Ka Lahui Hawaii, Volume I, Number 5, 28 Ianuali 1875 — Page 1

KA LAHUI HAWAII.
HOL Y BIBLE
"Ua mau ke Ea o ka Aina i ka Pono."
BUKE1.}   HONOLULU, POAHA, IANUARI 28, 1875.  {HELU 5.

KA NUPEPA KA LAHUI HAWAII.

          He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
          HOOKAHI DALA ka uku no ka pepa no ka makahiki hookahi. Hapa makahiki, Hapalua.
          E hoouna mai i na leta no KA LAHUI HAWAII ia H. H. Paleka, Honolulu, Oahu.

[NO KA LAHUI HAWAII.]
The Master says go.
Royal Diadem. P. 19.

1. Hana'e ma Ko'u mala, ua kena Ie su,
Ua oo no ka hua, e ohi ano,
Ua aui ka la la, ua kokoke po.
A ake e maha ka poe ohi mau.
CHO:—Aloha na hoa, e hele ano,
Hana'e ma Ko'u mala, ua kena Ie su.
2. Hoolohe, a hana ma keia wa hou,
Mai pane, alia, maikai apopo;
E haawi ia Ie su i keia wa no,
Ka ikaika, ke ola, ka hana a pau.
CHO:—Aloha na hoa, & c.,
3. E nee i ka mala, kahea Iesu,
E hana, a nana e uku mai no,
Ke pau ae ka hana, a o hiia'e
Na hua maluna, ma kahi maikai.
CHO:—Aloha na hoa, &c.,
4. Ma o ma ka nani e mele kakou;
Ua lilo ka hana, ka no Iesu,
Aloha mai Oia, a ae ola mai
E komo me ia a maha pu ae.
CHO:—Aloha na hoa, &c.  HAWAII.

E MALAMA.

          E malama i ka akau e like me ka rula.
          E malama i ko ke ao mai, i na kina o kou hoa.
          E malama i kou manao ma na kumu maemae.
          E malama i kou maka ma na mea makalii, ka olino.
          E alama pono i kau hana. I kou mahaloia.
          E malama pono i kou manaoio i ke Akua.
          E malama i pakele i na hewa, na kina.
          E malama mai na ola ae e poino ai oe.
          E malama i pakele kou elelo i na olelo ino.
          E hookupono i kau noi ana, a me kou manao.
          E malama i kau mau hana a pau, i ole oe e eha.
          E hooikaika i ka manaolana ma kahi e huwa ole ia mai.
          E malama akahele i ke elelo a me ka lima
          E malama i kou wawae, i ku ma ka pono.
          E hoomau i ka olelo oiaio, he mea laa ia.
          E malama i na pahele a ka poe hoowalewale.
          E malama i ka manao ana no na hoa'loha.
          E makaikai mau imua ou i ka pahu hopu hope loa.
          E malama i pakele i ka hoinoia mai, a me ka huwa
          E malama pono i kou manao wiwo ole i ikaika.
          E malama i ka pono, a e haalele i ka hewa.
          E malama pono i na huaolelo ao akamai.
          E malama i ka mehana i ka po, i ka huihui i ke ao.

HE MOOLELO KAAO
NO KE
KEIKI ALII IULESIA
NO KA LAHUI KAULANA O NA AU I HALA MA HELENE—ME KANA MAU KAAPUNI ANA I NA AINA MA KA HIKINA.
MOKUNA II—HELU 7.

