Ka Lama Hawaii, Volume I, Number 5, 14 Malaki 1834 — PULE HOOMAU. [ARTICLE]

PULE HOOMAU.

I keia manawa, he mea nui ma Amerika Huipuia, i ka poe haipule io i ke Akua, ke hookaawale 1 kekahi hebedoma no ka pule wale no, a no ka mihi, a me ka noonoo, a me ka imi i ke ola. Ua maopopo kekahi pono o ia pule. Ina e lohe kekahi i ka olelo i ka la Sabati, loaa paha ia ia kekahi manao, aka, no ka pau koke o ka la Sabati, pau pu no me ka manao. Ina i hookaawale loa kakou i kekahi mau la, a hoolilo loa i ka manao ma na mea nui o ka uhane a me ke ola; alaila paa loa paha ka manao maloko, aole e pau koke. Ua kokua mai ke Akua mamuli o ia pule ma Amerika, ua haawi mai no i kona Uhane hemolele. Nolaila, ua hoaoia ia pule ma Hawaii nei. Ua hana lakou ma Hilo a ma Waimea, a ma Kaawaloa, a ua hana iho nei ma Honolulu. I mai o Nahienaena i kana palapala penei, "Ua loaa ia makou kekahi mau hana pule pinepine aku, i keia mau la iho nei."

No ke kokoke mai o ka ulu moku, aole paha e hiki ke hana ma Lahaina i keia wa. Aia mahope aku paha. No Honolulu mai. Honolulu Maraki 4. Palapala mai kekahi o kolaila poe misionari penei, "Ua olioli kuu naau i ka ike maka ana i ka malamalama hou. Ua oluolu wau i kou Lama; I ko'u manao ea, ina i loihi iki ae kona mau kukuna a hiki i o a i o, ina ua pono. Ua pau iho nei kekahi pule hooloihi maanei; i ko'u manao, he wahi pono iki malaila." No Molokai mai. Palapala mai kekahi m!sionari peneia. Kaluaaha Maraki 10. "Auhea oe e Aneru, Ke aloha aku nei au ia oe no ka Lamn Hawaii. A paiia, alaila, e haawi koke mai oe. Ua olioli kuu naau ia mea; ina he hanen ia'u e haawi i na kanaka, ina, ua oluolu loa wau. Ia mau la, ua nui iki ae ka maikai o kekahi mau mea maanei. Ua nui no ka poe i hele mai i ka pule ma ka Ia Sabati a i ka wa i haia'i ka olelo a ke Akua, hoolohe pono mai no na kanaka. Ua lana ko makou nei manao, ua huli io kekahi poe ma ka mihi i ko lakou hewa. Ake imi nei no hoi kekahi poe i ke ala e hiki aku ai i ke ola."