Ke Kumu Hawaii, Volume III, Number 13, 22 November 1837 — Page 52
52 KUMU HAWAII. (NOVEMABA,
lakou no i hai maopopo mai i ko ke Akua inoa, a me kana olelo, a me kona makemake, a lohe ua kanaka o Iehova ke alii, alaila, huli mai na'lii, a me kanaka a haalele lakou i ka hewa o ko lakou naau, oia ka mea e maopopo ai ua hiki mai ke aupuni o ke Akua.
15 Eia ka lua, ua kukuluia kona ekalesia ma keia pae aina, ua hoohuli mai ke Akua i ko Hawaii nei kanaka, mai ko lakou hewa mai i ka pono, a lilo lakou i lahuikanaka nona. Ua loaa i kekahi poe ka naau hou, a me ka mihi io, a me ka manaoio aku i ke Akua, a me ka pule mau ia ia.
16 Ua komo kekahi poe alii, a me kahi poe kanaka i ka ekalesia, ua malamaia ka ahaaina a ka Haku, ua bapetisoia lakou, a me na keiki a lakou i ka wai, ma ka inoa o ke Akua ka Makua a me ke Keiki a me ka Uhane Hemolele, he mau mea ia e akaka ai, ua hiki mai ke aupuni o ke Akua io kakou nei.
17 Eia ke kolu. Ua mahele mai ke Akua i na mokuna no kona poe kuhina, oia na misionali mai Hilo a Kauai, ua hoonoho mai ke Akua i mau kumu ao na na kula, ua koho mai ke Akua i kekahi poe o Hawaii nei i mau kumu ao kula, ua kukuluia na hale pule, a me na hale halawai, a me na hale kula, ua ao na kanaka a me na'lii i ka palapala, ua mare pono ia na kane, me ka lakou poe wahine, ua malama pono ia kona la Sabati, a ua hai aku na kahuna pule i ka mooolelo maikai o ko ke Akua aupuni i ka poe ilihune, mai hoakaka mai ana i ka hiki ana mai o ko ke Akua aupuni.
18 Eia ka ha. Ua kauia mai kona kanawai. Hemolele, ma keia pae aina, ua kipakuia ka poe hana hewa mai kona ekalesia aku, ua okiia ka poe kipi, a ku e, a mokuahana, mai kona kanaka aku, ua luku mai o Iehova i ka make, i kekahi poe alii, a me kekahi poe kanaka, i hana ino mai i kona aupuni, he nui no na mea e ae, aole a pau ia'u i ka hoakaka aku.
19 Aka ua akaka loa, ua hiki mai ko ke Akua aupuni, a ua akaka no hoi, o Iehova ke alii maluna o keia aupuni oia hookahi ke alii maluna o na'lii a pau o Hawaii nei a me kona aina a pau.
20 Auhea oukou, heaha ka mea e ike ole ai oukou i ka hiki ana mai o ke aupuni o ke Akua io kakou nei?
21 No keia mea la ea, e o'u hoahanau mai Hawaii a Niihau e, e malama nui oukou iho, mai kipi oukou ia Iehova, o make oukou ma ke kino, a me ko oukou uhane pu, o kiolaia oukou i ka lua ahi pio ole.
22 Auhea ke ola o Namakeha, i kipi ai i ko Kamehameha aupuni, ua make no ia no ke kipi ana. Auhea oukou e ko Hawaii nei? ua oki loa oukou i ke kue aku ia Iehova, mai mokuahana oukou, mai ae maluna a me ka uhane iloko o ka po mau loa.
Auhea ke ola ana o Pokii, a me Kuha, ka mea i ae i ke kanawai o Kauikeaouli, ua make laua ma ia hana hewa i kona aupuni.
Auhea oukou e ko Hawaii nei poe haipule mai o a o? Ua lohe kakou, he auhau ka Iehova ma keia makahiki ia kakou, e haawi aku kakou i ko kakou waiwai, no ka hemahema o kona aupuni ma Hawaii nei.
O oukou e na lii, a me na konohiki, e kokua aku oukou i na kumu ao palapala kanaka maoli, ka mea nana e ao na kamalii o Hawaii nei, e haawi aku i na mea e pono ai ko lakou hemahema, i hiki ia lakou ke ao pono i na kamalii o Hawaii nei.
