Ke Kumu Hawaii, Volume III, Number 12, 8 November 1837 — Page 45

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, NOVEMABA 8, l837. Pepa 12.

O KEKAHI KANAKA NO SAMARIA.

                E ka makua, e kamailio pu paha kaua no ke kanaka no Samaria.
                Ae, e kuu keiki. Ua ike anei oe i kahi a ke kanaka i hele aku ai i kona manawa i eha ai?
                E hele ana ia mai Ierusalema i Ieriko.
                Oia, pehea iho la hoi?
                Hooeha na powa ia ia, a lawe wale i kona kapa.
                Heaha kona kapa?
                Aole akaka. He kihei paha, he palule paha, me ka lole wawae.
                Heaha ke ano o ka poe powa?
                He poe hewa no lakou.
                Heaha ko lakou hewa?
                O ka aihue, o ke kaili ana.
                Ae, oia no. A hala na powa, - owai ka mea i hiki mai la?
                He kahuna pule: aole ia i kokua iki, maalo wale ae la ma kekahi aoao.
                Owai ka lua i hele mai?
                Kekahi pua na Levi. Maalo ae la ia ma kekahi aoao. A o ke kanaka maikai no Samaria i kona hele ana, hiki aku la, a ike aku la ia ia, hu ae la kona aloha ia ia, a wahi iho la kona eha me ka ninini i ka aila a me ka waina iloko a kau ae la ia ia maluna o kona holoholona iho, a lawe ae la ia ia i ka hale hookipa, a malama iho la ia ia.
                E na keiki, o keia mau kanaka a ekolu, owai la ka hoalauna, i ko oukou manao, no ke kanaka i haule iwaena o na powa?
                O ka mea i hana lokomaikai ia ia.
                E hele oukou, a hoohalike me ia.
                "Pomaikai ka poe i aloha aku, no ka mea, e alohaia mai lakou."

NO KA HOOPUNIPUNI.
E hoopunipuni ana ia lakou iho. Iak. 1:22.

                He mea hoopunipuni ke kanaka. Ke hoopunipuni nei kekahi poe ia hai, a ke hoopunipuni nei kekahi poe ia lakou iho. Eia ka hewa e hoakakaia ma keia olelo; o ka hoopunipuni ana o na kanaka ia lakou iho.
                Eia ka mua. Ma ko lakou ano iho i hoopunipuni ai kekahi poe ia lakou iho. Manao lakou lakou iho, he pono, aole nae he pono; he hewa no. Mamua ua lilo loa paha i ka hewa — i ka moe kolohe, inu rama, ku e i ka pono, lealea me na mea like. A i keia wa, ua haalele lakou i keia mau mea, a ke hooikaika nei no ma ka pono, ke pule no, ke heluhelu i ka olelo a ke Akua, a ke hele no i ka pule; a manao iho la lakou, he pono loa lakou, aole nae i loaa ia lakou ka pono io; aole loa i lilo lakou i poe hou iloko o Kristo. He naau kahiko ko lakou.
                Eia ka lua. Ma ke ano o kana pono, i hoopunipuni ai kekahi poe ia lakou iho. Manao lakou e noho a e hooikaika ma ka pono. Aka, aole lakou i ike i ka pono io. Aia ka lakou pono, o ka pule, ka hooikaika, ka hele ana i ke kumu e kamailio pu me ia, a me ka lakou hana maikai ana a pau. O ka lakou pono iho no keia. Aole lakou i paulele ma ko Iesu pono; aole hilinai malaila. Aole makemake malaila, aole manaoio malaila, ma ko lakou pono iho i hilinai ai lakou a noho nanea no malaila. Ke hoopunipuni nei no lakou ia lakou iho.
                Eia ke kolu. Ma ke komo ana iloko o ka ekalesia i hoopunipuni ai kekahi poe ia lakou iho. Manao lakou, oia ka mea e pono ai, a e pomaikai ai lakou i ke komo ana i loko o ka ekalesia. He manao hewa ia, hewa loa. Eia ka mea maopopo; Ina e komo makaukau kekahi kanaka iloko o ka ekalesia, o kona pomaikai no ia: aka, ke komo makaukau ole kekahi, o kona poino nui loa ia. Aole poino like. Nui wale ka poe ekalesia i noho hookamani, a i noho hoopunipuni iloko o ke ekalesia ma keia pae aina. Aloha ino lakou. Aloe paha lakou e pakele i ka make.
                Eia ka ha. Ma ka lohe wale no i ka olelo i hoopunipuni ai kekahi poe ia lakou iho.
                "E lilo oukou i poe malama i ka olelo aole i poe lohe wale no, e hoopunipuni ana ia oukou iho." Pela ka Iakobo olelo.
                Eia ka lima. Ma ko hai hewa a me ko hai pono i hoopunipuni ai kekahi poe ia lakou iho. Ke nana nei no lakou i ko hai hewa, he nui loa; He poe launa ole paha lakou i ka pono, a manao lakou aole hewa o lakou iho.
                Pela no hoi lakou ke ike lakou ko hai pono. Ina paha i huli mai kekahi alii nui i ka pono, pau loa na kanaka malalo iho ona i ka huli mai. Aka, aole lakou i huli mamuli o Iesu mamuli o ke alii wale no. Manao lakou e imi ana lakou i ka pono e ola'i, aole nae he oiaio. Ke hoopili nei no lakou i ke Alii wale no.
                Auhea oukou, e nana oukou ia oukou iho o manao hewa oukou ia oukou iho. Ke manao oukou e hele ana oukou ma ke ala ola, aole ka! e poino auanei oukou. Ua pau.
LIMAIKAIKA.

WAILUKU, Oka. 11, 1837.

                Auhea oe, e KAUIKEAOULI, ke Alii nui o Hawaii nei. Aloha oe.
                Ua ike makou i kau palapala ia Kailihiwa, e kauoha ana ia ia e haawi mai ia makou i ka aina, o Pohakuoukauhi. Ua kuhikuhi mai ia i ua aina nei, ua akaka. Ua oluolu makou i ka aina, aole mea ia e waiwai ai makou, aole loa, aka, he mea ia e pono ai ke kula kaikamahine ma keia wahi. Manao makou ua waiwai iki ke kula. Ina i paa ia i ke pa a puni, a mahi ia a maikai, aole e pololi hou na haumana o ke kula, aole paha e pololi hou na kumu o na kula kamalii a pau loa o Wailuku nei.
                Auhea oe, e ke Alii e. Ke manao nei makou e hoomaikai aku i ke Akua, ka mea nana i hookomo mai iloko o kou naau i keia manao