Ke Kumu Hawaii, Volume IV, Number 15, 19 Kekemapa 1838 — Page 60

60 KUMU HAWAII. (DETEMABA,

hapaono o ke ko maloo ia Mi. Farani no kana hana, lilo hookahi hapaono ia Kekuanaoa no ka hale a me na mea ana e hana mai ai, e lilo hoi ekolu hapaono ia oe e ka mea nana ke ko maka.
                Ua pono hoi ha ke kanu ko i keia wa ma Honolulu nei, no ka mea ua akaka ka wili a me ka poe nana e hana. E kanu hoi e na mea aina, a me ne mea oo, i pau ko oukou nele i na mea e pono ai ke kino, i pau hoi ka hemahema o ka noho ana.

KAHI MELE.
He mele no ka palapala hemolele.

E ka Palapala Hemolele,
Waiwai nani ano e,
I hoolahaia mai,
Ma ko makou aina nei.
Aole waiwai e ae,
I like me ka momi laa,
He waiwai mau loa ia,
No ko ke Akua poe kanaka,
Ka poe hele makaukau,
Me na ihe, pahikaua, newa nei.
E ka Palapala Hemolele,
He nani kou maikai,
Ua aiia kou hua,
E au haipule nei.
He ono, he meli,
Mai luna o ka lani mai;
O kou ikaika,
Me he pahikaua oi lua la,
Ua okioki iho oe,
Ma na aina a pau,
I na naau paakiki,
O kanaka hoomaloka,
Ua oki, paka haalele,
Ina mea ino a pau.
E ka Palapala Hemolele,
Ua ikeia kou nani,
Mai ke kumu kahiko mai,
Ma na puu a me na mauna,
Ma na awawa a me na loko,
Ka puu o Ziona,
Ka loko o Tiberia,
Ka mauna o Gerizima,
A me ke kahawai o Zareka.
E ka Palapala Hemolele,
Ano la! ua ike makou,
Me na maka elua;
Aohe mea e ae,
E pono ai na kanaka,
O ka Palapala Hemolele wale no.
Auhea la ka rula pololei?
E rula iho ai,
I na naau kekee,
O kanaka Hawaii nei,
I mea hoi e pololei ai,
A like me ka manao ou,
Auhea la ke kamana?
I manao i keia rula?
Ka rula e pololei ai,
Na laau kekee.
E ke kamana,
E huli a e loaa no,
Malaila ka pololei,
A me ke kupono:
E lawe, a e kau,
Ma ko oukou mau naau,
I ikea ka pololei,
A me ke kekee;
I ikea ke kupono,
A me ke kapakahi,
Auhea la ka amara?
I manao oiaio?
I kana hamare paa nei,
I kui paluku iho ai,
I na kua hao paakiki,
O ka naau o kanaka,
Aohe mea e ae e maha'i,
O oe wale no.
E ka Palapala Hemolele,
He maikai kou nani,
O oe ka pahikaua,
I lanakila'i ka poe koa.
Maloko ou i puka mai ai,
Ka make a me ke ola
Auhea la hoi ke kapena?
I manao i keia alakai,
Ke Panana pololei
I ili ole ai na moku o lakou,
Ma ka pukoa ku,
Kahi a lakou e holo ai,
Eia ke alakai maikai,
Ke kuhikuhi pololei,
E pae aku ai kakou,
I ke awa ola mau,
I ke awa o ke alii,
I Ierusalema hou,
Wahi nani ou,
Nolaila ka waiwai nani,
Ke gula, daimana, dala,
Momi laa maikai,
A kakou e lohe nei;
Ua hoike akaka mai,
Ka Palapala Hemolele,
He maikai, he nani,
Nui wale kou pomaikai.
Auhea la ke aniani nui?
I ikea'i na mea a pau.
Eia ke aniani pololei,
No ko ke Akua poe ohua,
O ka poe nana pono,
E ike auanei lakou,
I na hewa a pau,
O ka huahua, o ka hakaka,
Ua ikeia ia maanei,
Nolaila, aole hamare aole rula,
Aole Panana a me ka waiwai,
Aole kuhikuhi, aole alakai,
No ka Uhane Hemolele,
E hiki aku ai i ka lani,
Ke ole ka Palapala Hemolele.
Na KUNUI ME KALAMA.

MAKE.

                Ma ka muliwai o Wilamete ma Oregona, i ka malama o Mei iho nei, o ka wahine a Iasona Li, [Mrs. Jason Lee.] kekahi o ka poe misionari. Aole ana kane i kona holo ana mai ma Oahu nei, a hiki aku malaila ua mareia laua o Mi. Li. Holo aku la o Mi. Li i ka malama o Maraki, ma kela aoao o ka aina, e kii ana i mau kumu hou e kokua mai ia lakou. Hanau mai la ka wahine i ke keiki na laua, a po akolu make iho la iloko o ka Haku.
                Make iho la o Iasona ke keiki pokii a Kauka Keokeo, i ka malama o Iulai. Eia ke ano o kona make ana. Loohia kekahi wahine o lakou i ka mai, ma kahi e, mauka lilo o ka aina, a kii mai la lakou ia Kauka e holo aku e lapaau. Aole ia i hiki aku, no ka mea, ua paa i kekahi mai, a no ia mea, manao iho la lakou e pono o Kauka wahine ke holo aku a me kekahi kahuna pule. Lawe pu aku la ua wahine la i ke keiki omo waiu o Iasona ka inoa, a waiho mai la i kekahi ma ka hale me kana kane. Holo aku la laua ma ka waa ma ka muliwai he 70 mile mauka, a ehiku la me na po ka holo ana, hiki aku la lakou malaila. Loaa ka mai ia lakou ua maha. A pau ka noho ana malaila, hoi mai la lakou me na Inikini maluna o ka waa a i ka lua o ka la, hiki mai la lakou ma kahi holo kiki o ka wai, kahuli iho la ka waa, a pau lakou iloko o ka wai. Lalau aku la lakou i ka waa, na na Inikini i kokua mai ia lakou, nalowale iho la ke keiki, a liuliu pae lakou ma kapa, Hoohuli ae lakou i ka waa iluna, ala ka! ke keiki malalo o ka waa, ua make loa. Uwe iho la ka makuwahine, uwe iho la lakou a pau, aka, ua hoopakele mai ke Akua ia lakou i ka make, nolaila hiilani aku la lakou ia ia no kona hoopakele ana mai.

                KUMU HAWAII. Elua hebedoma hookahi pepa, a he iwakaluakumamaono mau pepa i ka makahiki, he hapalua wale no ka uku.