Ka Lama Hawaii, Volume I, Number 9, 11 April 1834 — Page 1

HE
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
I naaupo ka uhane, aole ia he maikai. NA SOLOMONA.
Makahiki 1. MAUI LAHAINALUNA APERILA 11, 1834. Helu 9.

HE BUFALO.

NO KA BUFALO.

            Ua like kekahi ano o ka Bufalo me ka bipi.
            Ua nui no nae ka Bufalo, uuku iho ka bipi. Elima kapuai kona kiekie, a elima a me ka hapa kekahi, a ewalu no kapuai ka loa.
            Ua kokoke eleele kona oho, he oho bipi, uaua; a i kona wa elemakule, ohule no ma kauwahi, nolaila ua like ia me ka mea i aahu ia i na apana like ole.
            He ano e kona mau pepeiaohao. Ma ke kumu ua palahalaha, a ua kekee ino; ua like ka welau me ka makau.
            Ua ino ka helehelena o ka Bufalo. He hupo loa. Makemake no ia e haluku maloko o ka lepo, nolaila, ua lepo lua ia me he puaa la.
            He mea huhu ikaika loa ka Bufalo hihiu. Ua hae wale no. Hahai hala ole oia i ka lio, a me ka mea nana ia e hooholo, a make pu no laua ia ia. No kona ikaika nui, e hapai no oia i ka lio ma kona mau pepeiaohao, a kiola ia ia ilalo a paopaoia na iwi. A no kona mama, loaa koke ke kanaka ia ia.
            Aia ma na ululaau ma Inia, a ma Aferika, kahi i ike nui ia ka Bufalo. Ma ka Lae o Guda Hope na Bufalo hihiu huhu loa a he mea makau loa ia Bufalo.
            Aole hele mehameha ka Bufalo; o ka hele pu he nui loa, oia ko lakou makemake. Aole no ka pale aku i ka hewa ko lakou hele pu ana, aka, no ka manao kolohe aku i kanaka, i na holoholona e.
            Ina hele aku kekahi kanaka i ka ululaau i ko lakou wahi, hahai koke mai lakou ia ia me ka huhu a me ka uo nui, a e hahi no lakou ia ia malalo o ko lakou wawae a weluwelu loa. O ka pii i ka laau, oia wale no kahi e pakele ai ke kanaka.
            Ua makemake ka Bufalo i ka wai, a ua akamai i ke au. E hiki no ke au ma na muliwai nui, ma kahi e kahe ikaika ana ka wai O ka ulaula kona mea huhu nui loa, a ina ike oia i ke kanaka ua aahuia i ka ulaula, alaila, hae loa, a pomaikai ke kanaka ke pakele. O kona wawae mua kona mea hakaka nui, a o na pepeiaohao kekahi.
            Ina paa i ka wa uuku, e laka no ia, a e ao i ka hana.
            Ma Italia, a me kekahi aina, e kauo no lakou ma ke auamo, e like me na bipi. Na lakou no e huki i ka oo palau, a me na kaa, e like me na bipi kauo. Ua like ka ikaika o na Bufalo elua, me na bipi eha a eono paha.
            He ili maikai kona, i mea kamaa. Ma ke kahi aina, ua ai ia kona io, aka, ua eleele, a ua haona. Ma Italia, hana lakou i kona waiu i bata, a i waiu paa, aole nae i ono, ua aiia i ka poe hune wale no.
            Okoa loa no ka Bufalo, okoa ka bipi. Hihiu ka Bufalo, a hupo, a ino. Ua kuoo ka bipi, ua laka a oluolu. Ua palahalaha na pepeiaohao o ka Bufalo ma ke kumu, a maluna o ke poo ka puka ana. Puka aku ko ka bipi ma na aoao a ua poepoe. Ua eleele ka io o ka Bufalo, ua uaua, a ua haona, aka o ko ka bipi, ua palupalu, a ua ono loa.
            Nani ka lokomaikai o ke Akua i kanaka i kona haawi ana mai i ka ia ono, a i na holoholona i ono ka io.
            Ina i manao ke Akua e haawi mai i na mea haona wale no, a i na mea awaawa a me na mea ono ole, alaila, poino loa kakou. He mea pono ia kakou ke manao nui i keia mea.