Ke Kumu Hawaii, Volume IV, Number 21, 13 March 1839 — Page 82

82 KUMU HAWAII. (MARAKI,

LAHAINALUNA, Febe. 21, 1839.
NO KA HOOMANA KII.

                Aloha oe e ----. Ua loaa mua kau palapala ninau hoakaka no ka mea hoomana kii, ua heluhelu au a maopopo no ia'u ke ano maloko, a me na ninau.
                Ua niuau aku no au i ka poe ike, a ua hai mai lakou e like me kou manao a'u i ike ai ma ka palapala; a ninau au i kekahi poe e ae, hoike mai lakou, aole like me kou manao.
                Penei kou manao: "Kalai ke kahuna i ka laau a ku i ka helehelena i makemakeia, alaila kau ka mohai, a pule, a hana i na oihana a pau, a mana ua laau la i kalaiia'i. No ke komo ana mai o ka uhane o ke akua, nolaila ka mana, i ko lakou manao. A pule aku lakou i ua kii la, manao lakou o ka uhane maloko o ke kii ka mea e lohe mai i kana pule.'' Pela aku oe.
                E like me kau i hoike mai nei, pela no ka manao o kekahi poe. Manao lakou, ua koino io mai no ka uhane iloko o ka mea a lakou i hoomana a kii ai; aka, aole maopopo kahi o kela uhane i hele mai ai a noho iloko o ke kii laau, a o ke akua mano, a me ke akua uhinipili. Hoole mai lakou, aole kumu o ka uhane i hele mai a noho.
                Eia ka mea maopopo ia lakou ka noho ana o ka uhane o kekahi mea. Ina paha i make ko'u kaikuwahine, a o ko'u hoalauna paha, a o ko'u makua paha; alaila, hoomana aku au i kekahi mea e ae paha, i ka laau paha, a i ka pohaku a ia mea aku ia mea aku a'u i manao ai. Ina paha wau i manao e hamana i ka uhini, alaila, hana pinepine no au a hoomana mau aku, a kau i ka mohai, a me kela mea keia mea ana i makemake, a pule mau aku ia ia i kela la i kela la. O ka'u mea, e pule aku ai, o ka uhane o ko'u hoahanau i make, i noho aku ia iloko o kela uhini a'i i hoomana aku ai.
                A pela no au e hana pinepine ai, a noho io aku no ka uhane o ko'u hoahanau i make maloko o kela uhini, a o kela mea keia mea a'u i manao ai e hoomana aku. Pela mai ka manao o kekahi poe. Olelo mai lakou, ua oiaio keia, no ka mea, ua nui na mea i hana pela, a ua lilo ua mau mea la i mea mana loa, a ua hoopakele kekahi poe akua i ko lakou kahu pela. (E ninau  aku oe i ka poe i maopopo ke kaao o Lonoapamalo, a na lakou no e hoike mai i ka hoopakele ana a kona mau kaikawahine uhinipili iloko o ka popilikia nui.) Pela iho la ka manao o kekahi poe.
                Eia ka manao o kekahi poe: Manao lakou, aohe komo mai ka uhane iloko o ke kii a lakou i hoomana aku ai; no ka mea, i ka hoomana ana a kekahi i kona akua aole oia i ike aku i kona akua panaha. Nana pono aku kona maka i kona akua, i kela la i keia la ana i pule aku ai, aole ona oni mai, aole hanu e like me ko ka uhane hana ana, aole hana mana. Nolaila, manao kela kanaka  aole komo mai ka uhane, a ua nui ka poe i ike pela. Aole o kekahi poe hooiaio mai lakou, e noho no ka uhane.
                I aku au ia lakou, "Mahea ka oukou hoomana ana. Ma ka laau anei o ke kii? ma ka uhane paha? Hoole mai lakou, i mai, aole maopopo ia mea; pela mai kekahi poe, a o kekahi poe, manao lakou mamuli no o ka laau, a o kekahi mamuli no o ka uhane.
                I mai lakou, no ka noho ana mai o ka uhane o ka mea, i make ka mana ana o ka mea ana i paulele aku ai; ina aole noho mai, aole no e mana. Pela ke akua uhinipili, a me ke akua mano, a ia'kua aku ia 'kua aku. Ina hoomana i ka mano, o ka uhane no ka mea nui e hoomana'i, a he malama aku no nae i ke kino o ke akua.
                Ina kamailio ka mano me kona kahu, e kamailio no laua ma ka noho uluhia ana o ke kahu e ka uhane o kona hoalauna i noho ai iloko o ka mano. Noho mai ka uhane maluna o ke kahu, a kamailio mai i na mea a pua e hoolohe ana, a ua maopopo no nae ke ano, no ka mea ua hoike oiaio mai no.
                Pela no ka uhini; hoike mai ae ke akua i kona manao ma ka uhane, a ma ka moe uhane, a kamailio paha. Aka, ke i mai nei kekahi poe, aole hoomana lakou ma ka uhane, ma ke kii no o ka laau a me ke kino ponoi no o ka mea i hoomanaia. He nui ko'u manao no keia mea, ina paha e hoike aku au i maopopo, aka, he pilikia ka pepa. Eia paha.
                Ina ua oiaio keia mea a lakou i hoike mai nei, o ka noho ana o ka uhane o kekahi mea iloko o kekahi mea a ke kanaka i manao ai e hookomo aku a noho malaila, ina ua pono ko'u manao i olelo aku ai ia lakou; no ka mea, ninau aku au ia lakou i kahi i hiki mai ai kela uhane, no kuu manao hoole, aole e noho mai ka uhane o kekahi kanaka iloko o kekahi mea a ke kanaka i manao ai e hookomo aku; a no ka maopopo loa i ko'u manao, o ko Satana mana no ia a me kona uhane; no ka mea, ua hooiaio mai ka palapala Hemolele pela; "he mana ko Satana." Aka, aole maopopo kahi o kela uhane i hele mai ai a noho. Pela lakou i hoole mai ai.
                Manao no lakou ua noho io no; aka, olelo aku au ia lakou ma ka Palapala Hemolele, penei, Ina he mana ko Satana, alaila nona ka uhane i noho mai iloko o na mea a pau i hoomanaia, a nona io no ka mana a oukou i ike ai, a o kela uhane o kamea i make, ua hoi aku no i ke Akua maoli, a ua hoomana no oukou ia Satana ma.
                Lohe lakou i keia, a ae iki mai, me ka manao no, no ke kanaka ka uhane i noho ai. No ka mea, aole maopopo paha ia lakou ka manao he mana no ko Satana i ka wa pokole, a ua kokuaia mai hoi. Nolaila, hoohewahewa lakou, a manao aole no Satana mai. No ia manao o lakou, aole maopopo ia lakou kahi i hiki mai ai ka uhane.
                Pela ko'u manao i olelo aku ai, ua kuhihewa paha wau. S. P. K.

