Ke Kumu Hawaii, Volume III, Number 22, 28 March 1838 — Page 87

1838.) KUMU HAWAII. 87

                Ulu ka hewa ke pio ka maikai.
                Eia kekahi.
                Apopo e make paha.
                E mihi oukou i ola.
                I ka lani ka olioli.
                Ololi ke ala e ola ai.
                Laula ke ala e make ai.
                He mea ino ka hewa.
                He mea maikai ka pono.
                Kakaikahi nae.
                Lapuwale ka naaupo.
                Make ka uhane ola.
                Noho wale he hewa ia.
                Pili ka hewa i ka ino
                Pili ka pono i ka maikai.
                Wahahee he hewa ia
                Hoopunipuni he hewa ia.
                Aihue he hewa ia.
                Moekolohe he hewa ia.
                Kuko wale he hewa ia.
                Hoopalaleha he hewa ia.
                Eia kekahi.
                Berena he mea ai.
                Diabolo he uhane ino.
                Fiku he hua ai ia.
                Gaberiela ka lunaanela.
                Roma he kauhale nui.
                Samesona ka ikaika.
                Talena he waiwai ia.
                Vinega he wai awahia.
                Zizania he hua ino.
                Eia kekahi wahi manao o'u ia oukou, e ka poe heluhelu ana i keia olelo.
                E heluhelu oukou me ka noonoo pono i ke ano o na hua olelo i hoakakaia ma keia palapala.
                E ala'e ala, e aahu i ka ikaika.
                O wai ka mea i loaa ia ia ka wahine pono.
                Aka i hoolohe ole oe i ka leo o Iehova kou Akua, e malama, a e hana hoi i kana mau kauoha a pau, a kona mau kanawai a'u e kauoha aku nei ia oe i keia la, alaila e ili mai ai maluna iho ou keia mau poino a pau, a loaa aku oe ia lakou. E poino oe ma ke kulanakauhale, e poino hoi oe ma ke kula. E poino oe i kou komo ana iloko, e poino hoi oe i kou hele ana iwaho.
                O ke kanaka i ao pinepine ia a hoolea i kona ai, e make koke ia aole mea e ola'i.
                O ke kanaka e ake ana i ka naauao, hoohauoli oia i kona makuakane.
                Na Iehova e hooili mai maluna iho ou ka poino, ka weliweli, a me ka hoino ma na mea a pau a kou lima e lawe ai e hana, a e luku ia mai oe a make koke oe; no ka hewa o kau hana i haalele mai ai oe ia'u.
                Mai haawi aku i kou ikaika i na wahine, aole hoi i kou aoao i ka mea e make ai na alii. Na'u keia wahi manao, Na'u na HAANIO.

KE KUMU HAWAII.
WENEDE, MARAKI 28, 1838.

                LAIE. Ua pau kekahi hale i ke ahi mai ka lani mai, Feb. 25. Mai make he wahine. Ua make loa eiwa puaa, hookahi ilio, hookahi moa.
                NA HALAWAI LOA. Halawai loa ma Laie, mai Maraki 13 a hiki i ka la 19. He umi kumamalima haneri kanaka paha i akoakoa ai. Ua lohe pono lakou i ka olelo, aole akaka loa ko lakou malama, aole akaka ko lakou malama ole. "Ma ko lakou hua i ike aku ai kakou."
                Halawai loa ma Honolulu no na kamalii i keia mau la. He halawai loa ma Waikiki, Mar. 20. 21, 22.
                Ua lohe makou, e ala ana na kanaka ma Molokai, a ma Kauai, a ma Maui no hoi, a ninau aku kekahi poe, "Heaha ka makou e hana ai, i ola makou?''

HE AHI MAI KA LANI MAI.

