Ke Kumu Hawaii, Volume III, Number 14, 6 December 1837 — Page 53

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, DETEMABA 6, 1837. Pepa 14.

NO KA HAKAKA ANA.

                E nana i keia mau bipi e hakaha ana. Aka, aole he mea pono no na kamalii ke hakaka. Ina e hana lakou pela, ina ua like lakou me na bipi a me na ilio, a me na popoki, a me na bea, a me na liona, a me na iliohae o ka waonahele.
                E na kamalii ua ike paha oukou i na kaokane, e ku ana iluna ma kona mau wawae hope, a ku no ke poo o kekahi i ke poo o kekahi. Ina hakaka oukou, a papai aku, a papai mai, a kui aku, a kui mai, ua like oukou me na kaokane. Makemake anei oukou, e like pela? Aole paha oukou e makemake e lilo i mea like me na kaokane, a me na ilio a me na popoki.
                Heaha ka mea a ka palapala hemolele i i mai ai no keia hana; "Mai hoopai aku i ka ino; a o ka mea nana e papai mai i kou papalina akau; e haliu aku oe ia ia ma kekahi." Mat. 5: 39. Eia kekahi mau hana o ke kino. O ka inaina, ka huhu, ka hoopaapaa, ka mokuahana, ka manao kue. Gal. 5:19-20. "Aole hoi e pono ke kauwa a ka Haku e hakaka." II Timoteo 2:24.
                "No ka mea, ma kahi e huahua'i, a e hakaka ai hoi, aia malaila, ka haunaele, a me na hana ino a pau." Iakobo 6:16.---"E aloha aku oukou i ko oukou poe enemi, e hoomaikai aku i ka poe e pale aku hoi i ka poe hoohewa wale mai ia oukou, a hana ino mai hoi ia oukou.
                I lilo ai oukou i poe keiki na ko oukou Makua i ka lani." Mat. 5: 14-15. O ka Haku o Iesu Kristo, ua akahai loa no ia. Aole loa ia i huhu aku i ka poe hana ino mai ia ia. I ka manawa i papai mai ai ka poe hewa ia ia, aole loa ia i papai aku ia lakou. Ua nui loa na hana ino a lakou i hana mai ai ia ia, aka aole loa oia i hana ino aku ia lakou; aole ia i olelo ino aku, aole inaina aku, aole loa hoi ia i huhu aku ia lakou; aka ua oluolu no ia, a ua akahai hoi, e like me ke keikihipa. Ina hahau oukou i ke keikihipa, a keehi aku paha ia ia, aole ia e nahu mai ia oukou, aole hoi e hana ino mai ia oukou.
                He mea pono no oukou, e na kamalii, e akahai me he keikihipa la, a e noho malie hoi e like me ka manu nunu. Ua oluolu na manu nunu, aole lakou e hana eha aku i kekahi mea.
                I ka manawa i makia ai na kanaka hewa ia Iesu ma ke kea; ua hana eha anei o Iesu ia lakou? Aole. Ua pule aku no ia i kona makua no lakou, i aku la. "E ka Makua, e kala iho oe i ko lakou nei hewa, no ka mea, aole o lakou ike i ka lakou mea e hana nei.'' Luka 23:
34. E hooikaika oukou i like oukou
me Kristo.
                He mea nui i ka manao o na kamalii kane ke aa aku e hakaka. A ina makemake ole kekahi keiki e hakaka, olelo mai na keiki e ae ia ia, he keiki hopohopo, he keiki hee wale. Mai manao i ka lakou olelo mai ana pela. Ua kapaia'ku o Iesu ma ka inoa hewa loa aku i keia. Ua oi ka pono o ka hooluolu i ke Akua mamua o ka hooluolu aku i na keiki hewa. O kekahi o ka poe hewa loa, o lakou ka poe akamai i ka hakaka.
                E hiki no i ka ilio ke hakaka. E hiki no ka iliohae ke hakaka; a e hiki no i ka nahesa ke hakaka; a e hakaka no ka lanalana.
                Eia ke keiki, ke makemake nei anei oe i ka ilio, a i ka iliohae, a i ka nahesa, a i ka lanalana? Ua oi anei ko lakou maikai no ko lakou hakaka ana? E hiki no ia oe ke hele ma ka lani me ka hakaka ole i na la a pau o kou ola ana. Ua makau anei oe, o kapaia mai oe, he keiki hopohopo wale? Ae, pela paha kou ano. He pono ole, ke lilo i mea makau wale. Aka e hiki no ia oe ke haalele i ka hakaka me ka lilo ole i keiki makau wale.
                O kekahi poe keiki hakaka, he hee makau no hoi. Makau lakou, o akaakaia mai lakou. He mea ino, makau wale no keia. E na kamalii, e hooi aku oukou i ko oukou makau i ka hewa mamua o na mea e ae a pau. E makau oukou i ka hana i kekahi mea e hoa ai i ka inaina o ke Akua ia oukou. E makau nui oukou ia Iehova, alaila uuku ko oukou makau i na kanaka. "Mai makau aku hoi oukou i ka poe nana e pepehi mai ke kino, aole nae e hiki ia lakou ke pepehi mai i ka uhane; aka e makau aku i ka mea nona ka mana e make ai ka uhane a me ke kino iloko o Gehena." Mat. 10:28.
A. T.
 

KA HALAWAI LOA, A ME KE KAIMIMIKI.
HILO, Novemaba 6, 1837.

                Sabati mua o Nov. he ahaaina a ka Haku. Ua komo iloko o ka ekalesia 31 ia ahaaina ana. A noa ia Sabati i ka po akahi i ke awakea o ia la, hoomakaia ka halawai loihi ma Hilo nei. Eia ke kumu olelo mua, Isaia mokuna 40:3. "E hoomakaukau oukou i alanui no Iehova." A i ka po alua, i ke kakahiaka, i ka hora awalu, elua halawai ia manawa, hookahi no ka poe kamalii, a kokua na hoahanau ma ka ule no na kamalii ia wa hookahi. A pau ia mau halawai, kani hou ka pele, no ka halawai nui ma ka luakini. Pela no ka hana ana o ia mau halawai a pau. Eia ka olelo mua no ia la, Mataio, mokuna 12: 30. O ka mea aole me au nei o ko'u enemi no ia. A i ke ahiahi, Mataio 6: 24. Aole e hiki i ke kanaka ke malama i na haku elua no ka mea e hoowahawaha ia i kekahi, a e aloha aku hoi i kekahi.

KE KAI MIMIKI.

                A ia po iho hoopuka mai la o Iehova i ke kai, maluna o kekahi mau hale,aia i ka hora ehiku. He mea kupanaha ka hana a ka Haku ia po. Eia kahi i pau i ke kai mai Kanokapa a Waihonu, aole i nui ke kai ma kahi e ae e