Ke Kumu Hawaii, Volume IV, Number 20, 27 February 1839 — Page 79

1839.) KUMU HAWAII. 79

                Nolaila ke papa aku nei au ia oe e ka mea e heluhelu ana i keia manao hoakaka, mai hookokoke aku oe i ka hookuli, a me ke pale i na mea pono ke haiia mai ia ia.
                E ka wahine, a me ke keiki, a me ke kanaka, a me ka haole, mai hoolohe oukou i keia mau hoakaka, i ka hookuli a me ke pale i na mea pono. No ka mea, ua make iho nei o Isaaka Mahoe no ka hookuli, a me ke pale i na mea pono i hoikeia imua ona. Aloha nui oia i hele aku nei. Na LUSANIA PAALUHI.

KE KUMU HAWAII.
WENEDE, FEBERUARI 27, 1839.

MAU MEA HOU.

                Ma ka la 15 Feb. nei, holo o Mi. Napa ma i Lahainaluna maluna o Paalua. Ku mai la ka Moku okohola o Beava.
                Ku mai la hoi kekahi moku kalepa Paniolo ma ka la 19 mai Sane Belasa mai, he 19 mau la o ka holo ana mai. Hiki mai la kekahi palapala maluna o ia moku, he palapala mai Amerika mai o Novemaba 2, a hai mai la i ka mea nana ka palapala, ua holo mai o Berinimade ma, maluna o ka moku kia akolu o Fama paha ka inoa, ma ka la 21 o Okatoba 1838. E ku ana ka moku ma Valeparaiso, a malaila mai holo ia nei.
Eia na ee moku i haiia mai ka inoa.
P.A. Berininiede, a me kane wahine.
Mi. Peka, me kana wahine.
Mi. Bainamu, me kana wahine.
Mi. Iarevisa, me kana wahine.
Kapena Setesitona, me kana wahine.
Kapena Hoyera, ke'lii moku, me kana wahine, a me kana keiki.
Seletona wahine, a me kana keiki.
Kauka Wooda, me kana wahine.
Mi. Holedena, me kana wahine, a me ke keiki.
Mika Holedena, he wahine kane ole.
Mi. Laukeke, me kana wahine.
Mi. Linese.
Mi. Tomasona.
Mika Konela, he wahine kane ole.
                He poe hana kilika kekahi poe o lakou, he poe kamaaina kekahi, he poe e paha 'kekahi. Malia paha ua nui na palapala maluna o ua moku la no na misionari. Makemake ino makou i ka heluhelu aku.
                Ua mareia o Henere Pearce, a e holo mai ana ma ka malama o Mei. Elua hoi moku e holo ana mai mai Amerika mai, o Ione a o Iosepa Pipali.
                Lohe makou ua ili o Harieta ka moku kia alua o Kamehameha III, ma Kauai, aole nae i akaka ka make a me ke ola paha o ka moku.
                E holo ana ka moku Paniolo ma Manila. Kokoke holo o Europa ma Makao.
                Ke hana nei na alanui o Honolulu nei.
                Ua mai o Kaahumaua II, he makole ka mai. Mai hoi o Kauka Aneru, he kuni, ma ka la mua o Ianuari ka hookau ana o ka mai, a nawaliwali no.

                He kaikoo nui loa ma Waialua a me Koolau i ka po o ka la noa, oia ka la 28 o Ianuari.
                Komo ke kai maloko o na loko, o Lokoea a me Ukoa, ua komo hoi maloko o kekahi mau hale lua ke kapa o ka muliwai; a ma Puaena no hoi — Pau kekahi mau pa i ka wawahiia.
                Ma Waialee, ua pii ke kai a komo maloko o na loi, a oki loa ka aina i ke kai—
                Ua uhukiia ka ai o awaawa loa - kokoke wi ka aina.
                Aole i ike na kanaka i ke kaikoo i like me keia i keia mau makahiki nui wale.
                Ua ike na elemakule i ka pii ana o ke kai i like me keia i ka wa kahiko loa, aka aole pinepine akahi wale no manawa keia ka lua.
                Maloko o ka lima o ke Akua ke kai; ina i hooku oia ia ia, e make koke kakou ia ia. Na EMEKONA.

MOKU WELA I KE AHI.

