Ka Lama Hawaii, Volume I, Number 4, 7 March 1834 — Page 1
KA
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
I naaupo ka uhane, aole ia he maikai. NA SOLOMONA.
Makahiki 1. LAHAINALUNA MAUI MARAKI, 7. 1834. Helu 4.
KE AKAMAI O KA ELEPANI
O ke kanaka wale no ka mea i oi aku kona akamai mamua o ka Elepani. Ua nui loa kona aloha i ke kahu, a e malama no ia ia, e like me ka ilio; ua maalea, e like me ka Beava a me ke Keko. Ua ikaika loa oia, ua like paha me na bipi kauo he umi, a no ka makaukau loa o kona ihu i ka lawelawe, e hiki no ia ia na mea pono ole i na holoholona e a pau.
Aole aloha ka Elepani i ke kahu wale no; e aloha no i na makamaka ona a pau: a e hoolohe pono no i ka olelo a ke kahu. Ina i alohaia, maopopo kona aloha aku; aole ia e haalele i kona kahu e imi i ke kahu hou.
Ina i hana ino aku ke kahu ia ia, aole ia e haalele, e hoomanawa nui no me ka hoomauhala ole.
Ina i huhu, aole ia e hana ino mai ka poe i hana maikai aku. Ina i hoolohe aku kekahi ia ia, ike pono no oia i kela kanaka, a ia ia wale no ia e hanaino aku ai.
Aole loa ia e poina i ka lokomaikai, a me ka lokoino o na kanaka, a e aloha mai no i kekahi a huhu i kekahi.
Ua manao maikai aku na holoholona o ka nahelehele i ka Elepani; a pela no na kanaka; no ka mea, aole hana ino mai ka Elepani i kekahi mea ola, ke kolohe oleia'ku.
NO KE ALII O PEGU A ME KONA MAU ELEPANI.
Ma na aina naaupo ma ka Hikina o Asia ua manao nui ia ka Elepani, ua hoomanaia no kekahi
Malama loa ke alii o Pegu i eha Elepani, he Elepani keokeo wale no. Hoonani loa ke alii i ua mau Elepani la, a hanai aku la ia lakou i ka ai i hoomakaukau nui ia me ka inai a me na mea ono; a waiho aku i ka ai maloko o na kiaha gula wale no; malaila na Elepani e ai ai. Haawi aku no ia i na kauwa e lawelawe no lakou; a e holoi aku ia lakou i ka wai i malamaia maloko o na bakeke kala. Ua hoonaniia lakou i na gula pepeiao a me na gula apo, a me na daimana a me na mea maikai. I ka wa i hele aku ai ke alii, hele aku keia mau Elepani imua ona. Aole lakou i hoohanaia, aole loa. I ka wa i hele aku ai ke alii e ike ia lakou ma ko lakou hale, kukuli lakou imua ona, a oia no kekahi i kukuli imua o lakou. Aole i kukuli ia mau Elapani ia hai, i ke alii wale no, no ka mea, pela lakou i aoia aku ai.
Ua kakaikahi na Elepani keokeo, nolaila ua manao nui ia lakou e na lii, a o lakou no ka hala e kaua ai.
Lohe ke alii o Pegu, he mau elepani keokeo ko ke alii o Siama a hoouna aku la ia i mau kanaka e kuai.
Olelo aku la ia i kona kanaka o ka mea a ke alii o Siama e makemake mai ai, oia ka oukou e haawi aku ai me ka hoohalahala ole. Hoole loa ke alii o Siama aole kuai, aole loa, aole i ke kala aole i ke gula, aole i ka mea e. Alaila, huhu ke alii o Pegu no kona hoole ana, a kaua aku la ia ia, me kona poe koa a pau; a pio ke alii o Siama ia ia, a lawe iho la ia i kona aina a me kana mau Elepani keokeo, na mea ana i makemake mua ai.
No ke Kula o Oloalu laua me Oukamahame, ma Maui.
Palapala mai Mr. Polena penei. "Oloalu, Feb. 27, 1834. I keia manawa, he 230 haumana a keu o ko nei kula. He 60 kane, he 60 hoi wahine a keu, a me na kamalii he 109.
Ua kaawale lakou i 8 mau papa. Ma ka Hoikehonua, hookahi papa kane, he 41 lakou; a ma ka Helu kamalii he 19.
Ma ka Helu kamalii, hookahi no papa wahine, 50 paha lakou; a ma ka A hoi he 10 a keu.
O ka poe kamalii, he 109 lakou. Ma ka Hoikehonua, hookahi no papa kaikamahine he 15. Ma ke kakau ana ma ka papa pohaku, a ma ka Helu kamalii, hookahi no papa Keikikane, he 19 lakou. Ma ka heluhelu ana, hookahi papa he 64; he poe keiki kane kahi a he poe kaikamahine kekahi; a ma ka A no hoi he poe kamalii uuku he 11.
Ua ikaika no ko lakou manao ma ka palapala, a kokoke akamai kekahi. Aole hale kula maanei, hoomanawanui lakou me ka hale ole. Manao no na haumana e kukulu i wahi hale kula ma keia hope aku.''
Ina e makemake oe e hoomanao pono, e ao oe e hai mau aku ma ka oiaio.
O ka mea haule i ka lewa, oia ke kanaka; o ka mea kaumaha ka naau malaila, oia ke kanaka haipule; a o ka mea kaena ia ia iho malaila, oia ko ka Diabolo.