Ke Kumu Hawaii, Volume IV, Number 10, 10 ʻOkakopa 1838 — Page 40

40 KUMU HAWAII. (OKATOBA.

LAHAINALUNA, Oka. 20.

O KA NONANONA KE KUMU.
Solomona 6: 6.

                Auhea oukou a pau e na kanaka e heluhelu ana i ke K.H. Ke hoakaka aku nei au ia oukou i kekahi manao, no ka mea, ua loaa ia'u ka manao e kamailio aku ia oukou ma ke K.H. I kekahi ahiahi la Sabati, noho iho la au ma ke kua o ko'u hale, e noonoo ana i na olelo i hoikeia i ua Sabati nei, a me kekahi ano o ke Akua.
                Aka, kalele wale iho la kuu lima ma ka laau keakea, a i kuu kalele ana, make iho la kekahi nonanona. A i kona make ana, neenee ae la kuu lima, e ike pono i kona make ana: aka e kamau iki ana no kona ea. No ia mea, hoomau loa iho la kuu lima ma ke kalele ana a holoholo hou mai la na nonanona he nui wale.
                A hoohalulu iho la kuu lima, i hiki ole mai ma kuu wahi e kalele ana. A holoholo mai lakou, a lohe paha i ka halulu o kuu kikeke ana, pau aku la lakou i ka hoi. Aole liuliu, hiki hou mai ia kekahi mau nonanona, me ka lakou mau ukana ma ko lakou mau waha.
                A no ka nui o kuu hoohalulu ana, hoi hope aku la lakou ma kahi a lakou i hele mai ai. A loihi kahi a lakou i hoi aku ai, loaa ia'u ka manao e kaili i kuu lima, no kuu aloha i ko lakou hoi ana me ke kaumaha.
                Loihi kuu noho ana malaila, ekolu hapaha paha o ka hora. A i keia manawa, e ai ana au i ka maia, a i kuu ai ana, nopu mai la ka manao iloko o'u, e haawi aku i ka hapa umikumamaono o ka maia ma ke alo o na nonanona.
                A i kuu waiho ana, kulou hou iho la au e noonoo hou i ke ano o ke Akua. A pau ia, nana hou aku la au, aia hoi lakou ma ka hapaumikumamaono o ka maia, e ai ana, a e lawe ana, a he mau haneri eha paha lakou e ai ana.
                Nolaila, mahalo aku la au i ke Akua nana i hana i keia mau mea liilii, me ka haawi mai i mau waha e ai i ka ai, aole na lakou i lulu. Nolaila, ua moakaka make ai manao, he lokomaikai ke Akua i na mea a pau, ua aloha oia i na'lii a me na makaainana, i na kumu a me na haumana, i na makua a me na keiki. Nolaila, he pono i na mea uhane a pau ke mahalo aku ia ia, i kana mau hana a me kona Akua ana, a me kona mana, a me kona hemolele. No ka mea, he pono i na kanaka a pau ke hoomaikai aku i ka mea nana lakou i hana, no ka mea, ua mahalo ka la i ke Akua, a o ka mahina hoi a me na hoku, i ka mea nana lakou i hana. A o kana mau hana a pau, ua hoike mai no i ka nani o ke Akua.
                Aka, o na kanaka, aole lakou i hoolea lea aku ia ia, aole hoi i mahalo aku ia ia, kakaikahi wale no ka poe i hoolea aku ia ia. No keia hiki ole i ua kanaka a pau ke hoolea aku ia ia, nolaila hiki mai la ka olelo a ke Akua i na keiki a kanaka. Penei ka hoomaka ana.
                "Kahaha! e ke kanaka, owai la hoi oe ke hoahu aku i ke Akua? E pono anei i ka mea i hanaia, ke olelo aku i mea nana i hana, No ke aha la oe i hana mai ai ia'u pela?
                Aole anei e hiki i ka potera ke hana iho noloko o ka popo lepo hookahi, i kekahi ipu no ka mahaloia, a i kekahi no ka mahalo ole ia?" Roma 9. 20-23.
                "Aole anei au e pono ke hana aku me ka'u mamuli o ko'u makemake? Ua hewa anei kou maka i ko'u lokomaikai?" Mat. 20: 15.
                Auwe ka mea paio aku i ka mea nana i ai hana! Pono no i na mea lepo ke paio me na mea lepo o ka honua, e olelo anei ka lepo hana kiaha i ka mea nana ia e hooponopono, Heaha kau e hana ai. Isaia 45: 9. Na KUNUI.

