pu no me oe o Iehova, e ke kanaka koa loa.
          13 I aku la o Gideona ia ia, e kuu Haku e, ina o Iehova pu kekahi me makou, no ke aha la makou i loohia i keia mau mea a pau? Auhea kana mau hanaa mana nui, a ko makou poe makua i hai mai ai ia makou, i ka i ana mai, Aole anei i lawe mai o Iehova ia kakou, mai Aigupita mai? Aka, ua haalele mai o Iehova ia kakou, a ua haawi ia kakou iloko o na lima o ko Midiana.
          14 Nana mai la o Iehova ia ia, i mai la, Ma keia mana ou, e hele ai oe, a e hoola no oe i ka Iseraela mai ka lima ae o ko Midiana. Aole anei au i hoouna aku ia oe?
          15 I aku la keia ia ia, E kuu Haku, Pehea la wau e hoola'i i ka Iseraela? He nawaliwali ko'u hanauna i ka Manase a pau; a ua liilii au iloko o ka hale o ko'u makua.
          16 I mai la o Iehova ia ia, Owau pu kekahi me oe, a e luku aku oe i ko Midiana, e like me ke kanaka hookahi.
          17 I aku la keia ia ia, Ina i loaa ia'u ka lokomaikaiia mai imua ou, e haawi mai oe i hoailona no kou kamailio ana mai ia'u.
          18 Ke noi aku nei au ia oe, Mai hele aku oe, a hiki mai au i ou la, a lawe mai i ko'u mohai makana, a waiho imua ou. I mai la kela, E kakali no wau, a hoi hou mai oe.

——:o:——

          He kanaha makahiki o ka noho maluhia ana o ka lahui mahope mai o ke pio ana o Iabiana. Aohe mea i haiia mai no ko Iseraela iloko o ia mau makahiki, ma ia hope, pilikia hou ka lahui. A ua hoike ia ma keia mokuna, I. Ka poino o ka lahui i ko Midiana, p. 1—6. He lahui auwana ia, (ko Midiana) e like me ka poe Arabia i keia wa. Ua luku ia kekahi hapa o lakou 200 makahiki mamua iho e Mose, nana ma Nahelu 31: 1—18. Ma ka aoao hikina lakou o ke Kaiula. II. Ka olelo a ke Akua ia lakou ma o ke Kaula la, p. 7—10. III. Hoala ia mai o Gideona i kokua no lakou, a me kana mau hana, p. 11—40. Pauku 11—18, ka haawina no keia la. Owai ka anela ma p. 11? O ke Keiki no ia a ke Akua, a o ke Akua no; nana p. 14 me 16. Opera, he kulanakauhale no Manase, he 16 mile ma ka akau o Ieriko. E hahi ana o Gideona i ka palaoa ma kahi kaomi waina. He hana malu keia no ka makau i ko Midiana. "Eia pu no me oe o Iehova," p. 12. O ke aloha ana ia o ka anela iaia. Ua maa ia lahui ia olelo; pela i aloha ai o Boaza i kona poe, Ruta 2:4. Pela no hoi i aloha ai ka anela i ka makuahine o ka Haku, Luka 1:28. He kanaka koa o Gideona, aka, ua nawaliwali kona manaoio, p. 13. Nana mai la ke Akua iaia, p. 14. He mana iloko o kela nana ana, e like me ka nana ana o ka Haku ia Petero, Luka 22:61. Hooikaika ia o Gideona ma ka mana o ke Akua. Hoike o Gideona i kona kulana haahaa, me kona ano nawaliwali loa, a hooikaika hou ke Akua iaia, p. 15, 16. Wahi a ke Akua, "e luku oe i ko Midiana, e like me ke kanaka hookahi," me he mea la he kanaka hookahi wale no lakou a pau imua o Gideona. Noi o Gideona i hoailona p. 17, i ike maopopo oia o ke Akua ia. A noi hou oia e oluolu mai i kona makana, p. 18. Ua ae ka anela i ka makana. Kii aku la o Gideona i io kao a me kau wahi palaoa huole, a lawe mai la na ka anela. Ma ke kauoha a ka anela, ua waiho ia kela mau mea maluna o ka pohaku, o aku la ka anela i kona lima, a a mai la ke ahi a hoopau ia ka io me ka palaoa, o ka hoailona ia.
          1. O ka ikaika a me ke akamai e hiki ai i kekahi mea e alakai pono i ka lahui, mai ke Akua mai ia. 2. He mea hiki i ke Akua ke hoopio koke i ka enemi, me he kanaka hookahi la. A, ke hoolilo nei Oia i ka poe liilii loa i poe hooko i kona makemake.

Na Hiohiona o Kapaliiuka nei.

