Ke Kumu Hawaii, Volume III, Number 15, 20 December 1837 — Page 60

60 KUMU HAWAII. (DETEMABA,

aole huhu, aole ikaika, aka he olelo oiaio ole ia olelo. He huhu no ka ipuawa, komo uuku ma ka waha naha huhu no, a o ke koko no kekahi, a ina e mahuahua iki o ke komo ana ma ka waha make no ka mea nana e ai. Pela no ke halalo mai, aole naha i ka hana uuku, aia nui alaila naha, huhu no ka naha, moku ke aa liilii maloko o ka naau kahi e hiki aku ai ka laau. He naha hoi ko ka ipuawa ke hamo mawaho ma ka ili. Ikaika no la!
                O ka WAIKEA, oia na kukui maka ewalu i kuiia me ka wai, keokeo ka wai i ka aila o ke kukui.

No ka mai.

                Olelo na kahuna nana i haha ia Kapohiwa, he mai nui kona, he mai make,—Eia ke ano o ua mai la, he mea loihi a me ka eeha, piko, e waiho pololei ana mailuna a lalo, elima paha, eono paha iniha kona loa. Kapa aku la lakou i keia mai he POU ka inoa, i mai la aia liuliu make no, ke loaa ole ka laau i ua mai la. Olelo lakou i loaa keia mai ia lakou ma ka haha ana ma ka opu. Olelo o Kanalu aole keia mea oolea maloko o ka naau, mawaho no a pili pu paha me na naau. Hoole mai o Kaniku, maloko no wahi ana, no ka mea aole loa e hiki ke hemo i ka naha ana o ka naau ke waiho ia mea mawaho o ka naau; he oiaio no keia, aole loa e pili ka laau ma ia mea a hemo mai ke moku ole ka naau, a moku ka naau helelei ka lepo maloko o ka opu a hele hewa no. Malia paha o ka hana iho la no ia o ka ipuawa, o ka moku me he pahi la, ka naau o ke kanaka a puka mai la ka mai a hemo!!! Make no hoi ke kanaka ia hana ana, nolaila paha, hoole kekahi poe kahuna i ka manao o Kanalu, i mai, Aia maloko o ka naau kahi e waiho ai ua Pou nei. Aole lakou i ike he hiki ole i ka mea oolea ke waiho pololei maloko o ka naau mailuna a lalo. He waiho poai ka naau a anapuu a puni ka piko, nolaila hiki ole ka mea loihi oolea a me ka loihi ke waiho maloko, e hiki paha i kekahi mea loihi ke moe kea a waiho maloko. Aohe naau pololei mai luna a lalo kahi e hiki ai e noho ua mea kolohe nei. Nolaila paa ka nuku o mea ole wale no ia olelo ana. Aole loa e hiki ka mai ano loihi a me ka oolea ke noho malaila. Eia kekahi mau mea e akaka ai ka lapuwale o ko na kahuna maoli manao he mai ko Kapohiwa. Ua ike pono lakou he ono ka ai ia ia, he ikaika kona mau wawae i ka hele, aole wiwi o kona kino, aohe lena o ka maka, aole hi, aole li, aole keokeo ke alelo, aole haalulu, aole kunu, aole wela, aole aha la? hiamoe no i ka po, hana no i ke ao. O na kahuna wale no ka i ike i kona mai. Heaha la ia mai? He mea oolea a he loihi, aole no he wahi e waiho ai ia mea, aole. He wahine mai ole o Kapohiwa, a ua make i ka laau.

O ka hewa o kona make ana.

