Ke Koo o Hawaii, Volume I, Number 5, 10 ʻOkakopa 1883 — Page 12

Ka Puali Kaua Lio Kamahao.

                Ua hoike aekahi mea kakau nupepa o Ladana e noho la ma Mosekao, i kekahi mau mea ana i ike ai, a i kahaha nui ai oiai oia malaila, a penei kana hoike ana:
                "Ua ike iho nei au i ke kamahao nui o ke akamai hololio o kekahi poe o keia aina. Aia ma ke kahua hoomoana o Petroffsky, imua hoi o ka mnkaikai ana o ke Alii ke Duke Nui Nikolai, a me kekahi mau aliikoa nui o kekahi mau aupuni okoa; ua paikau ae ka Pualikoa Lio Kosaka, me ka hoikeike ana i kekohi mau hana akamai a kahaha nui maluna o ko lakou mau lio nunui a nani no hoi. Ma ka lakou mau hana, ua haule hope loa iloko o ka ole na hana akamai a ka poe keaka lio.
                O ka mua, ua kuu ia ka puali holookoa me ka holo nui launa ole, a kaalo ae la imua o ke alo o ke Duke a me ka lehulehu. E kuku ana kekahi poe a pololei iluna o na noho me ka luli ole, o  kahi poe ilalo na poo, a iluna na wawae, o kahi poe, ua lele aku la ilalo o ka honua, a lele hou mai no a kau iluna o na noho, o kahi poe ua lele aku a kau ma ke poo o na lio, a lalau iho la i na pohaku ilalo o ka honua, a hoi hou mai iluna o na noho. Iloko o keia manawa ee holonui nei na lio, me ka uhau ana i na pahi ma o a maanei, e ki ana i na pu panapana, a e hoolei ana i na pu kaupoohiwi i ka lewa a hopu hou ae la, a e hooho ana me na leo kalakala, me ka weli, me he la aia lakou iloko o ka hounaele weliweli o ka hookahe koko.
                Iloko o ka manawa hookahi, mamuli o ka hoailona i hoailona i hoike ia, ua pau ae la keia mau pioo ana, a mahele ia ae lakou iloko o elua puali. Holo aku la kekahi mahele ma kahi mamao, a noho iho la kekahi mahele. Ia manawa, ua moe iho la na lio o ka poe i noho mahope nei ilalo, a moe iho la no hoi na koa ma ko lakou mau aoao, e like me na tika e kali ana no kana mea i manao ai.
                Ia wa no hoi i huli mai ai kekahi mahele a holo paukiki mai la me ka mama imua o keia poe, a i ke kokoke loa ana, he manawa pokole loa, e like me ka imo ana a ka maka, ua ku ae la na lio a pau iluna me ka eleu, e kau ana ko lakou mau poo iluna, a e pi ana ko lakou mau ihu me he la ua hae no ka hooko ana i ke kauoha a ko lakou mau haku. He lele ana na kela a me keia a kau ana iluna o na noho, a hui aku la iloko o ka huikau ana, me he hoikeike ana i na hana e hookoia ai ina he kaua io mawaena o lakou a me na enemi.
                I ka pau ana o na hana hoikeike, ua hui hou ae la lakou me ka maikai a me ka nani, a i ka nana ana aku; ua ku i ka hanohano nui ko lakou kulana, a ua mahalo piha na mea a pau. I ko lakou kaalo ana ae ma ko makou alo, ua himeni ae lakou he mele kaulana no ka oihana koa, me na helehelena hauoli a lokahi maluna o lakou a pau.

                Pale hoi ka ula wini a me ka ula weo o na wanaao a me na liu la o keia mau la; me he la paha ua ka nome ana a ke ahi pele ma kekahi mau wahi o ka honua.

Leta Mai Europa Mai.

ROYAL MILITARY ACADEMY,
TURIN, AUG. 4, 1883.
                Hookahi no mea hou o keia mau la o ke kulanakauhale o Casamicciola ma kahi mokupuni o Ischia, me ke alo aku o Napela, ua hiolo na kauhale i ke olai a he 80,000 a oi ka nui o na ola i poino, a ua like me ka poino ana o ke kulanakauhale o Pompei i kela au kahiko loa.
                I keia hoomaka ana'ku o ka makou kula, he elua keiki Alii e komo mai ana, ke keiki a ka Moi o Sepania i pau iho nei, Prince Amedes me ke keiki a ka Khideva o Aikupita Ismale Pasha. E noho like ana ia mau keiki ma ka papa hookahi me Booth.
                Ia'u ma ka huakai o Napela, a ma kahi wahi kaona, ua hele au e makaikai i kahi Kula Hanai Agriculture i like me Keoneula, ua ike au i na keiki i ka paeli, mahi waina, kulina, laau hua ai, a pela aku. Ma ka hoonaauao ana ua hoonaauaoia ma na buke pili i na laau kanu a mahele Chemistry a me na mea a pau e pili ana i ka oihana mahiai, a hoomake ana i ka mu hoopoino i na mea kanu. Ua mahalo au i ke ano, a ina pela o Keoneula, maikai loa, aka hoi ke ike aku la au ke hapai ae la o Kipikona, a ua mahalo ko ke Alii naau.
                O keia Haleao a'u e noho nei, ke puka pono mai ia nei aku, ka pau no ia o na mea hoonaauao hohonu, o ka hoopili wale aku no ko na Kula maluna ae me ka hoolala ana i na oihana, a iloko aku hoi o na Regimana a me na oihana e hoohana ai ka ike Artillery me Engineery, ilaila e ike ia ai ke akamai o ke Aliikoa opio, a iluna aku o ua kahua kaua hookae koko ka wiwo ole me ka genious.
                E holo ana makou he 40 la ma ke kahua hoohana o na ike koa ma St. Mawritjio.
                O ke kaua o Europa ua kokoke, me he ala aole e hala pono 3 a 4 makahiki mai keia wa aku, e ike ia no ke kaua mawaena o Farani, Geremania, Auseturia, me Italia. I na makahiki a pau ke hoomahuahua mau ia nei na koa me na regimana o Italia nei.
                Ua hikii ia o Geremania, Auseturia, me Italia, a ku mai o Farani ma ka aoao kue. Aka o ke kuhikuhipuuone o Italia mahope iho o Cavour, o Signor Depretis aia o Italia malalo o kona pono no ke kuokoa mau me ka hanohano. Me ke akamai no keia hoohui ana ekolu mana, a me he ala mahope aku e ike ia ai ka oiaio maoli a me ke akamai o Signor Depretis, ke Kuhina piha maalea. He makemake loa au e komo pu i ke kaua ma ke ano alii koa, a ilaila hoi e ike pono ia ai o Hawaii i kou ano ma ke kahua kaua. R. W. WILCOX.

                I ke ku ana mai o ka mokuahi Kulanakauhale o Nu Ioka mai Kapalakiko mai i kela pule aku nei, ua lohe ia mai no ka make  ana o Kauka Trask o luna o ua moku la, mawaena o Kapalakiko a me Hawaii nei, a ua kanu ia kona kino iloko o ka hohonu. O Hanele Makalu opio, keiki a Kauka Makalu o keia kulanakauhale, ua kau aku oia no keia huakai a ua mokuahi la i Kikane a huli hoi no maluna mai ona me kekahi Kauka hou no luna o ua moku la. O ke Kauka opiopio loa keia i hookohu ia no kekahi kulana kiekie e like me keia.