NO KE KANAKA MOLOWA A ME KE KANAKA MAHIAI.
Mokuna I.

                NANA ae la na maka o ka mea molowa, a ike ae la i ka waiwai o ka mea molowa ole.
                2 Lalau ae la ia me ka maka wiwo.
                3 I kona ai ana i ka hua a kona lima haumia, kalea wale kona puu, a wikiwiki no hoi kana ai ana.
                4 O ka ai ana a ka mea aihue, he ono ole ia a me ke okaokai.
                5 Aia no kana hakina ai ma kona kileo.
                6 Ua loaa no hoi ia ia ka uku no kana hana ana.
                7 O ka mea molowa hana ole, palaualelo, hele wale aku no ia i ka hale o ka mea lako e makilo ai,
                8 Ka mea i hoomanawanui i ka hana, i ka wela o ka la a me ka ua.

Mokuna II.

O KA lima o ka mea lako, ua manoanoa ia i ka hana,
                2 Ua loaa ia ia kana mea ai me ka oluolu, a me ka hookani hewa ole ia.
                3 Loaa no ia ia kana ai me ka hauoli a me ke alohaia mai,
                4 Aole hoi ona hilahila, aole hoi loaa ia ia ka nalulu ana ma kona poo,
                5 No kona nele ana i ka ai a me ka ia.
                6 Hauoli nui no ka mea mahiai, no na hua nani o kona hoohiwahiwa,
                7 A me na mea uliuli maluna o kona laa kihapai.
                8 Kani mai na manu leo lea iluna o ko lakou mau lala.
                9 E hoolea ana i ka hiwahiwa o ko lakou kahu.
                10 Nana pono ae la ke kanaka makemake i ka hua o kona kihapai maluna.
                11 Makaala no hoi oia i na holoholona, o pau auanei na laau o kona kihapai.
                12 Hauoli nui no ka mea mahiai, no kona ike ana'ku i na kuaua mua e haule ana.
                13 Aole ona makau i ke anu, aole hoi i ka wela.
                14 Aole pipili mau kona mau maka.
                15 E like a e na maka o ka mea manaka, palaualelo,
                16 Aka: makaala mau no oia i ka po a me ke ao.
                17 E kiai pono ana i kona haawina.
                l8 A hana no me ka pololei, a me ka pono io imua o kona haku. KALAMA.

NO KA MAHAOI.

Punahoa, Sepatemaba 10.
                Auhea oukou, e na hoahanau, a me na hoalauna. Eia kekahi mea pono ole a'u i ike ai ia oukou. O ke noi wale ana aku ia hai i wahi sopa a i wahi lole, a i wahi palapala, a i wahi buke, a i himeni, a i wahi pepa, i peni, i hulu, i kui, a i lopi, a i pahi, a i kela mea i keia mea a ka hoahanau, me ke noi wale aku, aole me ke kumu kuai pono.
                Eia ko'u wahi manao ia oukou, mai noi wale aku, he mea ia e ilihune loa ai kou hoalauna i ko'u manao ana ea: Eia ka pono loa, ua haawi mai ke Akua i na lima e hana ai, e imi i ke kumu kuai, a i ole ia ea, e hoolimalima: a i ia he mea palupalu, a ilihune, pono no e haawi wale aku.
                Eia kekahi pono, e like me ka Solomona 10:2. "O ka waiwai i loaa wale mai ma ke noi wale ana, aole i he mea e pomaikai." Pauku 4 kekahi, penei. "O ka lima hoopalaleha i ka hana, he mea ia e ilihune ai, aka, o ka lima hooikaika mau i ka hana, he mea ia e waiwai ai.'' Eia kekahi ma 12: l. "O ka mea makemake i ke aoia, oia ka i makemake i ka ike, o ka mea hoowahawaha i ke aoia mai, he holoholona ia.''
                Eia ka, pono, e hana no me ka ikaika a ke Akua i haawi mai ai.
                Auhea oukou, e ka poe e heluhelu ana i keia wahi manao, e heluhelu oukou me ka noonoo pono i ka pili ana o keia olelo ia oukou, a e hana aku e like me ka ke Akua kauoha.
Na S. HAANIO.

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki, $0,50, a na mea e lawe i ka pepa a pau.