          O KEIA ka olelo wanana a Tiresia i hoike aku ai ia Iulesia, aole he mau olelo hou aku, no ka mea, i keia wa, ua hiki nui loa mai la na uhane o ka poe make, me ka nonoi mai i ke koko, a nolaila, ua haalulu iho la na lala o Iulesia, no ka ike ana aku i ka lehulehu loa o ka poe make, a oia hookahi wale no ke kanaka ola ma ua wahi la. I keia wa, hiki mai la kona makuahine a palu iho la i ke koko, me ke keakea ole aku o kana keiki. Ike mai la oia i kana keiki, ninau mai la, no ke aha la i hiki ola aku ai oia i ko lakou wahi neoneo; a hai mai la no hoi, no kona kaumaha i ka nalowale loihi loa o Iulesia, oia ke kumu i mailo mau ai kona kino, a hiki wale i kona iho ana i ka luakupapau. Ua hoopalupaluia ko Iulesia manao e ke aloha, i kona wa i kamailio mai ai; poina iho la iaia ke kulana o ka make, a o ka mea kino uhane hoi he ea wale no ia, aole e paa i ka hopuia e ka mea io a me ke koko, aka, hohola ae la oia i kona mau lima e puili mai iaia, aka, puehu ano e aku la ka mea uhane mai kona mau puili ana, nana mai la hoi iaia me ke kaumaha, a nalo aku la.
          Alaila, ike aku la oia i kekahi mau wahine e ae—ia Turo, ka ipo aloha a Nepetune i kona wa e ola ana, nana mai o Peliasa a me Nelusa—a ia Anetiope ka mea nana i hanau mai na keiki kane like loa elua, na Iove—ia Amepiona me Zetusa, na mea nana i hookumu o Tebesa; a ia Alakemena ka makuahine o Herekule a me kana kaikamahine nani, a mahope iho ia Megara, kana hunona wahine. Malaila no hoi i ike aku ai o Iulesia ia Iokata ka makuahine poino, ka wahine a Edipusa; ka mea i mare me kana keiki ponoi no ka ike ole, a i kona wa i ike ai o kana keiki ponoi kana i mare ai, ua hilahila loa oia a kaawe iaia iho. O kana keiki hoi, ua hoomauia kona ola pilihua maluna o ka honua, me ka holapu mau ia e na poino weliweli a hiki wale i kona make ana. Malaila pu no o Leda, ka wahine a Tinedara, ka makuahine o ka Helene nani a me na kaikunane makau ole ona elua—Catora a me Poluki, ka mea i loaa mai ai ke ola lua ole ma o Iove la. (No ka mea, o Catora ke keiki a Tinedara, he keiki kanaka maoli oia, a o Poluki hoi, he keiki oia na ke akua he mea make ole)—a i ko laua make ana, ua noho laua ma na wahi maikai o lalo o ka honua. No ka mea, ua nonoi aku o Poluki e haawi ia mai ke ola make ole ia Catora kona hoahanau, oiai he mea make wale no oia, aole nae i ae mai ka Ulia o ko ke kanaka hope ia mea, nolaila, ua mahele pu iho la oia me kona hoahanau, e ola a e make pu me ia. Ilaila no hoi o Ipimedia, ka mea i hanau i na keikikane elua na Nepetune, he mau keiki nunui—o Otusa me Epialete ko laua mau inoa. Aole he mau keiki a ka Honua i hoohua mai i like ka nani, ka ikaika a me ka nunui e like me keia mau keiki, koe wale no paha o Oriona. No ka mea, i ko laua wa eiwa wale no makahiki, ua upu e laua e pii iluna i ka lani, i ike i ke ano o ka hana a na akua malaila. I mea e holo pono ai keia kuko o laua, ua manao iho la laua e kukulu i alapii mai ka honua nei a hiki i ka lani, ma ka paila ana i na mauna, o kekahi maluna o kekahi. Hookau iho la laua ia Osa maluna o Olimepusa, a ia Peliona hoi maluna iho; a mai holo pono paha ka laua hana ina e ola laua a hiki i ka wa mahuahua iki ae, aka, ua make e nae laua iloko o ka wa liilii i ka wa hoi e hoomaka ana e kukulu i ka laua hana ake-oi. Maanei no hoi i ike aku ai oia ia Paedara, Perokerisa a me Ariadane, e kumakena ana no Teseu; a ia Maera, Celimena a me Eripile hoi ka poe i oi aku ke ake nui i ke gula mamua o ke kaula gula o ka mare.
