Ke Koo o Hawaii, Volume I, Number 1, 15 August 1883 — Page 3
KE KOO O HAWAII
1 Makahiki $2.00 I Mau ai ke Ea o ka Aina i ka Pono. 6 Malama $1.50
BUKE 1. HONOLULU, AUGATE 15, 1883. HELU 1.
OLELO HOOLAHA.
O ka Nupepa ke KOO O HAWAII, e hoopuka ia ana ma Honolulu nei i kela a me keia
KAKAHIAKA POAKOLU,
o na hebedoma elua o ka Malama. a e hoouna ia aku no hoi ma na Mokupuni me ka eleu i ka wa e loaa mai ai na kauoha.
He $2.00 ka Auhau no ka Makahiki, a he $1.50 no 6 Malama.
He 15 keneta ka Uku Luna no na kope malalo o ke 50, a he 20 hoi no na kope i oi mamua o ke 50.
Ua hamama ko makou mau Kolamu no na mea hou o na makamaka a me na Manao Kalai Aupuni Naauao, a aole hoi e hoopuka ia na manao hoopaapaa ano ole.
E hoounaia mai na Leta ma ka inoa o ka nupepa, e makemakeia ana e hoopuka aku me na inoa oiaio.
Mahope iho o ka hala ana o na Malama Elua o kekahi mea lawe pepa, ina aole e loaa kona uku pepa, aole makou e hoouna aku ana i ka nupepa mahope aku o ia manawa.
No na kauoha Nupepa a me na Ohi Dala ana, e hoouna pololei mai i ka mea nona ka inoa malalo nei, a oia wale no ka mea mana hookahi i ae ia e hooponopono.
KAMAKI, Luna Nui.
Keena, Nupepa Kalepa. Pahu Leta, Helu 413.
MOOLELO O NA KAUA
A KE
DUKE O WELINETONA
KA MEA I KAPAIA E IA AU, KE
Duke Hao o Enelani!
HE
KANAKA POOKAPU I KE KOKO!
KE KAUA ANA O NA PUALI KAUA BERITANIA,—A ME KO ENELANI MAU PAPU POHAKU.
[I na poe heluhelu o ka Nupepa "KE KOO O HAWAII, Aloha Oukou: I kulike ai me ka puka mua loa ana o keia Nupepa Hou, pela makou e pahola aku nei i ka lehulehu no ka manawa mua loa i ka moolelo o ATA WELESELE, oia hoi ma kahi olelo ana ke DUKE WELINETONA, ke Keiki Alii o ke kahua kaua, a o ke Pukonakona hoi o ke kahua hookahe koko o Watalu, a o ka oi hopo ole hoi o ke Koa a me ka Wiwo ole imua o na enemi. Oiai keia kanaka puuwai liona e ku ana maluna o na kahua kaua kaulana lehulehu wale, aia hoi oia e alo ana i ka ino o na ululaau a me na waoakua, e pii ana maluna o na kuahiwi, e au ana ma na muliwai akea e hiki aku ai i na enemi, aia hoi iloko o kona puuwai e kapalili ana kona mau manao ma kona umauma ahi e like me ka uwila, a o ke kanaka e like me keia ano, oia ke kanaka hiki ole ke hoomalielie ia aku kona inaina no ka pono o ka Noho Alii a me ka maluhia o kona lahui, a oia hoi ke kanaka a Enelani i hapai ae a kiekie iluna, a olelo ia iloko o na moolelo kaua o Beritania Nui i keia la, "Aole loa he Alihikaua i loaa ia Enelani mai kona hookumu ia ana mai he aupuni kaua a hiki iloko o keia keneturia e hele nei e like me Ata, ke Duke o Welinetona."
Ua olelo o Beniamina Disaraeli, oia hoi ke Kuhinanui o Enelani i pau iho nei iloko o kela mau makahiki i hala aku la, maloko o ke Keena Ahaolelo i ka makahiki o ua Duke nei i make ai, 1851, imua o kekahi anaina nui i akoakoa ae no ka hoolohe i kekahi haiolelo no na mea e pili ana i ua Duke nei, penei:
"Ina aole i loaa ia Enelani he kanaka nona ponoi iho, e laa me ke Duke o Welinetona, he Alihikaua Nui no ka aina, a o ka Haku Nele kona hoi, he Adimarala Nui no ka moana, ina paha iloko o keia la, aole o Enelani maluna o kona kahua ponoi iho, ina la, aia oia malalo o na kanawai o Farani, a he Panalaau hoi i kaili ia malalo o ka ikaika."
O ke Duke o Welinetona, he kanaka oia i ike ia e na aupuni kaua o ke ao nei ma ke ano, he Alihikaua koa a me ka wiwo ole, he mau noonoo akahele a he hooko i kana mea e olelo ai, ina he kaua a hiki i ke kanaka hope loa, no ka mea, ua olelo oia maluna o ke kahua kaua o Watalu, i ka wa e haalulu ana ka honua i ka holo a na kaakaua, a o kona mau laina koa kuea hoi, e haule a make ana he mau haneri i kela a me