Ka Lama Hawaii, Volume I, Number 1, 14 Pepeluali 1834 — Page 4
LAMA HAWAII.
He hapa o ke Mele no ka make ana o Keeaumoku o ke Alii o Maui.
Ue, ue, ua make kuu Alii,
Ua make kuu haku a kuu hoa,
Kuu hoa i ka wa o ka wi,
Kuu hoa i paa ka aina,
Kuu hoa i kuu ilihune,
Kuu hoa i ka ua a ka makani,
Kuu hoa i ka wela o ka la,
Kuu hoa i ke anu o ka mauna,
Kuu hoa i ka ino, Kuu hoa i ka malie,
Kuu hoa i na kai ewalu,
Ue, ue, ua hala kuu hoa,
Aole e hoi hou mai.
NO KA PONO O KA HOIKEHONUA
Eia kona pono. Ua hoike mai la ia i ke ano o ka honua, o kona poepoe ana, me kona nui a me kona kaa mau ana, a me na mea maluna iho.
Ma ka olelo honua, ua hai mai la ia i na aina nui elua, o ka Aina puniole hikina a me ka Aina puniole komohana, a me ka laua kau ana ma ka aoao o ka poepoe honua, i ko laua wahi a me ka pili ana aku i ka welau akau. Nolaila, ua nui loa ka hau, aole pono ke holo, aole hoi ke hele aku.
Ua hai mai la ia i ko laua ano, i ka nui a me ka loa, i ka laula a me kahi haiki i ko laua puali, a me na kowa, i na kaikuono a me na lae i ko lakou wahi, i na muliwai a me na moanawai, i ko lakou loa a me ko lakou nui. Hai mai la ia he uuku keia moana mai Hawaii a Kauai, ua nui aku ua moanawai la. Hai mai no hoi ia i na kuahiwi, i ko lakou wahi a me ko lakou moe ana, i ka loa a me ko lakou kiekie a me ko lakou mau inoa.
Hai mai la ia i na holoholona pono ke noho ma ke kaei anu akau; ua liilii na kino; i ka poe holohona i ke kaei oluolu akau, ua nui na kino, ua liilii no hoi kekahi, he iliohae kekahi.
Aka, ma ke kaei wela ua nui loa na kino o na holoholona, ua hae loa. He nui na mea kolo e make ai ke kanaka ke pa mai ko lakou niho me ka awahia nui a make koke. O na mea liilii e hele ana ma ke kaei wela, ua eha loa ko lakou niho ke nahu mai; ma keia kaei wale no lakou e noho ai, aole pono ma kahi anu o make lakou. Oia ka pono ana i hai mai ai.
Ma ka palapala honua, ua hai mai la ia i na aupuni a pau ma ka honua nei, i ko lakou nui a me ka loa a me ka laula, i ko lakou liilii a me ko lakou wahi, i ko lakou mau inoa a me ko lakou mau ano, i kahi kanaka a me kahi kanaka ole, i ko lakou kulanahale a me ko lakou pono, i ko lakou naauao a me ko lakou naaupo, i ko lakou ike a me ko lakou ike ole, i ko lakou akamai a me ka hawawa, i ko lakou ikaika a me ka nawaliwali, i na me maikai a me na mea inoino, i ka lakou mea ai a me ka noho ana, i ko lakou mau kapa a me ke kapa ole, i ka uaua a me ka nahaehae, i ke ano o na kanaka i ko lakou kaawale ana, ua eleele kekahi, ua ulaula, ua keokeo.
Ua hihiu loa kekahi poe e like me na holoholona, ua noho mauka lilo. Hai mai la ia i ka noho ana o na kanaka, i ka lakou mea e hana'i a e manao ai hoi. Ma ke kaei oluolu, ua keokeo, a ua akamai, ua ike i na hana, ua ike i ka palapala, ua naauao, ua loaa ia lakou kela mea keia mea e pono ai ke kino.
Ma ka palapala honua, hai mai la ia i ka poe malalo iho o ke kaei wela, ua eleele lakou, he hapa ka eleele o kekahi. Ua naaupo na kanaka no ka ike ole i ke Akua. Aole a lakou palapala. Hoomana lakou i na mea i ike maka ia. Nui ko lakou he wa. Hai mai la ia i na mea a pau a lakou e ai ai, o ka mea hiki ole i kahi poe ke ai, ua pono ia i kekahi poe o ua kaei wela la. Ua oi aku hoi ka apiki o ka lakou mea i manao nui ai o ke kino, o ka lakou hoi ia e hana ino ai. Oia kekahi pono o ka Hoikehonua.
He wahi olelo a ke Akua.
O Iehova ko kakou Akua, hookahi no Iehova.
Eia no kakou maloko ono, ke ola nei kakou a ke hele hoi.
O ka mea nana i hana ka pepeiao,
Aole anei oia e hoolohe mai?
O ka mea nana e hooponopono ka maka,
Aole anei oia e nana mai?
E Iehova, aole e hiki i ka pouli ke hoonalo ia oe.
Ua hoomalamalama mai ka po me he ao la,
Me he pouli la, pela ka malamalama.
He aloha ke Akua, a o ka mea e noho ana iloko o ke aloha, ke noho nei oia iloko o ke Akua, a o ke Akua no hoi iloko ona.
I hemolele oukou, i oluolu hoi, i hookahi ko oukou manao, e noho oukou me ke kuikahi: a o ke Akua nona ke aloha a me ke kuikahi e noho pu me oukou.
E makau aku ia Iehova a e hoonani aku ia ia.
KA WAIWAI NA KRISTO.—He momi maikai o Kristo, o ka mea loaa ia ia, aole loa oia e ilihune; a o ka mea nele ia mea, aole loa oia e waiwai. Manomano ka waiwai na Iesu, aole e pau i ka heluia: he maikai hoi, aole mea like he nui hoi, aole ana ia mai.
NO KA HUHU—He hehena pokole ka huhu. O ke aloha ka mea e pau ai.