          I keia wa, hiki mai la kakahi akua manaonao ke nana aku, o Agamenona kona inoa, ke keiki a Atereu ka alihikaua nui o na puali kaua a pau o Helene a me na'lii i hui ai e kaua aku ia Teroi. Hele mai la oia me ke koena o na akua a kioe ae la i ke koko. A i ko Iulesia ike ana aku iaia iwaena o ka poe make, ua hoonaueia oia e ke aloha. Ninau aku la oia i ke kumu o kona make ana, ina ua loohia oia i ka ino ma ka moana, mahope iho o ka haalele ana ia Teroi, a i ole, ua pepehi ia paha oia iloko o kekahi kipi kuloko ana o kona poe koa, no ko lakou make i ka waiwai pio.
          Pane mai la o Ademenona, "Aole au i make no ia mau mea; aka, ua pepehi ia au ma kekahi ahaaina, kahi a Egitusa i kono mai ai ia'u e hele aku, mahope iho o kuu hiki ana i ka home. Ua hui pu laua me kuu wahine moekolohe e hana i mea e make ai no'u, a ua alakai ia au i ua ahaaina la, e like me ka bipi i kona wahi e pepehiia ai. Ma ua papaaina la i hoopuniia ai au e na enemi, a pepehiia iho la au a me kuu mau hoa aloha a pau.
          "O ua wahine aloha ole nei a'u, ua hoopoina loa oia i kana mau hoohiki ana i kona wa i mare ai me a'u, a aole i kokua mai kona lima e pani iho i kuu maka, oiai au iloko o ka mauliawa o ka make. Aka, ua hiki no kona aloha ole ana, no ka mea, ua ake no oia e pepehi i kona hoa i mare ai, oiai oia e kaikamahine ana. I ko'u wa i hoihoi mai ai iaia i ko'u home, ua kuhi au he wahine aloha oia ia'u a me kuu mau keiki. O kana mau hana ino eleele, he alina ino ia no ka mea i like me ia. Pomaikai na kane i loaa na wahine aloha, a i hana ole hoi e like me na hana ino a keia wahine."
          "Auwe!" wahi e Iule sia, "me he la he hoopai ia no kou mamo alii o Atereu. Ua hookae ia mai oukou e Iove ma o ka oukou mau wahine la. No ka mea, ma o Helene la, ka wahine a Menelau, kou kaikaina, he weliweli ka nui o ka poe i make iloko o na kaua o Teroi!"
          Pane mai la o A gamenona, "No keia mea, mai hooi aku i ka lokomaikai i kekahi wahine mamua o ka hana naauao. Mai hai aku iaia i na mea a pau iloko o kou manao i kahi wa; e malama i kekahi mau mea huna me oe. Aka, aohe au mea e makau ai no kekahi hana ino mai kau wahine mai. Ke pii mau ae la kona akamai, a no kona akamai a me ka naauao, i mahuahua ai kona pono e kaulana no hoi. O Penelope, ke kaikamahine nani a Ikario, haalele aku kakou iaia he kaikamahine opio wale no, i ko kakou wa i hele ai i ke kaua, a e omo ana no kana makahiapo kane i ke waiu—ke Telemakusa opio; ia oe e hiki aku ai i ka home, e ike aku no oe, ua ulu ae oia a lilo he kanaka makua; a e aloha mai oia i kona makuakane me na aloha kupono o ke keiki i ka makua. O Oretese, kuu keiki aloha, aole au e ike hou ana iaia. Na kona makuahine i hookaawale i kona makuakane mai ka ike ana iaia—a malia paha, o pepehi iho auanei oia e like me ka pepehi ana i kona makuakane. Ano, aole e pono e paulele i ka wahine. Aka, heaha kau e hai mai ai e ke Kaulana? E hai mai anei oe ke ola la no kuu keiki? Ke noho ia anei oia i Orokumena, a i ole ia i Pilusa? I Separata paha me ke aloalii o kona makuakane hoahanau? Ae, e like me ka'u e ike nei aole oia i make, oiai aole oia me a'u maanei.
(Aole i pau.)