Aole hoi e auhau aku i na kumu, he mea ia e keakea ai i ka lakou ao ana, aole hoi e auhau i na keiki ao palapala e kau i kanawai maluna o na makua, i lawe ole ia na keiki mai ke kula aku.
E haawi aku i ai, a i wahi kapa no lakou, e hoolako aku i ko lakou mea hemahema, e kokua aku ma ke kukulu ana i hale kula no lakou, pela e hanaia ai na kula a pau o keia pae aina, a ma na kula nui, ina pela oukou e hana ai, ea, alaila, ua kupapanui na kula i makemake ai no kona aupuni.
Eia kekahi; e imi na alii, a me na konohiki, i ka mea e pono ai na makaainana,
a me ke kaumaha loa o ka poe hune e pono e hoomama i ko lakou kaumaha nui.
Eia kekahi; e hoopau i na hana ino, e kau i na kanawai maikai, aole ma ka loaa nui mai o kala e maikai ai ke kanawai, aka, o ka loaa nui mai o ka malu, a me ke kuikahi, oia wale no ka mea e nani ai ke kanawai.
Eia kekahi; mai hookaumaha loa i ka hewa maluna o na kanaka Hawaii, a hoomama i ka hewa o kanaka o na aina e mai; a mai hookaumaha i na makaainana, a hoomama i na 'lii, a mai hookaumaha i na ilihune, a hoola i na punahele, aka, eia ka pono, o ke kaumaha like, a me ka mama like, mai na makaainana a na lii, mai na kamaaina, a na malihini.
Eia kekahi, e imi i mea e pono ai na keiki, a me na moopuna mahope aku a e imi hoi i pono no ka poe e.
Eia kekahi; e noho pono na ekalesia me ke kuee ole, e malama i na kauoha a pau a ka Haku, a hele ekalesia pu, a malama kekahi i kekahi.
O keia mau mea a pau, oia ka makemake nui o Iehova, e haawi aku kakou i keia mau mea no ka hamahema o kona aupuni.
E i mai paha oukou, aole i ike ko makou maka i ko ke Akua aupuni, ua ike makou i ko Kauikeaouli aupuni; eia no kona pae aina o Hawaii a auhea la kona aupuni?
Ke hai aku nei au ia oukou, o ke aupuni o ke Akua, aole ia he mea ai, e ike ai ko oukou waha; aole ia he mea ulu, e ike ai ko oukou mau maka; aole ia he mau kani, e lohe ai ko oukou pepeiao; o ke aupuni o ke Akua, aia no maloko o ka naau. Eia no ia, o ke kupu ana o ka manaoio i ke Akua, o ka loaa ana o ka naau hou no ke Akua mai, a me ka liolio nui i ka Uhane Hemolele; ma keia e e ike ai a hiki mai ke aupuni o ke Akua io kakou nei. DAVIDA MALO.
KAHI MELE.
HE MELE HOOLEA.
E Iesu e aloha mai,
O make au ko kauwa nei.
Ka hunalepo o kou kamaa.
Na weuweu o ko ala nei.
Ina haalele mau mai oe,
Oia ko makou make mau,
Ka make loa i ka po,
Malalo o ka pouli mau.
E kuu Haku, e kala mai.
No'u mau hihia ma nei ao.
Na kou aloha wale mai,
I ola io ai makou.
He mea ole loa wau.
Makou pu me ko keia ao,
Imua o kou maka e,
I kou la e hoi hou mai ai.
Ke kali nei au e Iesu,
A kii mai oe hele au.
E noho loa ma kou nani,
I palekana i ke ao.
DAVIDA MALO.
NO NA MOKU.
HOLO MAI.
Nov. 7, Bramin, Russell, 19 mal 600
" 10, Folkstone, Bliss, 11 " 800
" 11, Catharine, Chase, 28 " 2300
" 13, Spartan, Coffin, 27 " 1000
" 15, Phoenix, Sandford, 33 " 2400
" 17 Sarah and Caroline, Stickney.