E ka Lahui Hawaii e; Aloha kaua.
          O keia aina o Kapaliiuka, mai kona loa a ka laula. Elua hapa a ke Akua i haawi mai ai i kona lokomaikai; ua hoolilo kela i ka hapa makai, no ka inoino i na pahoehoe, a me na a-a o-oi no ka pele. O ka hapa hoi mauka nei, kahi a na kamaaina a me na malihini e noho nei, he wahi maikai loa, he oluolu, he maikai ke ea, mai ke kau a ka hooilo, he oluolu maikai no na malihini ke kipa mai maanei, he aina no hoi i piha i ka momona, ina e hooikaika nui na kanaka i ka hana, a he aina no hoi i ku pono i ka hanai holoholona. Eia no hoi maanei kahi o Mr. Reed, a me kana keiki e noho nei i ka hanai bipi, a me na holoholona e ae. Mai ka Mr. Reed malama ana i keia oihana, i hoolawa ia aku ai ke kulanakauhale, nona ka olelo ia ana, "Kauakanilehua" i na bipi, a me na waiu bata. Ma ka ike i loaa ia'u, o ka oi no keia ma keia apana, ma ka nui o na holoholona o kela ano keia ano. O keia haole no ka oi ma ka nui o ka aina i lilo iaia ma ke kuai, a me ka hoolimalima.
          NO KA WI.—He oia mau no ka pohihi o ke ola kino ma keia aina, a me na wahi e ae ma keia apana o Kau nei; aole no i kaawale loa aku na haawina o ka pilikia maluna iho o makou. Aole nae hoi i like loa me na la i kaahope ae. Ke hoomau mai nei no na wahi e ae i ka malama ana mai ia makou; me na pa-i ai, i hiki aku na paona i ka 10 a me 20 no ka hapalua. E o'u mau makamaka e noho ana ma na wahi loihi loa aku mai keia apana aku, e akahele mai oukou i ko oukou hookele ana mai i ka oukou mau eke ai, a me na pai ai, o pilikia auanei.
          NO KA ONA.—Ua pau hoi ke kaheawai ana o ka ona ma keia wahi, a me na wahi e ae a pau ma keia apana; aole hoi he holomoku e like me na mahina i hala hope ae nei, ke hele la—a piha pu o loko o ka halepaahao, kau a mea o ka nui o ka ona, a me ke puhi rama. I hookolokoloia iho ka hana, he pipili wale noia la me he kepau la. O ka haahaa olalo, he $50.00 a emi iho, o ke kiekie maluna, he $500.00. a pii aku. Ma ka ike aku i keia mau la, ua ane pau loa ka ulu ana o keia laau make ma keia apana; oiai o na lima lawelawe o ke aupuni, (makai,) "Ua eleu ma ka lakou mau hana," a no lakou ka mahaloia.
          NO NA WILI PULU.—Elua wili pulu ma keia wahi e ku nei, hookahi no N. Geogi, hookahi no Apeo, (pake) laua me Akana. Mai na oihana mai a keia poe, i hoolawa ia mai ai na makemake o kekahi poe ma keia apana kua-aina.
          NO KA HALE KUAI:—Elua mau hale kuai ma keia uka ma-u-lu-kua, akahi no N. Geogi, akahi hoi no G. Namauu, he kanaka maoli ia, a e ku hou ana paha no na pake, pela ka lohe ia.
          KE ANO O NA HOOMANA.—Ekolu no hoomana ma keia wahi i keia mau la e naue nei: hookahi hoomana hoole pope, me kona mau luakini elua, hoomana katolika, me elua ona mau luakini, hookahi no ka hoomana moremona. Eia nae ma ka ike aku; aole hookahi o keia mau hoomana i holo pono kana mau hana, o ka nui ka peki ihope.
          NO KE KULA SABATI.—Ke emi nei ke Kula Sabati ma keia Ekalesia ma Kapaliiuka nei: aole i like loa me na la mamua, ka holo imua. Keia wa, nee malie loa ka hele ana, o ka nui no ka emi mai.
J. H. K. NALAIELUA.
Kau, Maraki 3, 1875.

HANAU.

F e b. 6—Ma Kahuku, Oahu, na Hoopii me Paukialani he keikikane.
Ma r. 8.—Ma keia kulanakauhale, na ka wahine a Mr. Paalua D Kellitt, he kaikamahine.
Ma r. 17.—Ma keia kulanakauhale, na ka wahine a G. W. Houghtailing, (Hapakela) he kaikamahine.
Ma r. 18.—Ma keia kulanakauhale, na ka wahine a Mr. G. C. McLean, he keikikane.

MAKE.

F e b. 12.—Ma Kawela, Molokai, make o Kanoa wahine.
Feb 19. —Ma Kawela, Kahuku, make o Ihuole i ke 67 o kona mau makahiki.
Ma r. 1.—Ma Kahuku, Oahu, make o Maihiwa i ke 85 o kona mau makahiki.

NA BUKE
I HOOLAHAIA E KA PAPA HAWAII
—ME KE—
KUMUKUAI O KELA ME KEIA.