PAKELE KE OLA.

E ka Lahui Hawaii; Aloha kaua:—
          Ka makamaka o keia mau la e kunewa nei, ua loaa au ia oe e noho ana i ka aina nona ka oleloia ana "Kuu Haku i ka Ua Haao o Kau."
          I keia mau la i aui ae nei, ua pepehi iho o Kaahanui k., i kana wahine o Papa, a eha loa, a penei ke kumu o ka pepehi ana: "Ua hele o Kaahanui i ka huli lio a loaa ka lio, hoi mai la oia a ma kahi e kokoke mai ana i ka hale, ike aku la oia ia Papa e hele ana mai ka hale aku, a nalowale iloko o ka nahelehele, noho o Kaahanui a liuliu, hoomaka oia e hele aku mahope, ua loaa aku o Papa iaia e noho ana iloko o ka nahelehele, ia wa no ua pii ino kona huhu, o ka ulele iho la no ia i na hauna laau a Kawelo, poohu ka lae, na ke koko no ia i hele mai, a uwe ae la o Papa me ka leo nui, a holo aku la kekahi poe e uwao, ia lakou i hiki aku ai e waiho mai ana o Papa me ka eha, a ua kii koke ia o C. N. Spencer, a ua hele kela me ka laau e hoopaa i ke koko, aole nae i paa, e ole o L. R. Macomber, nana kahi laau i paa ai he koko, a ke kamau nei no ka eha iaia a hiki i keia la. Ua hopuia ka mea pepehi a hoopaa ia i ka hale paahao, a ua hookolokolo ia e ka Lunakanawai Apana, a no ka hiki ole iaia ke hoopai a hookuu aku, nolaila ua haku iho oia i kana olelo hooholo penei. E waiho ia Kaahanui k. no ke kau Jure o Hilo i ka malama o Mei e hiki mai ana." Mai loaa ka ukali o Kahalelepo ka mea i pepehi ia Nuole me ke aloha ole. Oia iho la no kahi mea hou o ke kuaaina ninau alii, ma Waiohinu nei no keia pepehi ana o Kaahanui. Me ka mahalo.
R. P. KEALOHAWELA.
Waiohinu, Kau Hawaii, Ian. 13, 1875

No ka wahahee.

          "Maikai hoi ke kanaka ilihune mamua o ka mea wahahee." Aole hewa ka ilihune, o ka wahahee, he mea hewa ia. E ola na kanaka ilihune ke noho pono lakou, aole nae e ola ka poe wahahee. Wahi a Iehova, "Aole e komo aku iloko o ia wahi, kekahi mea hana ma ha hewa a me ka wahahee."
          I k eia wa he nui na wahahee ma keia paeaina. Nui na hewa e ae iwaena o kanaka, aka, ua oi loa aku ka wahahee i na hewa e ae.
          Owai la ka mea pomaikai i ka wa a ke Akua i hookomo ai i na kanaka iloko o ka hookolokolo ia? O ke kanaka hoopunipuni anei? O ka mea ilihune anei? O Lazaro anei? O Davida paha? E kuu hoalauna, pahea oe, he kanaka makua anei oe i ka hoopunipuni? Ua pale loa anei oe i na hewa weliweli la? He pule anei oe i ke Akua e malama i ka puka o kou lehelehe? O ka mea makau ole i ka wahahee, aloha ole i kona uhane iho!
          Ka nele, hune, puha, mai,
          Aole i papa ia'e
          Ka wahahee, he hua oia,
          Aole pono ke hoopaa.   EMESONA.

          Noho mau he anu i ko lalo poe, wahi a ko makou lohe mai na pali Koolau mai. Aole ka o kanamai o ka huihui i keia mau la iho nei. O makou no ka makou e hai ae, ua maeele maoli ko makou mau manamana lima.