                Eia keia mea i paho. Ua pau ka moku o Wailele i ke ahi, ma Waialua i Mokuleia kahi i kapili hou ia'i, no ka mea, ua naha no ua moku la mamua, i puhiia e ka makani a kau i uka o Mokuleia, o ka mea i holo aku ai ua moku la ilaila a iii ai a naha, o ka uwala, a ma ia hope mai, olelo o Kekuanaoa e kapili hou, a ua kapiliia no, a ua maikai ka hana hou ana, hookahi wale no mea i koe o ke kapili iho o ka papa hou, oia wale no koe, ua makaukau na mea a pau loa. Eia ke kumu o ka wela ana o ua maku la.
                O ka haole kamana, nana i kapili ua moku la o Mi. Palala kona inoa. E ku ana ia maluna o ka ihu o ka moku, aia ke ahi, ua haule malalo o ka opala, e a ana, aole i ike ka haole a me ke kanaka e lawelawe ana mamuli ona, aole mea i ikea'i ua'hi la, aole e hiki i kekahi o lakou ke kuhi aku, na ia la, na ia'nei, ana mea ma ke ahi, i wela'i ka moku; aole loa, aka ua manao wale ia, no ke puhi baka o ua haole la, nolaila no paha ke ahi, aole nae i ikea ke puhi ana a haule iho ke ahi, e ike pono ia'i nana, a nui ae la ka a ana o ke ahi. A ike aku la ka haole, a me ke kanaka, i aku la ka haole i ke kanaka, E kii aku i ke kai. Holo aku la ke kanaka me ka ipu, a ukuhi i ke kai, a hoi mai me ka manao e ninini aku ke kai i ke ahi i pio ai. Hina iho la ua kanaka la me ka ipu, i piha i ke kai, a pau aku la ke kai, aole mea e pio koke ai ke ahi, hokahoka wale iho la laua i kahi e pio ole ai ke ahi, a o ka haole hoi, penei hoi kana kinai ana. Kahili ae la oia i ka opala a ke ahi e a ana, alaila, aa'ku la ke ahi ma kela wahi, keia wahi o ka hale, a nui loa'ku la ka a ana a ke ahi, no ka mea, he ikaika loa ka makani makai mai; kapaia'ku ia makani, he koolau. Alaila, lanakila mai la ke ahi maluna o laua, aole hoi e hiki laua ke lanakila maluna o ke ahi, a pii ae la kekahi o laua iluna o ka hale e wahi i ke pili, alaila puka koke ae la ke ahi a puni ka hale, o ka pau iho la no ia i ke ahi.
                Minamina loa kela waiwai i pau wale i ke ahi, a me ka luhi o ka mea nana i hana, aole i loa ke kauwahi mea iki o ka hana ana, no ka mea, ua olelo ka mea nona ka moku, i ka mea nana e kapili, Aia paa ka moku, elima haneri dala ka uku. Pau keia. P. K.

                Auhea oe e ke K. H. ke hoakaka aku nei au ia oe, no kuu lohe ana he pepa hoolaha manao oe.
                Eia ko'u manao ia oe: Ke hoole aku nei au i ka manao o Noa Nuhi i hoakaka mai ai ma ke Kumu Hawaii, ma ka Buke 4, aia ma ka pepa umi kumamakahi.
                Nolaila ko'u manao hoole, no ko'u ike ana aole ia o ka hua e ku ana i ka mihi.
                Nolaila ko'u manao hoakaka ia oe, e ke Kumu Hawaii, ke manao nei au e oki ia wahi o ka'u Kumu Hawaii, a hoolei pepa i kekahi manao o'u.
                Eia hou hoi keia manao o'u, ina hoi paha haehae au i ka'u ua laha loa aku nei, pono ole hoi ka'u haehae ana i ka'u pepa.
                A nolaila waiho pu wale iho nei no au me ke akaka ole. E hoakaka mai oe e ke Kumu Hawaii. Ua pau keia mea hoakaka aku ia oe e ke K. H.
Na LUSANIA PAALUHI.

                O ka hoomanakii keia i hooleia mai nei, ua pono no. Aole i make na kanaka i ka mu, he wahahee wale. Aka o ka luakini o Iehova he mea ola ia no kanaka, malaila ke ola o ka uhane ke imi, pono lakou. K. H.

Olelo noiau.

                Elua wahi e loaa mai ai ka inoa maikai; ma ka olelo hoino o ka poe hewa kekahi, a ma ka olelo hoapono o ka poe pono kekahi.