Ke Kumu Hawaii, Volume IV, Number 19, 13 February 1839 — Page 76
76 KUMU HAWAII. (FEBERUARI,
KAHI MELE.
HE MELE.
Aloha na lahuikanaka---
E noho mai nei i ka malu po,
Aohe kumu nana e ao aku,
I ike ai lakou,
I ka pono e ola'i lakou.
Owai la ko kakou akua
A lakou i hoomana'i?
Owai hoi ko lakou mea nana i hana?
I malama ai lakou.
Aole hoi lakou i lohe
I ka Haku nana i hana.
Auhea hoi oukou!
E eu e kona poe.
E wikiwiki i kana hana,
E wiki o haule e lakou!
E hopu i na lio holo
E kau i na noho paa
E wiki oukou!
"Owai la ka mea o ko Iehova poe kanaka.
E holo ae ia ano
E kukulu i kona aupuni?
O Iehova kona Akua kekahi pu me ia."
Auhea la kona poe kanaka,
E wiki lakou i kana hana,
O poho wale kela mau waiwai
Ana i malama'i:
He mau waiwai makamae
No ko ke Akua poe kanaka,
Ke iini mai nei lakou
I ke poho o keia waiwai,
Auhea oukou e na ekalesia?
E noonoo pu mai oukou
Aole anei keia he poho?
Ua poho loa no.
E oli ia Iehova
I kokua mai ia
Mamuli o ka na Misionari hana;
Aole nae na lakou ka hana
Nana no i kauoha mai,
"E hele oukou i na aina a pau,
E hai aku i ka olelo maikai,
I ko ke ao nei a pau loa,
E bapetizo aku hoi ia lakou
Iloko o ka inoa o ka Haku."
A pehea kakou?
Ua noi aku anei kakou ia ia,
E kokua i na Misionari?
E ao aku i kela poe kanaka?
Aole paha kakou i hana pela.
Kakaikahi wale
Ka poe o kakou i hana pela.
Pehea la uanei kakou
I ko kakou kokua ole i kana hana?
No wai la keia hewa?
No kakou nei no paha,
He poe aloha ole kakou
I ka uhane o kela poe.
Ua kuulala no lakou
Ua like hoi me na hehena,
Ua wehe i na wahi hilahila,
Ua ai i na mea ino.
Ua haalele i na mea maikai,
Ua puni koko no lakou,
Ua powa wale aku,
Ua kii wale i ka hai,
He opuinoino ia lakou iho,
He manao ole i na makua,
He imi i ko lakou pono iho,
He kaua wale aku i na moku,
He ai i na kanaka i make,
He pepehi i na keiki i mea ai,
He pepehi no hoi ia lakou iho,
I mea kaumaha i ko lakou akua,
I ola'i ko lakou mau uhane,
I oluolu mai ai na'kua
I ae mai ai ka lakou hana,
I lanakila maluna o ko lakou enemi,
I pono ko lakou noho ana.
Ua kuhihewa lakou,
Ua koho maoli ma ka hewa,
Ua poino no hoi kakou
No ko kakou nawaliwali
Ma kana mea i kauoha mai ai.
Ina paha kakou ikaika ea!
Pomaikai mau kakou,
A ola pu no hoi kakou
Me kela poe i ka malu po,
A ola pu a ola mau.
Oahu, Honolulu, Ian. 24, 1839.
Aloha oukou, e na keiki a pau mai Hawaii a Niihau, e imi ana i ka naauao a me ka ike i ka heluhelu a me ka palapala lima a me ka helu naau a me ke ana Honua o na mea a pau i hanaia ma ke kula ana, a ua hana oukou i keia mau mea a pau. Eia paha koe; o ka olelo ana a ke kumu e noho malie, e hoolohe, e noonoo, e akahai me ka pule, me ka mihi, me ka haalele i ka lealea, i ka hookiekie, i ka noho ano ino a pau ma ka hale kula; o lilo ka oukou imi ana i mea ole, no ka hoomanao ole i ke ola o ka uhane, ma ia olelo ana, aole he hoolohe.
