Ke Koo o Hawaii, Volume I, Number 5, 10 October 1883 — Page 7

ona mea ai hou na'u, a ina aole au e halawai me ke, kahi moku, alaila e kipa au iloko o Noumea, he awa ma ka mokupuni o Nu Kaledonia. Ua hooko pono au i keia mau mea, a hiki i kahi a'u i manao ai e ike aku ana la ia Walpool, he mokupuni e kokoke ana ia Nu Kaledonia. Ilaila loaa ia iho la au i kekahi kikiao makani ikaika ma ka akau ma, a ua mau ia makani no eha la; a ua lawe ia au e ke au a hala  ma ka Hema komohana o Nu Kaledonia, i ka latitu 24 hema.
                Poakahi Dek. 25—Ka la Karisitimasa keia! He maikai ka pa ana a ke ahe makani ma keia la. O ko'u paina i keia la, he wahi apana bipi me ka alakohola, a he wahi kulu wai. Hora 4 p. m. ikeia ka mokupuni o Mathew, he 15 mile ma ko'u komohana. O keia mokupuni me ka mokupuni o Fearn, he mau pukoa pohaku wale no; aohe wahi launahele oluna o laua. He 400 paha kapuai ke kiekie o Fearn maluna o ka ilikai; a o Mathew, he koena na ka pele he 350 kapuai kona kiekie.
                Poalua, Dek. 26—He aheahe maikai ka makani, kalae ka lewa, a malie na ale. Ua manao au e komo mawaena o na mokupuni a i elua, aka i ko'u kokoke pono ana aku, ike aku la au aohe wahi kaawale e ae, oiai he mau lae ako'ako'a ke au ana i ke kai mawaena o na mokupuni a i elua. Nolaila, ua hoopii hou ko'u ihu no ke kaalo ana ma ka aoao akau, a ua haule nui ka manawa ma ia hana ana.
                Mai keia kakahiaka a ahiahi, he maikai wale no ka haakai a kuu wahi ipo aumoana. I ka aneane ana o ka la e napoo, ua ike aku la au he lae e moe ana i ke kai, a ua ike ole ia aku la ina he aina a aina ole paha ma kela aoao. Ua manao wale iho no au, ialala no la i ka lae pau mai ka aina, nolaila ua hoomau no au i ka holo ana, me ka manao ke kaa ua ma ka aoao mao, alaila hala ka aina mahope o'u. I ka hora 8 o ia po, ua aneane aku la au e kaalo ma kela aoao, a e holo palanehe ana me ka nanea; ia hoopuiwa ia au e ka owe o ka nalu. Aole nae e hiki ia'u ke hoomaopopo i kahi a ka nalu e pa nei, ina aia mamua o'u, a mahope paha, a i ole ma  ko'u mau aoao. Ku ae la au iluna a nana aku la ma o a maanei, aole o'u ike nalu. Nolaila, ua manao iho la au, malia no uka o ka aina keia nalu, a ua hoomau aku la no au i ka holo ana.
                Ia'u e hoomau ana imua me ka mama o ka holo ana, aia hoi, ua ike koke aku la au i ka  nalu e poi ana mamua pono o'u, a ua kokoke loa. Ua poi keia nalu mai ka  aina  mai a he kawa loa hoi mawaho o'u. No ka hikiwawe loa o ka opuu ana mai o keia nalu mamua o'u, ua hoopiha ia au me ke kahaha, a me ka hikilelel nui. Aohe o'u manawa e hookaulua iho ai, ua kokoke loa au i kahi o na nalu. O ko'u manao mua i kela manawa, oia no ka hoohuli hou ana e hoopii i ka makani, aka, hoomaopopo loa iho la au, ina au e hana ana pela, alaila e poipu ia ana au e ka nalu a poino, oiai, ua kokoke loa au, a hele a huli ka ihu, kau au iluna o kunana nalu.
                Nolaila, o ka mea wale no a'u i noonoo ae ai ia manawa, oia no ka hoomau ana aku i ka holo imua, a malia na ka nalu e hapai a lana aku ma kela aoao o na pukoa akoakoa. Ua ko io no ka'u mea i manao ai, no ka mea na ka opuu nalu au i hapai ae a haule ana ma kekahi aoao o ua pae moe akoakoa nei, a kaa aku la au i kahi malino. He ewalu kapuai ka hohonu o keia wahi. Hookuu koke iho la au i kuu wahi heleuma, me ka manao mihi, a me ka hauoli no hoi no ko'u pakele ana mai keia poino, oiai, ina paha i kau kuu wahi moku iluna o ke aa, ina la paha ua loohia au i ka poino, a popilikia maua iluna o kela mokupuni o ka waena moana.
                Mamua o kuu lohe ana i ka owe o ka nalu, ua lele mai la he malolo a kau iluna o ka oneki o kuu wahi ipo, a paa no hoi ia'u, aka, ia'u i hoao ai e hookomo aku iloko o kahi waiho panana, ua palemo hou aku la, a lilo hou i ke kai. Ua minamina nui au no ka lilo ana o keia ia, oiai ua manao au he wahi mana ai hooikaika kino ia ia'u.
                Poalima, Dek. 29—Ua hiamoe maikai au mai ka po nei mai, a i ka hora 2 paha o ka wanaao, ua hoopuiwaia ae la au mailoko ae o kekahi hiamoe nui, mamuli o ka hookuikui o kuu wahi waapa me na pohaku olalo ae. I ko'u nana ana, eia ka ua kaimake, a ua maloo ke kai, a ke kawewe mau nei olalo me na pohaku. Nolaila, ua pahupahu au i kuu wahi waapa me ka hoe a kaawale i kahi kai hohonu, a kuu iho la i ka heleuma.
                He po mahina konane keia, a he lai malie na mea a pau, koe no hoi ka owe a ka nalu. Ua nana au mao a maanei, a ua ike iho la aohe wahi o ka pilikia a nolaila, ua hoomaka hou au e hiamoe; a i puoho i ka malamalama o ka la. Ua huki au i kuu heleuma, a kau ae la ka pea, a holo aku la au me ka haalele ana aku i na kunana-nalu i aneane ai e lilo i home no'u a me kuu wahi waapa. Ua hahai aku la au i ka lae a hoea au i ke kai hohonu, a kaa au malalo o ka lulu o ka aina ia po, a hoolana hou iho la.
[E HOOMAUIA AKU ANA.]

