Ke Kumu Hawaii, Volume III, Number 11, 25 October 1837 — Page 41

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, OKATOBA 25, 1837. Pepa 11.

NO KA ILIO.

                He mea nui kekahi ilio, he uuku kekahi ilio, ua like ole loa lakou. O kekahi ilio, aole i oi aku kona nui mamua o ko ka popoki, a o kekahi hoi, ua like me ka iliohae ka nui.
                Aole ma ka nui o ke kino wale no ka like ole ana. He eleele kekahi, he keokeo kekahi, he ulaula kekahi, he ahinahina kekahi, he olenalena kekahi, he onionio kekahi, a kikokiko kekahi.
                Aole no hoi i like ka huluhulu o kekahi ilio me ko kekahi. He loihi ka huluhulu o kekahi, he pokole ko kekahi, paapu ko kekahi, he lahilahi ko kekahi: he pololei maikai ko kekahi, pii wale no ko kekahi, a o kekahi hoi, he ili wale no, uuku loa ka hulu.
                He iwakalua niho ko ka ilio ma ka iwia luna, he iwakalua kumamalua ma ka iwia lalo.
                O kona mau wawae mua, elima no manamana, a eha hoi kona wawae hope. He maiuu ikaika no ma kela mana keia mana: aole e hiki ia ia ke hoihoi na maiuu iloko, a hoopuka hou iwaho e like me ka popoki.
                O ka io ka ka ilio mea ai nui, aka, pau.
                O ka ilio ka mea koa loa o na holoholona a pau. Ina i kauohaia e kona kahu, e kii aku no ia i na mea hihiu hae a pau loa, a me ke kanaka no.
                Aole holoholona i aloha nui i ke kahu e like me ka ilio maoli. Aole loa ia i kumakaia ia ia, aole no hoi e haalele ia ia, aole loa. Aole haalele ke hana maikai ia, aole ke hana ino ia, aole haalele a make wale i ka hahai ana mamuli o ke kahu. E hiki no i ke kanaka ke haalele i kona hoa maloko o ka hune a me ka poino. Aka, o ka Ilio, aole loa ia e haalele i kona kahu i kona wa e ola ana, a make la, alaila, make pu no kekahi ilio no kona aloha i ke kahu.
                E malama no ia i kona kahu me kona ikaika a pau, a me ka makaala, e like me kona malama ana ia ia iho. A ua like no hoi kona aloha i kona kahu me kona aloha ia ia iho.
                Ina kauoha ke kahu ia ia e malama kona lole, a i kekahi mea e paha, malama no ua holoholona pono nei, me ka molowa ole a me ka haalele ole, a hakaka no ia me ka mea nana e kii aku, a make no i ka ikaika o kona manao e malama i ka kona kahu.
                Ua oleloia, e hiki no i ka ilio kiai ke hoomaopopo i ke kanaka aihue, a me ke kanaka pono, ma ke ano o ko laua hele ana, no ka mea, he hele pee, a he hele hilahila, ko ka aihue.
                Hele pololei kanalua ole ke kanaka pono, aole ona makau no ka mea ua pono ia. Aka, o ka aihue; ua hilahila ia, a he hele wiwo kona hele ana. Ike ka ilio i keia ano lua o laua a kuu wale aku no i ke kanaka pono, aole nahu aku, aka, o ka aihue, paa no ia ia, a manao ia e hele nahu no ka ilio ia ia.
                Ike no ka ilio i ke ano o ka lole a na kanaka e komo ai. Ina i aoia ka ilio pela, malama maikai ao ia i ka malihini i hele mai me ka lole maikai a me ka hana maikai, aole nahu aku ia ia. Aka, ina hele ke kanaka ino, kiai no ka ilio ma ka puka o ka pa, aole hookomo ia ia iloko o ka pa.
                Ma na wahi a pau loa, he makamaka, a he hoanoho ka ilio, no ke kanaka. Aole ia e makemake e noho ma kahi e, me ke kanaka no e noho ai. Nolaila, noho no ia ma na aina a pau i nohoia e kanaka, ma na aina anu a ma na aina wela.
                Ua like na helehelena o ka ilio maoli, me ko ka iliohae; aka, ma ka hana ana, ua like ole loa.
                He huhu ka iliohae, hihiu loa, aka, o ka ilio, ua lokomaikai, a ua hoolohe. He oiaio, hookamani ole kona aloha, aka, o ka iliohae, ina lokomaikai oia i kekahi, haalele hala ole oia. O ka ilio maoli, ina i ao pono ia a pono, waiwai loa ia: aka, o ka iliohae, he mea ia e pau wale ai ka waiwai, e like hoi me na ilio maoli o keia aina. No ka mea, ma keia aina, o ka ilio maoli ka iliohae, pau na kao, a me na hipa a me na pelehu, a me na moa ia ia, aole malama iki ia i ka ke kahu; he kolohe wale no ia. He mea pono ke hana aku ia lakou e like me ka hana ana i na iliohae, e luku loa aku hoi.
                Aole like iki ka ilio me ka popoki. -Manao nui ka popoki i ka hale, manao ka ilio i kanaka o ka hale. Ina hele na kanaka o ka hale, aole hele ka popoki ao ka mea manao oia i ka hale. Aka, o ka ilio, ina hele na kanaka, hele pu no ka ilio, a noho pu me ke kahu wale no. Ina i hele ke kahu a hoi mai, olioli loa ka ilio, aka, o ka popoki, ua oolea loa kona naau, aole manao i ka mea i hele aku, aole hoi i ka mea hele mai. Ina loaa ia ia ka hale, aole ona manao i ka mea e.
                Ina eha ka popoki i ke kanaka; nahu mai no ia a kuha mai. Ina i eha ka ilio, uwe no ia, a hikilele, a hele me ka onioni o ka huelo no ka olioli mai i ke kanaka i hoeha aku ia ia. He nui wale ke ano o na ilio, he ano okoa loa ko kekahi, okoa loa ko kekahi. Aole nae i heluia ko lakou ano a pau He okoa ma kahi aina, okoa ma kahi aina, aole elua ilio i like loa ko laua ano.

WAIMEA, Sepatemaba 18, 1837.
Auhea oe, e Ke Kumu Hawaii;

                Mai manao oe, ua make au no ka'u palahala ole ana i keia mau la. Eia no wau, ke noho nei ma Waimea nei. I ko'u hoi ana mai ma keia aina maikai, loaa ia'u ka oluolu a me ka ikaika, a nui ka'u hana ana.
                I ko'u hoi ana mai, ninau aku la au, "Pehea ka halawai, a me ke kula kamalii?
                I mai la kekahi, "Ua maikai no ka halawai a me ke kula, nui na kanaka, nui na kamalii, aole emi, oia mau no."
                A lohe au ia, olioli kuu naau. Pela no ko'u ike ana. Hele au i ke kula kamalii, ma ka Sabati, nui loa na haumana-lakou a pau - 220. Hele mai