Ka Lama Hawaii, Volume I, Number 9, 11 April 1834 — Page 2
LAMA HAWAII.
a i kela la i keia la i ka manawa e ai ai kakou i ka ai, a me ka ia, a me ka io, alaila e hoomaopopo kakou i ko ke Akua lokomaikai ia kakou i ka poe hewa. A e aloha mau aku kakou.
NO KA ELEPANI.
He Elepani ko kekahi kanaka ma Kalekuta. I kekahi manawa, hele aku la ua kanaka la i kona wahi i hele ai, a wawahi aku ka Elepani a lilo iho la, a nalowale loa ma na ululaau. Hai ae la ke kahu o ka Elepani i kona Haku, aole i manao he oiaio.
Manao no ke kanaka nana ka Elepani, ua kuai aku ke kahu i ka Elepani, a loaa mai ke kala ia ia. No ia mea kuaiia'ku la ka poe o ua kahu la, a lilo lakou i kauwa, a hoohewaia ke kahu e hana ma ke alanui.
He umikumamalua makahiki i hala, alaila hoounaia'ku la ua kanaka nei e ho paa i na Elepani hihiu ma ka nahelehele, oia a me kekahi poe kanaka pu me ia. Imi lakou i na Elepani, a holo naaupo na Elepani hihiu iloko o ka pa a lakou i hoomakaukau ai. Alaila, nana aku ua kanaka nei i hoohanaia, a manao iho la, ua like kekahi o na Elepani me ka mea i lilo mamua. Nolaila lele koke aku la ia iloko o ka pa e ike i ua Elepani la.
Papa mai la na kanaka a pau ia ia mai komo iloko, o make, no ka mea, aole lakou i manao i ka ua kanaka la. Ikaika loa ka manao o ke kanaka, no ka mea, ua eha loa oia i kona hoohewa wale ia mai mamua, a maopopo no ia ia, oia no ka Elepani i lilo; nolaila, aole ia i makau, a hele koke aku no ia i ua Elepani la. A hiki aku ke kanaka ma kahi kokoke, nana mai ka Elepani ia ia, a ike iho la; ekolu ke kulokuloku ana o kona ihu, i mea e maopopo ai kona aloha, alaila kukuli ilalo a ee ke kanaka maluna ona. Alaila kokua mai ia Elepani ma ka pa ana o na Elepani hihiu, a like no kona laka me ka manawa mamua aku o kona lilo ana. Ekolu ana keiki i loaa pu me ia, na keiki ana i hanau ai mahope mai o kona lilo ana, nolaila ua waiwai loa kona haku i ka lilo ana o kana Elepani, no ka mea ekolu Elepani hou i loaa mai ai i kona lilo ana.
A maopopo no hoi ka pono o keia kahu i hoohanaia, a maopopo ka hewa o ka poe i hoohewa mai ia ia, a aloha nui aku la na kanaka a pau i ua kahu nei. A mihi iho la ka haku, a kii koke iho la i ka poe i hoolilo i kauwa, a haawi aku la i ke kala i kela makahiki i keia makahiki, i mea e oluolu ai ke kahu a me kona poe a pau.
Eia na moku o kohola i ku mai i Lahaina nei i keia mau la.
Malama Inoa o ka moku Ke alii Kahi i noho ai o ka mea nona ka moku Na malama o ka holo ana Ka aila i loaa
Maraki
29 Enterprise Stetson Nanetuketa 15 450
" Alexander Coffin Baker " 15 600
Aperil 1 Kingston Sherman " 17 ½ 250
3 Daniel Webster Pearson Saga Harenora 7 50
4 Beaver Gardner Hudesona 10 270
8 Pacific Chase Nu Bedefoda 19 ½ 1050
" Timoleon Bunker " 27 1300
" Stonington Lawton Nu Ladana 7 30
" Corinthian Stephen Grennel Berisetola 15 1/2 300
" Ann Parry Ray Potesemouta 15 500
" Rodman Lewis Nu Bedefoda 9 400
" Pokahontes Barnard Potesemouta 18 300
10 Aranella Pearson Saga Harenoro 8 200
Thomas Williams Allen Setonitona 9 200
No ka hoa ana i na kupapau.
He ano e ko ko Arabia poe i ka hoolapalapa i ka ai a me ka ia. Ma Aigupita luna nui loa na waihona kupapau, mai ka wa kahiko loa mai no ka hana ana, he mau lua nui malalo ae o ka honua. A makemake kolaila poe i wahi wahie, iho iho lakou ilalo i kekahi lua kupapau a lawe no i kekahi kupapau a waiho ma ka poohiwi a hoi hou aku i ka halelewa. Me ka lipi no i oki ai na lima a me na wawae, alaila, hoomahelehele i ke kino i na apana liilii, a oia ka lakou wahie. No ka wahi ana i na kupapau me na mea kepau hamo i ka wa kahiko ua maikai ke aa ana, nolaila, he wahie maikai no ia.
He wahi olelo ao.
O ka mea manao pinepine ole i ka lani, aole oia e hiki ilaila. O ka mea holo moku me ka manao aole i ke panana, aole oia e hiki i ka wa ana i makemake ai.
He mau Loina pono e malama nui ia mai i na la a pau.
1. Mai hoopanee aku a i ka la apopo i ka mea au e hiki ai ke hana i keia la.
2. Mai hoohana ia hai ina e hiki ia oe ke hana.
3. Mai aie oe, ina aole ia oe ke kumu kuai e hoomanawanui.
4. Mai kuai oe i ka mea au i makemake ole ai no ka uuku o ke kumu kuai.
5. Nui e aku ka waiwai i lilo no ka haaheo mamua o ka ka pololi, a me ka ka makewai a me ko ke anu.
6. Aole o kakou eha no ka ai uuku ana.
7. Aole hana hooluhi ke oluolu kakou malaila.
8. Nui ka eha no ka hopohopo i na mea e hiki mai ana mamua o ka eha no na ino i hiki io mai.
9. Ina huhu oe, mai olelo aku, a pau ka umi i ka heluia; a ina huhu loa, ua oki ka olelo a pau ka haneri i ka heluia.
Mai ahulau.
Nui no ka poe i make i ka mai ahulau ma Havana ma Inia komohana. Ma ka la 18 o Maraki 1833, eono haneri i make i ka la hookahi no. A i ka la 21 o ia malama, eha haneri i make ia la hookahi no. O na kanaka a pau o ia kulanakauhale he 150,000.
O ka hana ma Mesiko.
MA ke kulanakauhale o Mesiko, na ka poe malama kulanakauhale e kii aku me na kaa a hoakoakoa pu i ka poe ona ma kahi hookahi. Aia moe no ka poe ona ma ka po i kela wahi keia wahi e like me na kupapau. A kakahiaka ae, alaila, komo aku ka wawae o na poe ona la i ke komo hao paa loa, a o ka hoomaemae i na alanui o ke kulanakauhale ka hana. Ekolu la hana no ka ona hookahi ana.