Ka Lanakila, Volume I, Number 2, 8 July 1909 — KA UKU HOOLIMALIMA MA ENELANI. [ARTICLE]

KA UKU HOOLIMALIMA MA ENELANI.

O kekahi o na mea ano e mai kahiko loa mai a hiki no i keia manawa e hanaia nei, oia no ke ano o ka uku ana o ke*cahi poe i noho hoolimalima aku ma na aina i kuleanaia e na Moi o Enelani. Ma ka hoike a ka nupepa "Mea Hou o Piladelepia," ua ikeia' o ke kanaka e noho hoolimalima nei ma kekahi o na Aina mahi ma Pamehama Roiala (Farmham Royal) e uku ana oia i kona uku hoolimalima ma ka hookomo ana i ka mikilima ma ka lima akau, a e paa ae hoi malalo o ua lima 'la o ka Moi i ka wa a ka Moi e paa ana i ka pahikaua o ke Aupuni ma kona la e poniia ai. O keia wale ae la no ka uku hoolimalima. O ke kanaka hoi nana e paa nei ka hoolimalima o ka Aina ma Alebare (Aylesbury) e uku aku oia i ka Moi i ekolu puhi ma ka wa hooilo, ekolu nene eleele ma ke kau mehana, a i hookahi pena mauu maloo i mea pela moe no ka Moi i ka wa e hiki aku ai ilaila. O ka uku hoolimalima o ka aina ma Adinegetona (Addington) he hookahi paa-kepa, hookahi upa-makani, hookahi popohau ma ke kau wela a he pua roke ma ka la Karisimaka. O ka uku hoolimalima Loi o ka aina ma Kopelana (Coperland) oia no ka paa ana ma ka auwae o ka Moi i kona wa e au ai ma ke kowa mawaena o Dova ame Witesana. ❖ ❖