Ke Kumu Hawaii, Volume IV, Number 5, 1 August 1838 — Page 18

18 KUMU HAWAII. (AUGATE,

ka Uhane Hemolele iloko o ia poe make, a ua hoalaia mai hoi e ka Haku e Iesu. He kupaianaha kona manao wale iho.
                I kakahiaka poalima halawai hou ma Keaau, haiia keia olelo; Epeso 5: 14, ka hapa o ka pauku: " E ala'e oe e ka mea e hiamoe ana, e ku ae hoi mai ka make mai, a na Kristo hoi oe e hoomalamalama mai.'' Aole anei i ala mai ka poe hiamoe ma ke kae o ka po?
                Ua manao iho la au ua hanu mai ka Uhane Hemolele o Iesu me kona aloha, a me kona hoala ana mai ia lakou me ka uwe ana. Auhea oukou e na hoahanau? e hiki anei i ka poe ola ke uwe? Heaha ka popilikia o ka poe ola? No ka poe mai no ka uwe ana a me ka haalulu. Holo lanakila mai la ko Iehova kaa ola maluna o ia wahi. A pau ia, hele aku ke kahuna halawai ma Makuu, Hoikeana 1: 3. "E pomaikai ana ka mea e heluhelu, a me ka poe lohe i na olelo o keia wanana, a malama hoi i na mea i palapalaia maloko, no ka mea, ua kokoke mai ka manawa." Pela io no, ua kokoke mai ka manawa no oukou e na'lii, a me na makaainana, me na hoahanau mai Hawaii a Kauai. E heluhelu oukou i na mea i waihoia maloko o keia Kumu Hawaii. Hele aku la, halawai ahiahi i Haiakahiula. Hoikeia keia olelo, Hebera 7:5. "E hiki mau ai ia ia ke hoola i ka poe i hele i ke Akua ma ona la.'' O na mea hiki ole i kanaka e hiki no i ke Akua ke hoohehee i ka naau paakuku.
                Ua like ka Iesu olelo me ka hamare, e hiki no ia ia ke noho paa me kona noho aloha, a me ke kukulu paa ana o kona aupuni.
                I ka poaono hoomakaia ka pule hoomau ma Puna. I ka hora awalu, halawai kamalii, wehewehe aku la ke kauwa a ka Haku i na mea i make ai na keiki. Puiwa lakou no ka weliweli, no ka mea, ua make lakou i na hala a me na hewa. Manao iho la au ua iho mai ka Uhane Hemolele no ka uwe ana o na keiki, a i ka pule ana, aole lohe maopopo ia ka leo o ke kahuna; no ke kupinai ana o ka leo o na kamalii, a me na makua, a me na hoahanau iloko o ka Haku. Halawai hou, hai aku la ke kahuna i keia olelo. Hoikeana 22:20. "E hele mai e ka Haku, e Iesu.'' He olelo pule keia, ua hele io mai no ka Haku me ka hooho o kona leo mana maloko o ka waha o kana kauwa me ka pahi oi lua; ua ike no kakou e na hoahanau, aohe alii koa ole ma ka honua nei, aole anei pela o Kristo i kona poe koa, ua kanuia ke aloha e ka Haku, ua ulu me he weuweu la, ua hina ka poe kiekie malalo o ka leo, no ka mea, ua ike kakou i ka hana a ka makani, ina pa mai ka makani me ka ikaika nui, ua hina na laua a me na hale, o kela mea keia mea. A pehea ia? Aole anei pela ka ka Uhane hana ana?
                La Sabati, Ioane 11:28. "Ua hiki mai ke Kumu ke hea mai nei ia oe." He mea maopopoia i ka ke Akua hana ana ma Puna; ua hiki io mai ke Kumu, ke hea mai nei i ka poe hoomaloka, a me ka poe hoopunipuni, a me ka poe moekolohe, a me ka poe aihue, a me ka hakaka a me ka poe puniwaiwai, a me ka poe puhi baka, a me kela mea hana hewa keia mea hewa, ke hea mai ia oe e komo iloko o Kristo i ola. Aole anei oukou i ike, aole e loaa ke aupuni o ke Akua i ka poe hewa. Pehea ka pono o ia? O ka mea hewa mau no kona hewa, o ka mea paumaele mau no kona paumaele, ke ole e paulele aku ia Iesu.
                Poakahi, Hebera 12:25. "E malama oukou, mai haalele i ka mea nana e olelo mai.'' Mataio 25: 31. "A hiki i ka hopena o ia mokuna. Poalua, Ioane 7:37. Hoikeana 20:15. Poakolu Ioane 15: 9. "E noho oukou iloko o kuu aloha.'' Oia ka olelo hope o ko Iesu hoi ana aku i ka lani. Pomaikai ka poe iloko o ke aloha hookamani ole.