LAHAINALUNA, Mar. 4, 1839.

E—:
                Ua ninau hou aku au i kekahi poe e ae, i ko lakou manao no ka hoomana kii, a ua olelo mai lakou, ma ka uhane wale no ka maopopo o ka hoomanao ana i ka wa e pule aku ai i ke kii.
                O ke kii, he mea hoomanao wale no ia; aole malaila ka manao nui o ka mea e pule ana: aia kona manao ma na uhane a lakou i kapa aku ai he mau uhane.
                O Kane, o Lono, a ia mea 'ku, i mea 'ku a kanaka i manao ai he uhane; oia no lakou. Ua hana lakou i na kii, a na kapa aku i na inoa o na uhane a lakou i manao ai maluna o ua mau kii laau la a lakou i hana'i. Pela no ka lakou hana ana ia mea 'ku ia mea 'aku.
                Ina pule aku ma ke alo o ke kii, a mohai aku i na mohai mamuli no o ka uhane o ke kii. Ua pohihihi nae ia'u ke ano o keia uhane a lakou i manao; o ka uhane hea la ka lakou i manao ai? no ka mea, elua wale no uhane nui a'u manao iho ai. O ko Iehova, o ka mea nui ia; a o ko ke diabolo, o ka uhane ino ia.
                Ke manao nei au, o ka mana o ka uhane ino, oia Satana, ka i komo iloko o ka manao o na uhane a lakou i manao ai. He kanalua ko'u, ma keia mea, aole maopopo ke ano.
                Ua nui na mea a kanaka i manao ai he akua, aole maopopo i kekahi poe ke ano o ka lakou manao ana 'ku i ka lakou hoomana ana.
                Ninau au ia Davida Malo, olelo mai no oia e like me keia maluna'e nei. O kona manao no ia, ma ka uhane ka hoomana; aka, aole akaka pono i kona manao kahi o kela poe uhane. Ua pau ia. S. P. K.

HE HOOMANA E MA HONOLULU.

                I iho la kuu naau, kahaha! he naaupo keia, e ke Kumu Hawaii. I keia