Ke Koo o Hawaii, Volume I, Number 4, 26 September 1883 — Page 5
i ka lakou huakai makaikai e hele kamoe ana i ke komohana o ka waoakua, me ko lakou manao, o ke awakea o ia la, e hiki ai lakou i na palena o keia waoakua no ka mokuaina o Lusiana.
E hele ana ka huakai i ke komohana malalo o ke alakai a na keiki i maa ma ka hele kuahiwi a me na wahi alanui ole, a i ka hiki ana mai i ka auwina la o ua la nei, hiki hou mai la no lakou i kahi mua no a lakou i haalele iho ai i ke kakahiaka o ua la ala. O ke kula waoakua i keia manawa, ua uhi ia kona ilihonua e ka lehu ahi, a ua nalowale hoi na ala ololi i hele mua ia e na kanaka hahai holoholona kuahiwi ma keia kula. Ma ka elima ae o ka la, ua hele hou no ka huakai me ka imi ana i kahi e hiki ai ke puka iwaho o ka waoakua; a hiki i ka wa i napoo ai o ka la, aia hoi, he hookahi no wahi mile ko lakou kaawale mai kahi mua a lakou i haalele ai i ke ahiahi mua a me ka elua.
O ka mea hiki ke olelo ia no keia poe, oia hoi, ua nalowale lakou iloko o ka waoakua o na holoholona hihiu. Aohe wahi hiki ia lakou ke puka waho, oiai aohe alanui; o ke akamai o na keiki a Ponedeseta i olelo ai, he mau kanaka hele kuahiwi laua, a aohe wahi pohihihi i ko laua mau maka, eia laua ke ku nei me ka hoaa; a o na mea hoi a pau, kau mai la ka makau ia lakou no ka pau e o na lako ai ke puka ole lakou iwaho o keia palahalaha oneanea iloko o keia mau la pokole. Ua lohe ia ka leo uwo o na holoholona hihiu i ke aumoe ma na wahi mamao iki aku. Ua hele naku lakou nei me ka hoomau imua no i ka hele ana, aka, aole nae he mau hoailona e hoike mai ana no kou ike aku i kekahi kauhale. E nana oe ma o a maanei o ka aina a ike no oe he kula wale iho no, me kou ike ole aku i kona mau welau palena aina.
Ma ke ahiahi o ia la, akoakoa ae la lakou nei i kahi hookahi, a e kuka ana lakou no ka lakou mau mea e hana ai ma ka la apopo, oia hoi, e hele lakou i ka akau ma ke kowa o na kuahiwi, a hiki i ka wa e hui ai a hui ole paha me kekahi mea e ae, a make paha ma ka waoakua.
Ma ke kakahiaka nui loa o ke ono o ka la, aia hoi i ka wa a ka la e puka ae ana mai ke kuahiwi ae, a poha mai kona malamalama ma ka ilihonua, aia hoi iloko o ia sekona, ua hoopuiwa koke ia ae la o Ponedeseta ma a me kona mau hoahele i ko lakou ike ana aku i kekahi kanaka e kau ana maluna o ka lio ma kahi mamao, he ekolu hapaha mile mai ia lakou aku.
O Ponedeseta, laulau ae la oia i kana ohenana, a kau pono aku la i ke kanaka kau lio maluna o ke ahua lepo, a ike pono aku la oia i na helehelena o ke kanaka opio e kau ana maluna o ka lio ulaula, nona hoi ka papale kaleponi nui e kau ana ma kona poo, ua hoopii ia mai o mua iluna; he ilikalapu uliuli ke paa ana ma kona mau wawawae, me kono noho lio paniolo makuu nui oia e noho ana, me kana kaulaili hoohei hoi e kuuwelu ana ma kona aoao, a e aahu ana oia i kekahi koloka hulu holoholona aeae ma kona kua, a e nana kapakahi mai ana oia i ka hale lole keokeo e ku nei i ka waoakua.
[E HOOMAUIA AKU ANA.]
Poino Weliweli.
Ma na lono hope loa i loaa mai ia makou mai na aina e mai, ua hoike ia mai ka poino nui i kau aku maluna o na lahui kanaka e noho ana ma na mokupuni o Iava, Sumatera, a me kahi mau mokupuni e ae o Inia Hikina.
O ka aoao akau o ka mokupuni o Iava, he ululaau nani, i piha me na kumulaau nunui a kiekie; a ua paapu hoi me na nahelehele o ka waokele. Aka, iloko o ka manawa pokole, ua uu mai la ke ahi pele mailoko mai o na lua pele, a lilo ae la ia wahi holookoa i honua aa uliuli; a elike me ka mau o ka pii ana o ka ikaika o ka halukuluku o ka pele, pela no i pii mai ai ke ano e o ka moana.
Aia ma kekahi huli o ka aina, e ku ana he wahi kulanakauhale no ka poe lawaia, a e noho ana ko laila poe me ka moeuhane ole no ka pilikia; aka, iloko o ke sekona, ua pii mai la he ekolu mau ale nunui me ka ikaika a uhi iho la i na kauhale a me na mea a pau, a i ka hoi hou ana aku i ka moana, ua lawe ia aku la na mea a pau; ulaa ia na laau nunui a helelei na lae aa, a nalo aku la na mea a pau i ka moana.
O na apana aina i piha me na mahiko, na ulukope, mahi raiki, iniakolu, paka a me na mea waiwai nui e ae o ka aina, iloko o ka wa pokole loa, ua lilo i mau puu pohaku pele, a nalowale na hiona mua a pau o ka aina. Aole loa he mahinameakanu i koe iluna o ka aina o Iava, ua pau loa i ka uhi ia e ka pele.
Aia ma kekahi aoao ke alo o ke awa o Batavia, ke kapilata o Iava, he kulanakauhale nui o na Pake he 25,000 a oi ko lakou heluna. Ua pau loa lakou i ka pulumi ia a me na kauhale, a koe uuku ka poe i pakele.
Aia he 3,500 poe Europa a Amerika e noho ana ma Auper, kekahi mahele o Batavia, ua poino he heluna nui o lakou. Oia ka aoao mua a na aa a me ka lepo i uhi ai mailoko mai o naluapele, a mahope iho, ua pii mai ke kai hoee a moni ia aku la i ke kulanakauhale holookoa, a nalowale loa, koe ole iho kekahi mea i hoailona no kahi o ia kaona i ku mua ai.
O Bautam, he kaona, ua uhi paapu ia e ke kai, mamuli o ke emi ana o ka aina ilalo; a he 1,500 poe i poino.
O ka mokupuni nani o Zerand, e ku ana mawaho o na aekai o Bataria, ua uhi pu ia a nalowale e ke kai, a aole hookahi ola i pakele no ka hoike ana mai i ka moolelo o ko lakou poino ana. He mau tausani ola i poino malaila.
O na kauhale ma na aekai o ke kowa o Sunda, ua pau loa i ka nalowale; a ma kahi o ke kuahiwi kiekie Kramatar i ku ai, he moana kai hohonu malaila.
O na moolelo o na wahi a pau ua weliweli. Ua luluia a wawahi ia na mokupuni e ke olai, ua onou ia kahi iloko o ke kai a nalowale loa, a ua uhi pu ia a kauliilii kahi e na kai mimiki, a ua hana hoi ka pele i kana hana weliweli, a pela me na kikiao makani.
Ua koho ia, he aneane 100,000 ola i poino.