                A hana mai ke Akua ia makou me ke aloha e kukulu i kona aupuni, ua anai mai ke Akua i ka mea haumia maluna paha o ia mau okana aina, ua uhukiia ka awa, a me ka baka, e mahuahua auanei paha ka pono ma Puna i keia wa, no ka mea, ua hoomakaukauia na waoakua uhane no Iehova.
                A haalele makou ia Puna, halawai hou ma Pohoiki. Io. 15:9. Opihikao,ahiahi a halawai. Isa. 11: 40. Poaha Is. 40: 3. E hoomakaukau oukou i ke alanui o Iehova'' Mat. 3:10. Poalima, Luka 10: 42. "Hookahi no mea e pono ai." A haalele makou ia Opihikao, halawai ma Kehena. Io. 5: 25. "Ua hiki mai ka manawa.'' O neia hoi ia, e lohe ai ka poe lohe i ka leo o ke Keiki a ke Akua, o ka poe hoolohe, no lakou ke ola, ua hookomo ke Akua i kana pahikaua oi lua iloko o ka poe lohe, ua haalulu lakou i ka olelo a ke Akua me ka uwe, he mea mau ia hana kupanaha a ke Akua ma ia mau mokuna aina.
                I ka poaono hoomaka ka pule hoomau ma Kalapana, i ka hora 8. Halawai okoa na hoahanau e pule no ka hana a ke Akua e hana mai iwaena o ke ao nei, no na kamalii. Aole haalele ke Akua ia mau pule hoomau, no kona makemake wale iho e huki mai ia lakou, mai ka make mai. Ua iho mai ka Uhane maluna o na kamalii. Mai Keaau mai kekahi, mai ia mau okana aina i hahai mai e hoolohe i ka ke Akua olelo. Eia na olelo no keia pule hoomau a lakou e lohe ai, Hoikeana, 22:17. Isa. 40: 10. 2 Kor. 4: 5 6.
                Sabati, Lunakanawai 3: 20. "He mea ka'u ia oe na ke Akua mai.'' He olelo a ke Akua i ke'lii o Moaba. Nui kona hoomaloka i ka Iehova olelo, ku e aku ia i ka Iseraela, hoouna mai la ke Akua ia Ehuda i ke alii o Iseraela me kana pahi kaua oi lua, hookahi kupita ka loihi oia pahi. Hele aku la ia Eselona i ke 'lii o Moaba, ua hemo wale na pani o kona mau kaena, komo aku la a e noho ana, i aku la ia, "He mea ka'u ia oe na ke Akua mai," ua paa ka maka o kana pahi i kona hua, he kanaka konahua nui o Eselona, ua make koke ia no kona hoowahawaha ia Iehova. Auhea oukou e na'lii a me na kanaka hana hewa? E hoomanao oukou ia Eselona. Eia hoi, ua paa ka maka o ka pahi kaua a ke Akua i ka momona o ko kakou hewa, o ka uku no ka hewa he make ia? nolaila e hoomanao aloha kakou ia Iesu i ke'lii o na'lii i ka Haku o na Haku, i ke ola o ke ola, i ka pono o ka pono, i ka pomaikai o ka pomaikai, ma ka hilinai ana aku i ko Iesu koko waiwai io, oia ka waiwai io aku o ka poe hooikaika waiwai, o ka olelo i haiia e kana kauwa, Mataio 3:2. "Nana oukou e bapetizo i ka Uhane hemolele a me ke ahi.'' Pomaikai ka poe bapetizoia i ka Uhane Hemolele; poino ka poe i bapetizoia i ke ahi lapalapa. Iakobo 2: 26. Kinohi 3: 9. "Auhea oe." Ioane 21: 17. "Ke aloha aku nei anei oe ia'u.'' Poalua Ioane 5: 28, 29. I kakahiaka halawai kamalii, a halawai na hoahanau ma kekahi hora. I mai la ke kahuna, e hoomau oukou i ka pule a pau kela halawai; ua kanaono paha na hoahanau e halawai ana; hai mai la ke kahuna, i mai la, Ua loaa ia'u ka manao i keia la, ke manao nei au he ahaaina a ka Haku i keia la. I aku la au, He mea kupanaha ia a ka Haku ma Kalapana nei. I mai la ke kumu, a pau ka halawai, e hele aku oe e Kuahopu, ma Kauwale, ma ka hale o ka mai lolo, malaila ka ahaaina a ka Haku i ke ahiahi, e ninau aku i kona manao, a pau ka halawai, hele aku la au e kamailio me ua mai lolo la. Ninau aku ia ia, Ua paa anei kou makemake ia Iesu? Ae, oia ka'u kane mare; nui ko'u aloha ia ia ; nona wale no ke ola ana e ola nei. I aku la au, He wahi hana ka ua kane mare la au i keia la, e noonoo oe. Ninau aku ia au ia ia, No ka poe hea ka ahaaina a ka Haku? Heluhelu mai no hoi ia ma keia ninau, O ka poe e pono ke ai i ka ahaaina a ka Haku, ua ike lakou i ka imi i ke ano o ko lakou naau iho, ua ike lakou i ko Iesu makemake, a me kona