Ka Lama Hawaii, Volume I, Number 1, 14 February 1834 — KE KUMU O KA NAAUPO [ARTICLE]

KE KUMU O KA NAAUPO

O ka hewa ke kumu o ka naaupo. I ka wa i hana mua ia'i ke kanaka ma ka honua nei, he ike kona, aole naaupo iki. Pololei ka manao, hikiwawe ka

ike i kela mea keia mea. A komo ka hewa iloko o ka naau, powehiwehi iho la ka ike aku i ka oiaio. Ua like no ka hewa me ka pale e uhi ana i ka maka: a pouli iho la ka naau i ka hewa, lilo iho la kanaka i poe naaupo. Oia ke ano maoli o na kanaka a pau loa. Aka, no ka ikaika o kekahi poe ma ka imi naauao, ua loaa no. Ike ae la kahi poe i kela mea keia mea e pono ai ka noho ana ma keia ao, a me ka mea e pono ai ke kino. Aka, o na mea e pono ai ka uhane, aole i loaa. Like me ka olelo a kekahi kaula. "Ua lapuwale ko'u poe kanaka, aole lakou i ike mai ia'u, aole o lakeu noonho, ua akamai lakou i ka hana hewa; aka, i ka hana pono, o lakou ike iki." (Ier. 4-22.) Minamina iho la o Iehova i ka lilo ana o na kanaka i ka hewa, a imi iho la oia i na mea e pono ai. O kana olelo, he mea nui ia e hoonaauao ai kanaka ma na mea o ka uhane, aole hoi mea e ae e like me ia: a o ka poe e huli mau malaila me ka naau akahai, ua loaa no. A o ka poe hooikaika ma ka ike i na mea o keia ao wale no, a haalele i ka huli i ka ke Akua olelo, e loaa no auanei. Aka, ma na mea o ka uhane, e noho mau no ma ka naaupo, ma ka lapuwale, ma ka ike ole hoi i na mea e pono nui ai kanaka i keia ao a i kela ao aku no hoi. Nolaila o ka hoi hou aku me ke Akua, o ka naau hou, oia ka mea e pono ai. Alaila, e hiki no ke loaa ka ike i na mea o keia ao a me na mea e pili ana i ka uhane.