BAIB ALA HEMOLELE NUI ILI GULA NANI me na kuhikuhi ma na aoao ..... $12.00
Baibala Hemolele Nui ili eleele kaekae wai gula ..... 5.00
Baibala Hemolele uuku iki iho kae wai gula ..... 8.00
Baibala Hemolele uuku iki iho kae wai gula ..... 4.00
Baibala Hemolele ili eleele ..... 2.00
Kauoha Hou ili gula nani me na kuhikuhi ..... 3.00
Kauoha Hou ili eleele kaekae wai gula ..... 1.00
Kauoha Hou ili eleele ..... .75
Kauoha Hou Hapa Haole ..... .75
Moolelo Ekale sia ..... .50
Haiao ili lahilahi ..... .10
Hele Malihini ana ..... .25
No ko ke Akua ano ..... .25
Hoike Palapala Hemolele ..... .25
Moolelo o Hene ri Opukahaia ..... .15
Hoike Akua ..... .25
Wehewehehala ..... .25
Ninau Hoike ili manoanoa ..... .50
Ninau Hoike ili lahilahi ..... .20
Kumumua Kula Sabati ..... .20
B uke Lawe Lima ..... .10
He Buke no ka Pope ..... .15
Ui Kula Sabati Helu 3 ..... .25
Ui Kula Sabati Helu 4 ..... .15
Ui Kula Sabati Helu 5 ..... .25
B uke Euanelio o Ioane Hapahaole ..... .10
B uke Wehewehe Huaolelo Baibala, elua ano ..... 2.00
B uke Wehewehe Ano Mataio ..... 1.00
NA KAUOHA HOU PAKEKE.
Ili gula nani ..... 1.50
Ili eleele kaekae nani ..... .50
Ili eleele ..... .35
KAUOHA HOU PAKEKE ME NA HALELU.
Ili gula nani ..... 1.70
Ili eleele kaekae wai gula ..... .65
Ili eleele ..... .50
NA HALELU PAKEKE.
Ili Gula nani ..... .50
Ili eleele kaekae wai gula ..... .30
Ili eleele ..... .20
Ka Hae Hoonani (Buke Mele) ..... .25
NA BUKE MELE.
Himeni Hawaii ili nani ..... 1.75
Himeni Hawaii ..... 1.00
Kumu Leo Mele ili manoanoa ..... .50
Kumu Leo Mele ..... .10
Li ra Kamalii ..... .25
Li ra Hawaii 1848 ..... .25
Li ra Hawaii 1855 ..... .25
Hae Hoonani ..... .25
Leo Hoomana ..... .20
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta.  J. F. POKUE.
Kakaule ta o ka Papa Hooko o ka Ahahui Euanelio o ko Hawaii Pae Aina.

Olelo Hoolaha.

E IKE AUANEI KA POE WAIWAI A PAU e noho ana ma keia Paemoku. Mai haawi i kekahi waiwai ma ke ano aie i kuu wahine mare, oia o KAMEHAIKU. Oiai, ua haalele mai oia ia'u, a hele aku ma kona makemake i kuka pu ole ia, me ka loaa ana o ka lohe ua make, eia ka ke hoonalo nei oia iaia me ke kane e, nolaila, he kuleana ko na kanaka a pau e kiai ma ke kanawai i malama ia ka maluhia, a ina e hoi mai oia, e hoi mai no.  Na S. AUKAI.
Manamana, Mar. 15, 1875.  12-2t

WIL DER & CO.,
(WAILA MA.)

AIA MA KE KIHI O
ALANUI PAPU ME MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE.  7-1y

Laau Ola, Laau Ola.
AIA MA KAHI O
DILLINGHAM & CO.

KA LAAU KAULANA A
BISHOP SOULE!
HE LAAU HAMO MAIKAI KEIA!
a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O
a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." Wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola ku LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.

Laau Kaulana
A KAUKA SUCH!

He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1 y

HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!

Ma keia hope aku, o na huakai a pau a Kilauea, e hoi mai ai mai Hawaii mai, aole e haalele ana ia Makena mamua ae o ka hora 7 A. M., aole hoi ia Kamaalaea a hiki i ka hora 9 A. M.
Uku Eemoku mai Honolulu aku
A hiki i Kaunakakai, a pela maluna mai ..... $5.00
" Lahaina, " " ..... 6.00
" Maalaea, " " ..... 7.00
" Mahukona, " " ..... 10.00
" Kawaihae, " " ..... 10.00
" Kailua, " " ..... 10.00
" Kaawaloa, " " ..... 10.00
" Hilo, " " ..... 12.50
" Kau, " " ..... 15.50
Uku kaapuni ia Hawaii, ..... 22.00
A hiki i na awa o Kauai, ..... 8.00
Uku kaapuni ia Kauai, ..... 12.00
Uku ohua Hawaii oneki, ..... 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku- Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER, (Waila),
A gena.
Keena ma ka Hale Kuai Papa o Waila ma, kihi o Alanui Papu a me Moiwahine.  683 3m 696

G. WEST!

HALE HANA KAA HOLO LEALEA ME na kaa hali ukana. E hana hou ia no hoi na kaa nahaha no ka uku oluolu. E kapiliia na kapuai lio, no ka uku kupono. Ma ka hale hana mua o Mr. Benfield, ma ke Alanui Alii.  7-1y