Ke Kaa Alii Kahiko.

                O ke kaa kahiko loa o ke ao nei i oleloia iloko o na moolelo, oia no ke kaa o ke keiki alii ke Duke o Monetepeneria. He hookahi haneri makahiki i hala ae nei, ma ka la i poni ia mai nei ka Emepera o Rusia, ua puka hou ae ua Keiki Alii nei maluna o ua kaa alii kahiko la iloko o ia la. He nui kahaha o na mea a pau i akoakoa ae ma ia la, i ko  lakou ike hou ana i ua kaa nani nei he mau haneri makahiki i hala ae, akahi no a ike hou ia.
                O keia kaa, ua hoopuni ia konamau kae owaho me ke aniani, a o konau mau kaola liilii hoi ua hana ia me ke dala a me ke gula. Aia ma kahi a ke kahu lio he wahi pahu mea kani, a e kani mau ana kona mau leo pila me ka nahenahe i ka wa e holo ai ua kaa nei. I ka wa i mare ai ka Moi Alaponoso o Sepania, oia ka ike mua loa ia ana o ua kaa eni ma ke kahakai hema o Europa.
                A ua olelo wale ia ae ka manao o ua keiki alii nei, e hooili aku oia i kana mau keiki, i hala hou ai keia haneri makahiki iloko o na Hoahanau Ekolu.