Eia ka hope o ia mau mea la ea; e nana mai oukou, e na keiki a pau, noho lealea wale no aole hoonaauao. I ka la 3 o Ianuari nei, loaa ia Kaimana, kekahi mai he nahu, ali a holoi ia, a huia ae la olalo, a hiki ole ka hele, a he pa ka olelo, a ninau aku na makua, Pehea kou manao? I mai la ia, Hookahi wale no o'u manao o Iesu. Aloha ino kuu kumu i ka ike ole ia ia, a olelo kekahi makua, ma kahi e ae me neia ka olelo ana, O ka mai no keia, e make mai nei na keiki a pau. I mai la ia, Ina i manao ke Akua, e make kakou ano, make koke no aole e ola. Oia kona mau olelo i lohe maopopo ia; aneane e keiki mai kekahi mea, he ike ole mai ke nana ia hai, ke kuhikuhi ka olelo, ke kunou ka ike, he hamama ka olelo, a o kana ai; elua puna la i ekolu, eha, hookahi mana kalo, mana uala, i na hora ai a pau keia mau la 3----a---24 o Ianuari nei, i ka hora 11 ---oia kona make ana. Eia kekahi o kana hana; mamua aku he kaikamahine hele pinepine i ke kula aole manao nui i ka ai, oia wale no ka mea oi mamua o ka ai i kona manao. Eia kekahi, o ka noho hana, i ka ulana papale, humuhumu, heluhelu pala pala, helunaau o na hana pono i ikea o ke ahonui, o ka ae, oia ka mea i ikea no kana hana ana, ua lawe paha ka Haku ia ia. E, na keiki e; e hele naauao, i ka pono o ke Akua.
Eia kekahi, o kona hanau ana mai, i ka holo ana aku o Liholiho e ka i ka opu. Eia paha ia Novema. 27—1823—A loaa mai na Makahiki o Kaimana he 15.
Oia ka mea hoakaka ia oukou, e na keiki e manao ana o Iesu he ola, oia ko oukou makua mau; a me na kanaka makua i hookamalii, oia ka pono E na kanaka i oo e nana i ke ano o ia mea, o ka mea manaoia ia he kanaka makua, e ao ia e kamalii, o ka mea e hana ana i ka mea a kamalii o ka lealea o ka manao paa ole ma ka hookanaka makua, he ai heleia, he ai noa, he aipuhiu, he ai wale, i ka aipea, i ka aia, i ka ai make, i ka ai awaawa, o kukuli mau, o ka hana i na mea i olelo pinepine ia penei; Himeni 23---oia ke kahi; eia ka hope ma ka Himeni 29---Eia kekahi pehea la ka pono, o keia mea? Himeni, 111—-ua maopopo kau hana malaila, mahea? ma ka Himeni 109---heaha ka hope? maanei, Himeni 118---Eia kekahi ninau ma ka la 2—Ianuari, Mahea? ma ka hewa paha? Ma hea i akaka ai? Ma ka hana? aole ma ko Iehova aoao i aloha ino oia; E, e ka mea i hana pela mai hana hou oe o alina; e like me Kaina, e Aloha ka kou a pau i ka Haku.
Eia keia wahi mea hoakaka he mau kahuna 3, eia ka mua he wai laau hamo mawaho, a pau ia, eia 2 he wai no, he wahi laau iki, hoao a luai ia pau ia, eia ke kolu, o ka mua he wai elima poi wai; he pua ilima, mama, a au i ke poi a nini aku i ka mai, pela i kela kakahiaka, keia ahiahi i ka lele ana o ke aho, i aku kona makua; Ua pau; aole he aho i koe; kakali lakou, a hiki au, pule iho la au, alikealike, o ka pule ana lele loa kona ea.
IEREMIA KAHAUOLONO.