Ka Lama Hawaii, Volume I, Number 3, 28 February 1834 — Page 4

LAMA HAWAII.

He Olelo Hooikaika.

            Auhea oukou, e ka poe e lohe mai nei i ka makou hana ma keia kulanakauhale. Ke hai aku nei makou i kekahi a makou i ike ai i ka pono a i ka maikai o keia mau oihana a makou e hana nei. Ke ae aku nei au i ka pono o keia hana a'u i ike ai. Ina paha e noho pono kakou e like me keia palapala a'u i ike ai, a i lohe ai no hoi, ina paha ua pono.
            E hoolohe mai oukou, e ka poe a pau o neia pae aina, i ka hana a kakou i makemake nui ai, a i imi nui ai no hoi, e huli pu mai kakou i ka mea e paa ai keia pono.
            Eia ka pono a keia hana a kakou i ike ai. O ka imi i ka mea maopopo ai ka pono a me ka maikai. I ka wa a makou i noho ai me ka naaupo, aole i hoikeia mai ke ola.
            Ke hai aku nei makou ia oukou, e ka poe e hana mai nei i na hana ino; ke olelo aku nei makou ma keia mau palapala a makou e hai aku nei, e haalele kakou i keia mau hana ino. Ke manao nei makou e noho kakou a pau ma ka noho maikai.
            Aloha wale kakou a pau ke haalele aku i ka mea pono i haawiia mai ai no ko kakou mau uhane. A pehea la kakou e hoopakele ia mai ai, ke paa i ko kakou mau lima ka hana ino no ka make?
            Ke ike nei makou i ka pono o keia mau oihana, maloko o keia Kulanui. Ua ana ia ka loa, ka poko, ka huina, ka loihi, ka laula, na poo a me ka oi. Aole anei e pono keia mau oihana ke noho kakou malaila? Aole kakou i ike i ke ano, mai ko kakou poe mai; aole. Eia ka wa pono i ikeia mai; i keia wa hou i ikeia ka pono. A pehea la kakou e hana nei me ka uhauha, a me ka hana ino?
            Eia makou, ke hana nei i ka mea a kakou i ike ai. Ke manao nei makou e hoomahui like kakou i keia pono, a paa ia kakou keia pono, alaila, lilo kakou i poe ike.
            Auhea oukou, e ka poe e paa nei ma keia palapala; e hoohikilele mai kakou i keia mea a paa, a e hoomahui mai kakou i keia mau mea e pono ai.
 

No ka pono o ke Kulanui.

            Ina aole i kukulu ia ka hale kulanui ma kekahi aina, he kakaikahi ka poe naauao ma ia aina. Eia na mea i maopopo loa'i ka pono. Ma ka hale kulanui i ao ai ka poe holo moku, a me ka poe kamana, a me ka poe amara, a me ka poe kahuna lapaau, a me ka poe kahuna pule. Oia hoi ka poe pomaikai ai kela aina naaupo, keia aina naaupo.
            Na ka poe kahuna pule e hai mai ka pono o ke kino, a me ke ola o ka uhane. Na lakou no e hoike mai i ka inoa o Iehova ke Akua maoli, a me Iesu ke kala hala. Na lakou no e ao mai i ka palapala, a me na mea a pau e pono ai keia noho ana a me kela noho ana aku i ke aupuni o Iesu. Oia na mea i manao ia'i he pono ke hookumu ia ka hale kulanui ma kela aina ma keia aina, aia nae i ke kokua ia e ke Akua, alaila, pomaikai io no.
 

No ka hewa mua, a me ka loaa ana ka pono.

            Ua hana mai ke Akua i ke kanaka he maikai, he pono, ma ko ke Akua ano kona maikai a hemolele. Aka, ua hewa oia ma kona hookuli ana. Heaha kona mea i hookuli ai? Aole nana, na kana wahine no i hoowalewale mai ia ia. No laila i hewa ai laua. Mahea la i komo mai ai ka hewa i ke ao nei? Ma owai la la? Ma ua kanaka hookahi la anei? Ae; nona mai ka hewa. Eia ka hewa mua: O ke kuko o ka naau i ka mea i hookapu ia. Nolaila, komo mai ka hewa iloko o ke ao nei he nui loa. A pepehi kanaka ko laua hua mua, nolaila, ua piha loa ka honua i ka hewa.
            Pehea kakou? E imi kakou i Akua no kakou. Owai auanei? Eia; ua lohe au; ua haiia mai e ka poe kaula kahiko ke Akua. Owai ke Akua? O Iehova, o Iesu Kristo, o ka Uhane Hemolele. Pehea ia e akua ai no kakou? Eia, ua lohe au; ua haiia mai e na misionari. E pule i ke Akua me ka oiaio; e mihi me ke ku pono o ka manao i ke Akua. Mai hoi hope ka manao; mai kanalua, mai kuihe, mai molowa, mai palaka; ina pela kakou e like me ka palapala Hemolele, "O ka mea e hoomanawanui a hiki i ka hopena, e ola ia." Mat. 10—22.
 

No ka mana o ke Akua.

            Eia kona mana, i ka hana ana i ka lani a me ka honua, i ka hana ana i ka mea o ka lani, o ka la a me ka mahina, o ka hoku a me ke ao; i ka hana ana i na mea a pau o ka honua, i na laau a pau, i ka wai, i ka ai, i ke kapa, i ka holoholona, i ke kanaka, i ke kai a me ka ia. No kona mana, ua malama ia mai kakou a hiki ia nei. Nolaila, e huli ae kakou ma kona mana. Malaila kakou e pakele ai i ka inaina o ke Akua e kau mai nei.
 

No kekahi aoao kahiko.

            Eia kekahi mea kupanaha a makou; o ke kukini. Ina i oleloia he mau kukini; apopo, holo; alaila, hele mai la kanaka he nui loa me ka waiwai, a pili a mau iho la, alaila, hele aku la ua mau kanaka la elua a hiki i ka Pahuku. Kukini mai la ua mau kanaka la, a hopu i ka pahu kekahi, alaila, eo ae la nana. Olioli iho la ka poe i ko. Aka, o ka poe i eo, mihi iho la lakou i ke eo ana. Ina e olelo ke Konohiki i na makaainana, apopo kakou koele a pau, a ahiahi iho, hoike i ka waiwai: Alaila, hana iho la lakou i ua mau mea nei a ke Konohiki i olelo mai ai, o ka puaa, o ka ilio, o ke kapa, o ke olona, o ka hulu, o ka upena, o kela mea keia mea a pau. Oia ka waiwai, a makou i hoike ai i ka wa kahiko.