Ka Lama Hawaii, Volume I, Number 20, 20 September 1834 — Page 2

LAMA HAWAII.

poe lunaolelo i ka hee, a hele lakou a ia aina aku, a ia aina aku; a i ko lakou hele ana, hai pinepine lakou i ka olelo maikai, a nui ka poe i lohe me ka paulele aku ia Iesu pela i mahuahua ae ka Iesu poe haumana.
            §          7. No na lilo ana o Paulo i kahuna pule.
            I ka makahiki o ka Haku 36, halawai pu o Iesu me Paulo i kona hele ana i Damaseko e pepehi a make i ka poe haipule malaila, a hoohanau hou mai Iesu i kona naau. Mamua, he Parisaio o Paulo. Ua ikaika kona manao ma ka aoao o Mose, a nui kona inaina ia Iesu, a me ka poe a pau i paulele aku ia ia. Ua ae aku ia i ka make ana o Setepano; a no ka ukiuki loa i ka Iesu poe haumana, hoomaau aku la ia lakou a hiki i na kulanakauhale o na aina e. A mahope iho, Ua akaka kona mihi ana i kona hewa, nui kona aloha ia Iesu a me ka poe haumana ana, a nui no hoi kana hana maikai ana.
            §          8. No ka hai ana i ko Iesu olelo i ko na aina e.
            I ka makahiki o ka Haku 41, hoouna mai ke Akua ia Petero i kekahi kulanakauhale o ko na aina e, e hai aku ia Korenelio i ka Iesu olelo. A mahope iho, hai aku la ka poe lunaolelo a pau ia Iesu, a me kona ala hou ana, i ko na aina e a pau loa. Ua kapaia o Paulo, he lunaolelo o ka poe kanaka e, no ka mea, ua hooikaika oia i kona hai ana'ku i ka Iesu olelo i na kanaka a pau o na aina e, i haalele lakou i ko lakou mau akua hoopunipuni. A nui no ka poe i paulele aku ia Iesu i ko lakou lohe ana ia Paulo.
            §          9. No ka hoopaapaa ana o kekahi poe no ka okipoepoe ana.
            I ka makahiki o ka Haku 49, hele mai la kekahi poe Iudaio i ka poe hoahanau o ko na aina e a ao aku ia lakou penei, "Ina aole oukou e okipoepoeia e like me ka aoao o Mose, aole hiki ia oukou ke ola." He mea kaumaha keia i ko na aina e, no ia mea, pii aku la o Paulo laua me Barenaba i Ierusalema e kamailio pu me ka poe lunaolelo no kela mea. A i ko lakou hoakoakoa ana me ka manao hookahi, hoopaa lakou i keia manao. "O ka okipoepoe ana, aohe mea ia e ola'i ka uhane, no ia mea aole pono no ko na aina e e okipoepoeia." A lohe ko na aina e, olioli ko lakou mau naau.
            §          10. No ko Paulo kaahele ana.
            Mai ka makahiki o ka Haku 50, a hiki i ka makahiki 64; kaahele o Paulo ma ia wahi aku a ia wahi aku e hai ana i ka olelo maikai a Iesu. Hele aku la ia i Korineto, a me Galatia, i Epeso, a me Tesalonike, i Kolosa, a me Pilipi, i Makedonia, a me Roma. Ua kukulu oia i ka ekalesia ma Korineto, ma Roma, ma ia wahi aku ia wahi aku. No kona hooikaika ana i kela hana maikai, ku e mai ka poe Iudaio ia ia, me ka imi nui i kona make ana. A mahope iho, i kona huli ana ia Kaisara e hookolokoloia'i ua hoounaia oia e ka poe Iudaio i ke Alii nui o Roma. I kona holo ana, mai make ia, a me ka poe i holo pu me ia, i ka moana. I kona hiki ana i Roma, noho oia malaila i na makahiki elua, alaila, hoi mai ia i Epeso, a me Kolosa, a hooikaika hou aku i na haumana a pau. I ka makahiki o ka Haku 65, hele hou aku la o Paulo i Roma, a ua make ia malaila i kona poe enemi, i ke au ia Nero, ke Alii nui o ka poe Roma.
            §          11. No ke hooahi ana o Nero, a me kona hoomaau ana i ko Iesu ekalesia.
            He alii ino loa o Nero. No kona hewa nui o ka naau, ua kahuia e ia, o Roma o kela kulanakauhale nui, a nani loa. A mahope iho, ua makau ke Alii i ka huhu a me ka inaina o kanaka, no ia mea, niania wale aku ia i ka poe haipule, nolaila, ua nui ka poe o lakou i make. Ua make kekahi poe i na ilio hihiu, ua make kekahi poe ma ke kea, a ua make kekahi poe i ke ahi. Ua kaulia o Petero ma ke kea me kona poo ilalo a make. No ka naau haahaa, makemake ia e kaulia pela.
            Aole nae e hiki ia Nero, i ua Alii ino la ke hooemi i ka poe haipule. Mahuahua no lakou i kela la i keia la a palahalaha ae la ka ekalesia ma na aina a pau, no ka mea, ua kokua mai ke Akua i kona poe kanaka; pela, ua olelo ia, "o ke koko o ka poe haipule, oia ka hua o ka poe ekalesia.
 

