Ka Lama Hawaii, Volume I, Number 16, 1 ʻAukake 1834 — HE DIA. NO KA DIA. [ARTICLE+ILLUSTRATION]

HE DIA.

NO KA DIA.

Ua nui loa na holoholona i like kekahi ano me ko ka Dia. Aka, o ka Dia maoli ka mea maikai o lakou a pau ma na helehelena ona. Ua loihi kona mau wawae, a ua uuku ua poepoe kona kino a ua maikai; a o ka Dia kane ua kiekie kona poo, a he manamana, maikai kona mau pepeiaohao he oluolu kona mau maka, he makaala loa. Ua ulaula kona kua, a ma na aoao, he hapa ka ula, a malalo o ka ai, a ka umauma, ua kokoke keokeo.

Ekolu kapuai a me ka hapa kona kiekie, a eha kapuai kekahi. Elima kapuai kona loa, a eono no kekahi. Ekolu kapuai ka loa o kona mau pepeiaohao, a ua manamana. Ewalu no niho ko ka Dia, ma ka iwi a lalo, aole niho ma ke a luna a he umikumamalua ona kui ma ke a lalo, a pela no maluna; a i huiia na niho a me na kui he kanakolukumamalua lakou. Ua loaa keia holoholona maikai, ma Europa, a ma Asia, a ma Amerika. E like me ko ka Dia maikai ma na helehelena, pela no ia ma ka oluolu a me ka maikai o kana hana ana. Ina ike mai ia i ke

kanaka, e holo mama no oia, aole hoi ia e hooeha mai i kekahi ke hahai ole ia oia. E hiki wawe no ke hoolakalaka ia ia, i kona wa opiopio, ke malama ponoia ia me ka lokomaikai. He mea makau wale ia, a ina hoolakaia, holo wale ia i ka ilio uuku, a me ke kanaka ana i ike ole ai mamua. Haule no kona mau pepeiaohao i kela makahiki keia makahiki, i ka malama o Maraki ka haule ana. A haule na hao kahiko, ulu koke no na hao hou. A hala na malama ekolu ua nui na hao, uuku na hao kahiko. E hiki no ke heluhelu i na makahiki o

ka Dia ma na manamana o kona mau pepeiaohao, no ka mea, i kela makahiki i keia makahiki, i ka ulu hou ana o na pepeiaohao, pakela hou aku kekahi la|a, no laila, ua like ka helu'na o na manamana, me na makahiki ona i ola'i. Ua oleloia, i ka manawa i haule ai na pepeiaohao o ka Dia kane, ua hilahila ia, a haalele no i kana wahine, a pee aku i kahi malu, malaila e kakali ai, a ulu hou na pepeiaohao ona, alaila hoi no i kana wahine. He mea ola loa ka Dia. Ua ikeia kekahi he kanaha makahiki a keu. He ano okoa ko ka Dia kane, okoa ko ka wahine. Ua oluolu loa ka wahine, ua makau wale ua maikai, aole hoi ona pepeiaohao. He mea waiwai ka Dia, aole nae e like me ka Reinadia. Ua ono no kona io, a ua ai nui ia. Ua maikai loa kona ili, oia hoi ka ili Dia a kakou i ike ai. Ua maikai kona mau hao, i mea ao pahi, a i poo keokeo, a i laau lapaau kekahi. Ua like no kekahi ano o ka Dia me ko ka Eleka, aole nae i nui kahi i like ai. He mea nui ka Eleka, uuku ka Dia. He ahinahina ka Eleka, he ulaulu ka Dia. I ka hele ana o ka Eleka, ua haahaa ke poo, a ua like me ka mea hiamoe kona mau maka. Ua kiekie ke poo o ka Dia, a ua makaala, me he mea la i makaukau i ka holo, ke olelo ikiia mai. O ke ano o ko ka Dia helehelena, he mama, he kaumaha ko ka Eleka. He manamana okoa ka pepeiaohao o ka Dia, e like me ka laau. Ua like me na manamana lima ko ka Eleka. Ua huiia kahi manamana me kahi manamana, he hao lahilahi ka mea i hui ai.