Ka Lama Hawaii, Volume I, Number 16, 1 August 1834 — Page 2
LAMA HAWAII.
ka Dia ma na manamana o kona mau pepeiaohao, no ka mea, i kela makahiki i keia makahiki, i ka ulu hou ana o na pepeiaohao, pakela hou aku kekahi lala, no laila, ua like ka helu'na o na manamana, me na makahiki ona i ola'i,
Ua oleloia, i ka manawa i haule ai na pepeiaohao o ka Dia kane, ua hilahila ia, a haalele no i kana wahine, a pee aku i kahi malu, malaila e kakali ai, a ulu hou na pepeiaohao ona, alaila hoi no i kana wahine.
He mea ola loa ka Dia. Ua ikeia kekahi he kanaha makahiki a keu.
He ano okoa ko ka Dia kane, okoa ko ka wahine.
Ua oluolu loa ka wahine, ua makau wale ua maikai, aole hoi ona pepeiaohao.
He mea waiwai ka Dia, aole nae e like me ka Reinadia. Ua ono no kona io, a ua ai nui ia. Ua maikai loa kona ili, oia hoi ka ili Dia a kakou i ike ai. Ua maikai kona mau hao, i mea ao pahi, a i poo kookoo, a i laau lapaau kekahi.
Ua like no kekahi ano o ka Dia me ko ka Eleka, aole nae i nui kahi i like ai. He mea nui ka Eleka, uuku ka Dia. He ahinahina ka Eleka, he ulaulu ka Dia. I ka hele ana o ka Eleka, ua haahaa ke poo, a ua like me ka mea hiamoe kona mau maka. Ua kiekie ke poo o ka Dia, a ua makaala, me he mea la i makaukau i ka holo, ke olelo ikiia mai. O ke ano o ko ka Dia helehelena, he mama, he kaumaha ko ka Eleka. He manamana okoa ka pepeiaohao o ka Dia, e like me ka laau. Ua like me na manamana lima ko ka Eleka. Ua huiia kahi manamama me kahi manamana, he hao lahilahi ka mea i hui ai.
Wailuku, Mei 13, 1834.
E ANERU,—Ke hoouna aku nei au ia oe i ka palapala o k'ou holo ana i Honuaula a i Kula, a i Hamakua loa, a i Hamakua poko, e hai aku i ka olelo a ka Haku, a e ike i ka hana a ka poe kumu, a me ka lakou poe haumana i hana'i i keia mau la.
Aloha ia oe.
Kou kaikaina,
J. S. GARINA.
Satude, Mei 3, 1834. I ke kakahiaka nei holo mai au e ike i na kanaka e noho ana ma na kua aina, a e hai aku ia lakou i ka olelo a ka Haku. Ma ka lio ko'u holo ana. Ua maikai ke ala a hiki i Kawailepolepo—uuku paha ka hana i koe a hiki ke kaa ilaila. Ma Kawailepolepo, hoike mai kekahi kula, a mahope iho, hai aku au ia lakou i ka olelo a ke Akua. Amosa 4:12, ka'u poo-olelo ia.
A holo hou i kekahi kauhale. Kaluaihakoko, aohe kula malaila, aka, hoouluulu au i kekahi poe kanaka, a hai aku au i ka Iesu olelo. Ioane 3:3. Ahiahi, hiki au i Honuaula, a hoakoakoa na kanaka hai aku la au ia lakou i ka olelo a ke Akua ma Korineto elua 6:2.
Mei 4. Sabati. I ke kakahiaka hai aku la au i ka olelo a ke Akua i na kamalii o ia wahi, Kekahuna 12:15. Aole nui loa na kamalii iloko o ka hale pule. Mahope iho, hai aku la au, i na kanaka, i ka ke Akua olelo 2. Korineto 5:10. Elua tausani kanaka paha imua o'u. A ahiahi hai hou aku i ka Iesu olelo Luka 8:17.
Mei 5. Monede. I ke kakahiaka hoike makaukau ka nui o lakou. E imi ana kekahi poe i dala no ko lakou kino. A pau ka hoike ana, hai hou aku au ia lakou i ka olelo a ke Akua. Ioane 5:39.
Mahope, holo au i uka a hiki i Kula. Ke ala, "he ino, he aa, he nahelehele." E hiki no nae ke hana i ala maikai. Ua maikai ka aina. Aole nui ka ai e ulu ana i keia wa, no ka palaualelo o kanaka paha. Awakea, hiki au i Waiele. Malaila, hoike mai ke kula uuku, a hai aku au ia lakou i ka olelo a ke Akua, "E hiki mai kou aupuni." Holo hou a ahiahi hiki au i Loiele. Aole nui na haumana malaila. Hele liilii lakou e imi ana i ka dala no ke kino. Hai aku la au ia lakou i ka olelo a Iesu. Mataio 6:10. Hele hou a poeleele, hiki i Kalalua, a moe malaila. Ua nui ke anu i ka po.