MOKUNA III.

            Mai ka luku ana o Ierusalema, i ka makahiki o ka Haku 70 a hiki i ke alii ana o Konesetine i ka makahiki 306.
            §          1. No ka hooalii ana o Vesepasiana a me Tito.
            Pomaikai ka poe Roma, a me ko Iesu ekalesia i ke alii ana o Vesepasiana, a me kana keiki o Tito. Aole laua ike pono ia Iesu; aole paulele aku ia ia, aka he mau Alii naauao laua, aole laua i ae aku i ka hoomaauia mai o ka ekalesia e ka poe enemi.
 

He Wahi Niele no ka mooolelo ekalesia.

            Pehea ka poe lunaolelo mahope o ka make ana o Setepano? I ka makahiki hea ka huli ana o Paulo? Pehea kona ano mamua?
            Ua hoouna mai ke Akua ia Petero ia wai? Pehea mahope iho? Owai ka lunaolelo no na kanaka e? Owai ka i hopaapaa no ka okipoepoe ana?
            Heaha ka manao paa a ka poe lunaolelo? Aia la i hea o Paulo i hele aku ai mai ka makahiki 50 a hiki i ka makahiki 64? No ke aha oia i hele aku ai? Owai ka poe ku e mai ia Paulo? Ua huli oia ia wai?
            Ai la i hea i make ai o Paulo? I ke au ia wai? Heaha ke ano o kela alii? Heaha kana hana ana i ko ka ekalesia? Pehea ko Paulo laua me Petero make ana?
            Pehea ko Petero make ana? Ua hooemiia mai ka ekalesia i ka hana ino ana mai o Nero? Pehea ke alii ana o Vesepasiana a me Tito? Ua ike pono anei laua ia Iesu?
 

NA SOLOMONA.
MOK. 6.

1          E kuu keiki, ina i hoohiki aie oe i kou hoalauna,
            Ina i pai kou lima me ka malihini,
2          Ua puniia oe e ka olelo a kou waha,
            Ua punihei oe i ka olelo a kou waha.
3          Ano la, E kuu keiki, eia kau mea e hana'i i pakele,
            I kou lilo ana i ka lima o kou hoalauna,
            O hele, e hoohaahaa ia oe iho, e hoolaulea i kou hoalauna.
4          Mai haawi i ka hiamoe i kou mau maka,
            Aole hoi i ka hiamoe i kou mau lihilihi,
5          E holo me he dia la noloko ae o ka lima,
            A e like hoi me ka manu mai ka lima ae o ka punihei manu.
6          E ka hiamoe, e hele oe i ka anonanona,
            E nana i kona aoao a e hoonaauao ai.
7          Aohe alii ia ia,
            Aole haku, aole hoi lunakanawai.
8          Waiho aku la oia i kana ai i ke kau,
            I ka wa ahu, hoahu oia i kana mea ai.
9          Pehea ka loihi, e ka hiamoe, a e hiamoe oe?
            Ahea la oe e ala mai ai mai kou hiamoe ana?
10         I moe iki ae, i hiamoe iki ae,
            I peliu hou iki ae i ka lima a hiamoe.
11         E hiki mai kou ilihune me he kanaka hele la,
            A me kou nele e like me ke kanaka i pakuia.
12         O ke kanaka aia, o ke kanaka hewa,
            Hele no oia me ka waha wahahee.
13         Imoimo oia me ka maka, ao aku oia me ka wawae.
            Kuhikuhi oia me kona manamanalima.
14         He lapuwale ma kona naau,
            Noonoo ino no oia i na la a pau,
            Hookonokono oia i ka hakaka.
15         No laila, e loohia koke mai ia ia ka make.
            E haihai koke ia oia, aole mea e hoola'i.
16         Eia mau mea eono e inaina mai o Iehova.
            Ehiku hoi he hoopailua ia i kona naau.
17         O na maka kiekie, o ka olelo wahahee,
            A me na lima hookahe koko hala ole.
18         O ka naau e imi ana i na manao kolohe,
            A me na wawae e holo kiki ana i ka hewa.
19         O ka hoike hoopunipuni e hana ana i ka wahahee,
            A me ka mea pai i ka hakaka mawaena o na hoahanau.
20         E kuu keiki e, e malama oe i ke kauoha a kou makuakane,
            Mai haalele hoi i ke kauoha a kou makuahine.
21         Nau lakou e hawele mau ai i kou naau,
            E nakii oe ia lakou i kou ai.
22         I kuu hele ana, ea, e kai aku oia ia oe,
            I kuu hiamoe ana, e kiai oia maluna ou,
            I kou ala ana iluna, oia e kamailio pu me oe.
23         No ka mea, he kukui ke kauoha,
            He malamalama ke kanawai,
            O ka aoao o ke ola ke ao ana e naauao ai.
24         I malamaia oe i ka wahine ino,
            I ka malihini i hoomalimali me kana olelo.