                LAIE, Feb. 20, 1838. He la Sabati ia. A ia po iho, hoopuka mai la o Iehova i ke ahi mai ka lani mai maluna o kekahi hale, aia i ka hora akahi a me ka hapalua. He mea kupanaha ka hana a ka Haku ia po. Eia kana hana.
                He ahi mai ka lani mai a komo iho la ma ka wa kihi o ka hale, loaa iho la na wahine malalo o ia wahi i luna o ka hikiee, a make iho la ka ilio ma na wawae o laua, a lilo aku la na wahi kapa i ka ili a me na wahi lole ma ka paia, a maule iho la ke kaikamahine, a nana aku la ka makuakane e ua mai ana na wahi kapa o laua auwe io la ia, "Auwe kuu kaikamahine!"
                No ka ua no ka keia hekili, a ku ae la ia, a hapai i ke kaikamahine, a puka la iwaho a pakele laua, a me na ilio elua, eia na inoa o laila o Kaawi ka makuakane, o Ahukini ke kaikamahine. Aka hea aku la o Kaiwi, "Auhea oukou e, mamamake maua e! Kahea mai la lakou mai kekahi hale, hele mai.''
                Kahea hou mai la laua, "Aole maua e hiki aku ua make kuu kaikamahine."
                I aku la lakou i nui ke aho a hiki ia nei. A holo aku la kekahi kanaka a loaa laua, i aku la ia, e haele aku. I mai la ia, "E hapai aku oe i kuu kaikamahine." I aku la ia, "E haawe ma kuu kua.''
                I mal la ia, "Aole e hiki ua make loa." A hapai aku la, a hoi aku la lakou a hiki ma kekahi hale, a hoaia ke kukui iloko o ka hale, a lomiia iho la ka mea i make a ola ae la.
                Eia na mea i make, a me na mea i ola, eiwa puaa, hookahi ilio, hookahi moa, elua waa, hookahi upena a me na buke, o na mea i ola maloko oia hale, elua wahine, elua ilio, eha moa, hookahi puaa. He mea kupanaha ka hana a ke Akua i kona lawe ana i na holoholona, a waiho mai no i na wahine, ina paha he manao luku kona, i na paha ua make keia mau wahine a me na kanaka a pau loa ma Laie nei. Aka o keia hana a ke Akua ma Koolau nei he leo no ia e kahea mai ana i ka poe hookuli a me ka mihi ole, a me ka hoolohe ole, a me ka paakiki o ka naau me he mau ala la no kahawai la. Ua hea mai ka leo o ke Akua mai ka lani mai, e ka poe hoomaloka o Koolau nei e huli mai oukou, no ke aha la oukou i hoopanee ai? i na i pololi oukou e hoopanee anei oukou i ka ai, mai hoopaakiki ia oukou iho. Pela mai ke Akua i kahea mai ai. Aole no Koolau wale no keia leo, o ka poe i lawe i keia Kumu Hawaii e heluhelu oukou me ka noonoo nui, a me ka hoolohe aku ia Iehova ka mea nona ka mana e hiki ke hana mai i na hana kupaianaha a pau loa. Na KELIIHULUHULU.

NA NAIA MA KAHANA.

                Eia kekahi mea kupanaha ma Kahana nei, i ka la 14 o Detemaba, 1837 ma ka poalima, hele aku la au ma Kaaawa, i ka hola 10. Noho iho la au malaila a hiki i ke ahiahi ma ka hola 3. Hoi mai la au mai Kaaawa mai a hiki i Makana. Aole na kanaka, a me na wahine, a me na kamalii. Ninau aku la au, he mau luahine e noho ana i ka hale? Auhea iho nei ko oukou kanaka? Ua pau aku nei i ka nana ia. Ninau hou aku la au, Heaha ka ia? I mai laua, he Naia. Alaila wikiwiki mai la ko'u mau wawae a hiki i Puuomahia, nana mai la au i ka poe waa a me na kanaka he nui wale e hopuhopu ana i ka ia maloko o ke kai, hopu ke kane, wahine, ke keiki, ke kanaka ikaika 12 ia, he kanaka malulelule 8 ia, malulelule loa 4 ia, ka wahine ikaika 6 ia, malulelule iho 3 ia, malulelule loa 1 ia, keiki ikaika 4 ia, malulelule iho 2 ia, malulelule loa 1 ia. Eia kahi i pa ai o na ia nei o ka nuku, o ke kuala ma ke kua o ka hui, oia kahi i pa ai ua mau ia nui nui nei. 7 kapuai ka loa o kekahi. 6 kapuai ka loa o kekahi, 3 kapuai ka loa oke ana puni o kona nui. Eia ka helu ana o na mau ia nei 206 mau ia i make, ua aiia e na kanaka kona io. Eia kekahi waiwai no ua ia nei, he aila. Ua piha na omole a me na lapalapa, a me na puna ohe oia ko makou kukui e puhi nei, ua okioki na kanaka a maluhi, ai mai ka ilio, ai ka puaa, ua pilau ke kai a me na muliwai 3 a me ke kula. Oia ko'u manao hoaloha ia kakou a pau loa. Na'u na NAILI.