Ke Koo o Hawaii, Volume I, Number 1, 15 August 1883 — Page 10
o A. E. I., no na mea e pili ana i ka la Sabati, a me ka la i kuhikuhi ia he la Dominika, oia hoi ka la o ka Haku.
He oiaio, o ka la Sabati, oia ka la i papaia ai ka lahui Iudaio e na Kanawai he Umi a Mose i kau ai ma o ka Iehova kauoha, e kapu ia ka hiku o ka la o ka hebedoma, a oia hookapu ana, ua hoikeia ma Pukaana, Mokuna 20, Pauku 8, Kanawai 4. E olelo ana:
"E hoomanao i ka la Sabati, a e hoano ia. I na la eono e hana ai oe i kau hana a pau. Aka, o ka hiku o ka la, he Sabati ia no Iehova no kou Akua," a pela aku.—"No ka mea, i na la eono i hana ai o Iehova i ka lani, a me ka honua, a me ke kai, a me na mea a pau iloko o ia mau mea. A i ka hiku o ka la i hoomaha ai, nolaila hoi i hoomaikai ai o Iehova i ka la Sabati, a hoano ai hoi oia ia la.!"
I hoike ae nei au i keia Pauku o ke Kanawai i hoano nui ia e ke Akua, e Iehova, a ua hooko a ua malama nui ia no ia wa iwaena o ka lahui Iudaio a hiki wale i keia. Aka, ina kakou e hoohalike ae i ka nui o na Iudaio ia manawa, oia hoi na Ohana he Umikumamalua a Iakoba, aole paha lakou i oi ae mamua o ka hapalua miliona kanaka kane, wahine a keiki, aka, o na lahui e ae a puni ka honua, i malama ole i keia Kanawai ia wa, aole e emi malalo o Elima Haneri Miliona Kanaka.
Nolaila, e hoomaopopo kakou, he hakina uuku loa i like me hookahi hapa haneri miliona o na lahuikanaka o ka honua nei i mahui i ke ano o keia Kanawai, i ko Mose wa i halawai ai me ke Akua ma ka mauna o Sinai. A i keia au o ka honua, ua hiki aku la ka lahuikanaka o ka honua nei i ka Biliona a oi, aka, o ka poe Iudaio e malama nei i ua la Sabati nei, e like me ke kauoha a Iehova, aole paha i oi aku i ka Umi Miliona a puni ka honua nei, e malama nei i ka Hoomana Iudaio, a o ka Hoomana hoi a Iehova i kuhikuhi, a i ao mai ai i ka Papa Kahuna a Aarona a me na Levi i hoomana e pono ai Kona lahuikanaka ponoi, ana i wae ai he lahuikanaka nona.
[E HOOMAU IA AKU ANA.]
OWAI NEI KAMA HOU?
[HE MELE INOA NO KE KOO O HAWAII.]
Hamau! Hoolono! he Kama e!
He Kama nani kamahao
I oi kelakela loa ae
I ko keia mau la wahakole.
Ke hoea aku nei imua o oukou
Me na manao mihalanaau
O keia Paeaina nani
I makaleho mau ia
E ka poe kipa hale.
Ku a ninau pualu kakou
Owai ua Kama nei?
O "KE KOO O HAWAII."
E ala Hawaii o Keawe
Eia kou makia paa;
Pehea oe e Maui o Kama;
Nawai la auanei ke eo?
Lanai a me Molokai hoi
Eia ka kakou Kama hou
He Ipo he Ahailoko Kupua
He Kamaeu kupanaha e.
Kilakila kona nani
Kona ouli he nanahe
Kona mau manao he onipaa
Ku a ninau pakahi oukou
Owai la ua Kama la?
O "KE KOO O HAWAII."
E Oahu a ka "Makaewaewa"
E hoolei ia hana kahiko au
E hoohamama i kou ipuka
E hea i ka malihini e kipa
Mai upoipoi i kahi kieki
E kikoo mai na lima aloha
E lawe a noho ma kou home
Kane kaea, hene iki na aka,
Ku iho kaena, o oe ka oi
O ka pea iluna, i ka huini o ke kia
Owai ua pea la, e ui kakou?
E kuailo mai owai ia Kama?
Kahuhu! O "KE KOO O HAWAII."
E Kauai a "Kalokomaikai!"
Eia he Kama nani nau
He kupanaha, he oheohe
He hoa hee nalu pu i kai
He hoa au i na muliwai ou
A paaua pu olua me ia.
O kana mau hana he kuoo
He kupaa no kou mau pono
He kakele olelo naauao
He mikimiki a he milolii
E helu papa aku ana i na nani
E kuupau ana i na nuhou
I na hene wai olu lana malie
O ka nani, "KE KOO O HAWAII."
E wehe kou papale e Niihau
E kunou haahaa i kau Kama nani
E hoolauna mai oe iaia
E kipa kauhale e hanai ai
E pa kahea e komo maloko
E haihaiolelo a e uiui
E hoinainau e hoohonehone
E nana iho i kona oiwi nani
E huro ana oe oia nei ka oi
E pili pu ai ka poe ohumu kipi
Ka poe makaleho hoino wale.
O na nanea oia nei, he mau mea kamahao
Ninau o Lehua Owai ua Kama la?
O ka nani "KE KOO O HAWAII."
E huro puni kakou a pau
E mau kou "Koo" ana o na pono
No na Hoonene wale ia o Hawaii
E "Koo" oe a paa ko Hawaii kuokoa
E "Koo" oe a mau, e "Koo" a onipaa
E "Koo" i luliluli ole
E "Koo" no na haipule, i mau na alana
E "Koo" no na opio imua i ka noiau
E "Koo" no na paahana i palaka ole
E ka "Koo" no ka ohana i makili ole
E "Koo" no kou Nohoalii i hiolo ole
"KE KOO O HAWAII," ke "Koo" no ka holomua.