                Ua ae mai na kahuna, na ka laau no i pepehi ia Kapohiwa, a ua akaka no ia wahi, aohe mea nana i hoole. Ninau aku kekahi ia Kanalu. Ina aole i lapaauia ua wahine la make koke anei i ka mai? I mai la, Aole make, aka, i mai lakou, aole o lakou manao e pepehi kanaka, he hoola wale no ko lakou manao. Olelo mai he kanaono a lakou aole hoi i make kekahi, o Kapohiwa wale o ka paipai he make no, ua lohe lakou he waiki. Ua ike lakou aole e pono ua laau la no ka mea nawaliwali i ka mai, nolaila koho aku lakou i ka poe ui a me ka poe ikaika. Aole i hanaia ka waiki a me ka paipai i mea e lapaau, aole, ua hanaia i mea e kaulana ai ke kahuna lapaau a i mahaloia oia e na kanaka. Ike aku la ke kahuna i ke kanaka ui paha, he wahine paha, i aku la he mai kou, a haha i ka opu olelo aku la ua loaa, he Pou, a he aha la paha, i aku la. Mamuli puka mai ka mai, aole e pono ke lapaau, i keia wa paha he pono. Koi mai la ke kanaka ia ia e hana mai, hana iho la ke kahuna i ka laau ikaika, o ka mai iho la no ia, make no kekahi poe! Eia ke kumu o ka hewa o ia hana ana, o ka wahahee, aole he mai, ina paha he mai, he mea uuku wale no. E like me kekahi poe paha i hele aku i kekahi hale, olelo aku ua wela i ke ahi, he olelo wahahee wale no, aka, paulele ka koke oukou, wikiwiki aku la kekahi a ninini i ka wai maluna a mawaho a maloko o ua hale nei, wawahi kekahi i ke pili, kiola aku kekahi poe i ka waiwai a pau loa mawaho, a naha kekahi, a nalowale kekahi. Pela e hana ai lakou, a olelo ko lakou luna, Ua pio! Hoomaha iho la lakou. Oki loa ka hale, pono paha ke ako hou a hana hou, pono paha ke wawahi.
                Ina paha e ninau kekahi i ka mea nona ia hale i kona manao i ka poe kinai i ke ahi, e olelo mai paha, He poe lokomaikai lakou, i ole lakou, ua pau paha ko'u hale. O ka oiaio no o ke ahi, oia ka mea e lilo ai ia hana i lokomaikai. Ina paha, pela no ka mai, Pomaikai ua poe la he 60! Pomaikai i ko lakou pakele i ka laau! Oia ka mea weliweli, aohe mai o lakou e make koke ai a e mai ai, o ka laau wale no. Ina paha e kinai ahi kekahi kanaka ma kahi ahi ole, a hana ino aku i ka hale, aole anei e hewa a oia? E hewa no, a e pono no ke uku, no ka naha o ka hale, a me ka ino o ka waiwai oloko.
                Aole loa e ike na kahuna i ka mai, e hiki mai ana ma na manawa mahope loa. Ua akaka nae, oia ke ano o ke kanaka, o ka mai, a me ka make, a no ka makau i ka make, makemake nui na kanaka e lapaau mua i mea e pale aku ai, a hana na kahuna ma na mea ui a me ka ikaika, no ka mea o lakou no ka poe ola paha a pakele paha i ka mai, no na makakiki he nui wale.
                Eia ko'u manao ia oukou a pau e na kahuna maoli, e hoonaauao oukou, mai hana naaupo oukou, o lilo oukou i poe pepehi kanaka. Eia ka hewa nui e haalele ai oukou, o ka hoopunipuni.
                Aia ka olelo pono ma ka Buke Mua, aoao 96. No ka lapaau. E heluhelu oukou ia palapala a e noonoo.
                Aloha oukou,
Na DAUTA IADA.

MAKE.
Honolulu, Dekemaba 16, 1837.

                Make aku nei ma Honolulu ma ka la 11 o Dekemaba, Dauta S. mason he kahuna lapaau Beritania, he haipule. He loihi kona mai ana ma ka moana, a ku ka moku ma Honolulu nei, ua nawaliwali loa oia. Loaa iki ka maha ia ia, laweia mai mauka, a noho me ka nawaliwali i kekahi mau la, a make. Ua maopopo kona manaolana i ke Akua. I mai la, Ua makaukau no na mea a pau a ke Akua e haawi mai ai, no ke ola paha, no ka make paha, ua nui ko'u eha; mamuli akaka lea ke ano o ka ke Akua hana ana. Oiaio kona lokomaikai! e hoonaniia kona inoa!

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki, $0,50 a na mea e lawe i ka pepa a pau.

OAHU MISSION PRESS.—R. TINKER, Editor. E. O. HALL, Printer.