Ka Lama Hawaii, Volume I, Number 9, 11 ʻApelila 1834 — Page 4

LAMA HAWAII.

No na mea ano e a makou i ike ai.

            He manao makemake keia i na mea maikai, a me na mea ano e, a me na mea kupanaha, a me na ouli, a me na hoailona, a me na mea oiaio, a me na mea i ikeia, a me na mea i ike ole ia. Ua hana mai ke Akua i ka lani, a i ka honua, a i ka moana. A i ona hana ana mai i ke kanaka, a me na mea a pau, alaila, haawi mai la ke Akua i ka naauao oiaio maoli, ma na ainapuniole. A haawi mai la ke Akua i ka noonoo i ka poe naauao alaila, i iho la lakou, he poepoe ka honua. A hoailona iho la lakou i ka poepoe ana. A kau iho la ka Latitu, a me Lonitu, ke i mai nei lakou. Oia no na wa i ana ia, mai ka hikina a i ke komohana. A hoailona hou no lakou i na degere a me na mile, mai ka poaiwaena aku ma ka akau, a hiki i ka welau akau. He kanaiwa no degere. A pela no ma ka hema, he kanaiwa no degere mai ka poaiwaena aku a hiki i ka welau hema. A maopopo kowaho, a me koloko, alaila, noii iho la ka poe noiau i na mea liilii e pono ai na mea nui. He iniha, he kapuai, he iwilei, he anana, he kaulahao, he setadia, oia na mea i maopopo ai ka poepoe honua, a makou e ike nei, a ke hai mai la ka palapala honua, penei, he alanui ka moana no na moku. No ka mea, ua ana lakou i ka la, a i ka mahina, a i ka hoku. Alaila maopopo ka loa, a me ka pokole, ke kiekie a me ka haahaa. Malaila no na moku e holo nei i kela aina i keia aina. Eia no kekahi mau mea kupanaha a'u i ike ai ma ka palapala honua. O na poai elima, a me na kaei elima, ma keia mau poai ea! Manao iho la au i ko ke Akua puunaue ana i na holoholona, a ua puunaue no paha ke Akua i na kanaka. Ma ke kaei anu akau, he ano okoa na kanaka a me na holoholona, ma ia keia. He liilii na kino o na kanaka a me na holoholona. Pela no ke ano oia kaei, a ke Akua i hana ai. Ma ke kaei oluolu akau, he ano okoa na kanaka a me na holoholona ma ia kaei.
            He nui na kino o kekahi mau kanaka, a me kekahi mau holoholona. A o ke ano o na kanaka ma keia kaei he keokeo kekahi, he hapa ke keokeo kekahi, he eleele kekahi, he hapa eleele kekahi, he ulaula kekahi, he nui kekahi kanaka, he liilii kekahi. A pela no na holoholona he nui kekahi, he liilii kekahi, he mea make kekahi, a he mea ai kekahi. A o ke ano o na holoholona ma keia kaei, he ikaika kekahi i ka mahiai, he ae ke kanaka iluna o kekahi, he hele mai kekahi me he kanaka la, he ai kanaka kekahi, he mea lole kekahi, he mea pale aku i ke anu kekahi, he nihoawa kekahi.
            A pela no ia kaei, aole i pau i ka hoakaka ia. A ma ke kaei wela, he ano okoa no hoi kolaila. He eleele kekahi mau kanaka, a he ulaula kekahi. A o na holoholona, he nui na kino o kekahi, he maikai, he liilii kekahi, he mea ai kekahi. A pela no paha ma ke kaei anu hema.
            Ma keia mau kaei a pau. He kupanaha keia mau mea a ke Akua i hana mai ai.
            Ma ke kaei anu akau, aole e hiki mai na kanaka, ma ke kaei oluolu, a me ke kaei wela. A pela no na holoholona. Ina i hele mai lakou, make koke no aole e ola, a pela no ma ke kaei wela, a me ke kaei oluolu. Ina i manao na kanaka e hele ilaila, make no aole e ola. A pela no na holoholona.
            Ma keia mau olelo a'u i ike ai ma ke kulanui, maloko o na palapala a pau. I iho la au; Lokomaikai wale ke Akua, i ka hoike ana mai i na mea a pau. Pela no na misionari i i mai ai, ma ka hale Kulanui e naauao ai, malaila oukou e ike ai i kela mea i keia mea. Ua pau ia.
 

He olelo hooikaika.

            E na'lii a Iehova i koho mai ai. Aole anei i i mai e hana i kona makemake i mau ke alii ana? Pehea ko oukou manao, o ka noho wale iho no anei e like me ka aina pohu ka hinuhinu o ke kai maluna he au olalo?
            Ke hoole aku nei au, aole pela. Eia ka pono a makou i ike ai, o ka naauao. Oia wale no ka mea e malu ai ko kakou noho ana. Ke hai mai nei ka Lama Hawaii i ka pono nui i na aina a pau mai o a o. Ma na aina naauao, ke noii mai nei lakou i na mea i koe, a me na mea i haule, a me na mea i nalo, e ake no lakou e hookuikui i ka manai a uo i ke kaula i lawa, alaila, manao ae la lakou e hoopuai, aole e umi, o nalo auanei na mea kahiko a me na mea hou. E ake no lakou e naauao pu, a e noii pu, a e nowelo pu, a maopopo he manao maikai, alaila, hoolaha nui a puunaue like, i oluolu like ko lakou manao, alaila hakiu like iho la lakou i ka mea a lakou i iini ai e hoolaha nui ae ma na aina a pau mai a a o. A lilo keia i malamalama no ka poe naaupo, alaila, mahalo iho la lakou. E! nui ka lokomaikai o ke Akua ia kakou, i ka haawi wale ana mai ia kakou i keia malamalama, no kakou. A ike kakou i ke ano o na kanaka, a me na holoholona, a me na ia, a me na manu, a me na helehelena o na kino. Ma na ainapuniole, he keokeo kekahi, a he hapa keokeo kekahi, a he eleele kekahi, a he hapa eleele kekahi. A ma na aina ma ka moana Pakifika nei, he ulaula lakou. Oia na mea maikai a lakou i hoolaha mai nei. Oia na mea a makou e ike nei ma ke kulanui o Hawai nei. Oia ka'u e hai aku nei ia oukou e na haku. E eu mai ko oukou mau lemu, e hana paha, i ike kakou i ka pono o ke Akua ma na aina naauao. Mai manao kakou ia kakou iho, aka e imi kakou a loaa ka naauao, alaila pono kakou, pono ka aina, pono ke aupuni, pono ka nohoana, pono na kanaka, pono na keiki a kakou, pono aku ka lakou mau keiki a hiki loaa i ka hopena. Auhea oukou e na kanaka mai Hawaii a Kauai, a me na hoahanau, a me na haumana, a me na kanaka malalo iho o ke alii. Ke ninau aku nei makou ia oukou.—Ke imi nui nei anei oukou i na mea o ke kino. Aole auanei e loaa. Penei oukou e imi ai. Ke i mai la Iesu ma ka Mataio, ma ka mokuna 6, 33 "Aka, e imi e aku oukou mamua i ke aupuni o ke Akua, a me kana pono, a e pau ua mau mea la i ka haawaiia mai ia oukou.'' Auhea oukou e na hoahanau a me na hooikaikai? E hele koke mai oukou, mai lilo oukou i ka manao o na kanaka e, aka e eu mai ko oukou mau lemu, a kai mai ko oukou kapuai, a naue mai oukou a ike i na mea e naauao ai, alaila ua pono.