Ke Kumu Hawaii, Volume IV, Number 4, 18 July 1838 — Page 14

14 KUMU HAWAII. (IULAI,

NO NA MANU.
KA OSETERIKA.

                Ma ka aina wela loa o Aferika, kahi i loaa'i ka Oseterika. Aole manu e ae i oi aku kona nui mamua o ka Oseterika. Mai ke poo a hala loa ilalo, ewalu kapuai, eiwa paha ke anaia. Ua loihi ka ai, aole hulu ilaila. Ua nui ka uha a ua io. O na wawae, ua puni ia i na unahi manoanoa; a ua maheleia na kapuwai, i elua manamana.
                Ua eleele na hulu, a he keokeo hoi kekahi. O na hulu ma ka puapua a ma na eheu, oia ka mea waiwai loa o ka Oseterika. He mau mea ia e nani ai na papale, a me na poo o na wahine ma na aina naauao; nolaila, i imi ai na kanaka ia lakou, a hoohei i ke kaula a make, no na hulu maikai wale no. Ua ikaika loa kona opu, nolaila, e hiki no ia ia ke ai i na mea ino he nui wale, o ka ili kamaa, o ka lauoho, o na pohaku, o ke aniani, a me na mea like he nui loa, oia kana ai. Ua mama loa ka Oseterika i ka holo ana. No ke kaumaha o kona kino, aole e hiki ia ia ke lele iluna; aka, o na eheu ona, e kokua nui laua, i ka holo ana. Ina e hele pololei aku ia, aole e hiki i ka lio ke alualu ia ia; aka, i kona holo keekee ana, e hiki no. Aia maloeloe ua manu nei, e huna oia i kona poo malalo o ke one, me ka manao, ua nalowale kona kino i ka uhi ana o ke poo; alaila, paa no ia i ke kanaka.
                He makuwahine aloha ole ka Oseterika wahine; aole manao iki i kana hua; waiho no ma ke one, a haalele koke no; aole hoopunana iki maluna o lakou; o ka la, oia ka mea e hoopumehanaia e hoohanau ai na keiki; Ioba 39: 13, 14. O ka makuwahine, aole ia e kuhikuhi aku i kana mau keiki i ka ai; aole aloha aku ia lakou. Haalele wale iho no.