Mei 6. Tusede. Kakahiaka ae la, hoike mai kekahi poe haumana, a pau ae la, hai aku ia lakou i ka olelo a ka Haku. Ma Mataio 6:34. Holo hou a hiki i Makawao, hoike mai kolaila poe haumana, a hai aku i ka olelo a ke Akua.
Ma Haliimaile kekahi, hoike mai na haumana. Aole nui ko laila kula—Ua maikai no nae, ua makaukau. A pau ka hoike ana, hooikaika au ia lakou e imi i na mea e pono ai lakou, a me ka aina i lilo lakou i poe naauao io i ola lakou ia Iesu.
Holo hou aku la a hiki i Haeku ma Hamakua loa. Ua pau ko Hamakua poe kula i ka hoakoakoaia—Ua makaukau kahi—makaukau ole kekahi. Pau ka hoike, kuhikuhi au imua o lakou i ka pono, a hooikaika au ia lakou e lilo wawe i poe hou.
Ma Hamakuapoko, nui ke kula—uuku mamua, aole nui loa. Hai aku au i ka Iesu olelo, a pau ia, holo aku la au, a hiki i Wailuku. E hoomaikaiia ke Akua Amene.
Eia ka papa e maopopo ai ka poe haumana i hoike mai ma Maui hikina. Mei
wahine. kane. a pau loa.
Kawailepo, 20 24 44
Honuaula, 112 103 215
Kula, 62 65 127
Makawao, 26 32 58
Haliimaile, 31 38 69
Hamakua loa, 173 236 409
Hamakua poko, 38 50 88
Waikapu, 42 47 89
Waiehu, 9 4 13
Napoko, 9 8 17
Waikuli, 10 15 25
Wailuku, 30 134 214 na makaainana.
49 40 89 Na haumana o makou.
661 796 303
661
1457 1457 a pau loa.
NA SOLOMONA.
MOKUNA 2.
1. E kuu keiki, ina e lawe oe i ka'u mau olelo,
A e waiho i ko'u kanawai iloko ou;
2 E huli mai i kou pepeiao i ke akamai,
A e huli kou naau i ka ike;
3 Ina paha e hea aku oe i ka ike,
A e pane aku kou leo i ke akamai;
4 Ina e imi aku oe ia ia me he kala la,
A e huli hoi me he waiwai huna la;
5 Alaila, e ike oe i ka makau ia Iehova,
A e loaa ia oe ka ike i ke Akua.
6 No ka mea, na Iehova mai ke akamai,
Mai kona waha mai ka ike a me ka noiau.
7 Hoomakaukau oia i ke ola no ka poe pono,
He paku no oia no ka poe hele pololei;
8 E malama i na ala o ka hoopono,
E kiai hoi i ka aoao o kona poe haipule.
9 Alaila, e ike oe i ka pololei a me ka hoopono,
A me ke kupono a me na aoao maikai a pau.
10 No ka mea, e komo ke akamai iloko o kou naau,
E ono hoi ka ike i kou uhane.
11 O ke akamai hoi e malama aku,
O ka noiau hoi oe e kiai aku.
12 I hoopakeleia oe mai ka aoao hewa aku,
Mai ke kanaka hoi i wahahee ka olelo.
13 Haalele lakou i ka aoao pololei,
I hele ai hoi ma na ala o ka pouli;
14 Oluolu lakou i ka hana hewa,
Hauoli hoi lakou i ka ino o ka poe aia;
15 O lakou ka i hookekee i ke ala,
Kekee wale hoi ma ko lakou aoao.
16 E hoopakele ia oe i ka wahine ano e,
I ka wahine malihini i hoomalimali ka olelo;
17 Oia ka i haalele i ke alakai o kona wa opiopio,
A hoopoina hoi i ka berita o kona Akua;
18 No ka mea, ke hina nei kona hale i lalo i ka make,
A o kona mau ala hoi ma kahi o ka poe make.
19 O ka poe hele io na la, aole e hoi hou mai,
Aole hoi e hiki aku ka lakou ala i ke ola.
20 I hele oe ma ke ala o ka poe pono,
I malama hoi oe i ka aoao o ka poe pololei.
21 No ka mea, e noho paa ka poe maikai ma ka aina,
A e koe no ka poe pololei malaila.
22 E okiia ana ka poe hewa mai ka aina aku,
E hookuke wale ia hoi ka poe hala.