Ke Kumu Hawaii, Volume IV, Number 9, 26 Kepakemapa 1838 — Page 36

36 KUMU HAWAII. (SEPATEMABA,

makaainana ma Beritania, a ma Farani, a ma Asia a pau, a me Aferika a pau, a ma Europa a pau, a ma Amerika Akau, a ma Amerika Hema, a ma Nu Holani, a ma na moku a pau o ka moana. Ua hemo no ka aina o na makaainana ma Hawaii nei, ua ike no au, a ua lohe, a ua hilahila no au i ko Hawaii nei hoohemo ana i ka aina o kanaka. Aole no ka aie ka hoohemo; aole no ka inu rama ana; aole no ka malama ole; aole no ke kolohe; aole no ia mau mea ino a pau ka hoohemo aina. No ka lealea wale ana o na hakuaina no, aloha ino ke kanaka i kona hemo wale ana, a i kona ai ole ana i ka hua ana i kanu. Hooikaika paha kekahi a kukulu i kona hale, a kanu i kana huli, a me kana uala, a me ke ko, a me ia mea aku a ia mea aku; a aneane hiki mai ka manawa ohi, o ka hemo no ia, na hai, a na hai i ai i kana mea kaau; aka, o ka mea nana i kanu, ua kipaku nele ia. Aloha au i ka mea i hemo i kona pololi ana, a i ka lilo hewa ana o kona waiwai.
                Ina e ninau hou mai ka mea e heluhelu ana, Auhea la ia mau aina maikai elua, aole i hemo ko laila makaainana? Ke olelo aku nei au, aole loa ma ka honua nei. Aia no ia mau aina i ke ao o ke Akua. O ka lani ka inoa o kekahi, a o ka luaahi ka inoa o kekahi. Aole loa e hemo iki ka aina o na makaainana o ia mau aina. Aole manao iki ma ka hoohemo na'lii o ia mau aina. O Iesu, oia no ke Alii lokomaikai o ka lani. Aole oia e hoohemo mai i kekahi o kona poe makaainana Auhea oe, e ke kanaka i hemo ka aina? mai manao nui oe i keia aina hemo wale. Aka ea, e imi ikaika oe e komo ae iloko o ka lani, kahi e kuonoono ai oe, aole hemo hou. Aole he alii lauwili ko ka lani. Aole e pau koke ana kona makemake ia oe. Aole ia e lawe i kou aina a haawi no hai. Aole mea noi i kou aina malaila. Aole e lilo kou kihapai ma ka lani i ke noi wale ia e na punahele a ke'lii. Ina e kukulu oe i kou hale ma ka lani, he hale maikai; nou mau loa ia, aole e hele kekahi enemi ou i ke'lii a noi mai i kou hale nona. Ina e kanu ae ka laau hua maikai, nou wale no ia, aole ia e lilo no ke kuko o hai. Aole mea e hemo ai ka aina ou malaila. Aole au aie e lilo ai kou aina, aole hoi ou hewa i hemo ko aina, aole ou makamaka ole e hiki aku ai ma ka lani, aole hoi oe e ilihune ana malaila i mea e hemo ai kou aina. He lokomaikai ko ka lani alii i na makaainana ona a pau. Aole ia e kuko ana i kau; aole ona huhu wale; aole ona alunu; aole ona puniwaiwai; aole ona e hoolohe ana i ka poe e noi wale ana i kau. Aole hemo ka aina o ko ka lani makaainana. Aole e komo ana ia hewa maloko o ia aina maikai. Aole loa e lilo ana kou pomaikai ia hai, ke hiki aku ma ka lani.
                O ka lua ahi kekahi aina hemo ole. O ko laila poe kamaaina, ua kamaaina loa; aole loa e hemo iki lakou. O ke kiaaina o ia wahi ino, aole e hiki pono ia ia e hoohemo i na makaainana, ua papa mai ke Alii, o Iehova, aole loa e hemo na kanaka, no lakou no ko lakou kuleana malaila, aole no hai; he aina ino, aole oluolu iki, aole ai, aole wai, aole kapa. He wela he eha maoli; he eha wale no, he eha pau ole ko ia aina. E ake no ko laila poe e hemo, a e hele i ka aina e, i ka ama maluhia, a me ka oluolu. Aole ala e hiki ai. E pule ikaika uanei lakou i ke Akua e hoohemo mai ia lakou aole ona ae mai. E imi mau ana lakou i kahi e pakele ai, aole no e loaa iki. Ua haawiia mai ko lakou kihapai  ia lakou, aole loa e hemo lakou.
                Auhea oe, e ka mea heluhelu ana, O ka lani o ka lua ahi, owai ka maikai? he mau aina hemo ole no la. Aole anei e pono oe ke imi oe i kuleana nou ma ka lani? Aole anei oe e pono ke hele ma ke kuamoo i ka lani? Aole anei oe e pono ke haalele koke ae i na mea e hele ai oe i kela aina ino. Ina e loaa ia oe ia aina ino, o ka pau no ia o kou pomaikai, o ka eha a me ka poino wale no koe. Nolaila, e noonoo koke oukou, ea; a e mihi koke no i loaa ia oukou ka lani, kahi e pomaikai mau loa ai oukou.
H. R. HIKIKOKE.
 

KULANUI, Augate 7.
NO KA MAIKAI O KA NAAUAO.

                O ka naauao, oia ka mea i makemake nui ia e na aina naauao, oia hoi ka mea e ikaika nui ai lakou.
                Aia ma na aina ma kahi i ao nui ia'i ka naauao, ua ake nui no lakou e loaa ia lakou ka naauao, a me ka ike, oia hoi ke kumu o ko lakou ikaika, a me ko lakou lanakila ana maluna o na aina a pau kahi i hoopioia e lakou.
                Pela no, ua ikea ka naauao he mea ia e waiwai ai, oia no hoi ke kumu o ka ike i na mea pohihihi i hunaia.
                Ke huli nei na kanaka a pau o na aina naauao i ka mea e pono ai ko lakou noho ana.
                He mea maikai ka naauao. Eia ka maikai o ka naauao. O ka ike nui i kekahi mau mea e pono ai kona noho hemahema ana.
                Iloko olaila ka waiwai a me ka noho pono ana, a me kela mea keia mea.
                O ka ike i na mea pohihihi i hanaia ma na aina a pau.
                O ka hele mau ana i ke kula, me ka molowa ole, oia ke kumu o ka ike a me ka naauao. Na'u na PAALUA.
 

KAHI MELE.

KA A. E. I—

1 Ka A, E, I, Me ka maikai,
Ka'u ia e ao nui nei;
Ke nana nei au
I na pepa a pau,
A ike i ka A, E, I,
Mele A, E,
Mele L, K,
A ike i ka A, E, I.
 
2 Ke ao nei au
I na hua a pau,
Hauoli no kuu naau;
Ka O, U, H, M,
Ka L, P, W, N,
A pela na hua a pau.
Mele A, E,
Mele L, K,
Mele i na hua a pau.

3 Ina i paa,
Ka lalani A
Maloko o kuu naau,
Mapopo ia'u
Na olelo a pau,
Ma na buke Hawaii a pau.
Mele A, E,
Mele P, W,
Ma na buke Hawaii a pau.
L. L.
 

MAKE.

                Ma Honolulu, i ka la 13 o Sepatemaba nei o Nihoa, ke kaikamahine a Punihaole, he umikumamalima kona mau makahiki.
 

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki, $0,50, a na mea e lawe i ka pepa a pau.