Ke Kumu Hawaii, Volume III, Number 5, 2 ʻAukake 1837 — Page 19

1837.) KUMU HAWAII 19

                4. O ka moe kolohe, he mea ia e huhu ai na kanaka i kekahi i kekahi.
                O ka poe moe kolohe, he poe inaina lakou, he poe hakaka, he poe pepehi aku, a he poe pepehi mai.
                Pehea ka mooolelo no Sekema, ke keiki a Hamora, no ka poe Hivi? Kinohi 34; 1-26. Ua moe kolohe ia me Dina, a nolaila ka huhu a me ka pepehi aku.
                Pehea lakou ma Sodoma? Ua nui ka moe kolohe ana, a na makaukau lakou e luku aku i na anela a ke Akua.
                Pehea ka hana ma Hawaii nei? aole anei i hakaka na kane me na kane a na kane me na wahine - O ka moe kolohe he kumu ia e pepehi ai i kekahi i kekahi.
                5 O ka moe kolohe he mea ia e pau ai na kanaka.
                Ua emi nui na kanaka ma Hawaii nei i keia mau makahiki he kanaha.
                Ua manao o Lono ekolu haneri tausani kanaka i kona wa e pae mai ai ma Hawaii nei; aka i keia manawa ua hooemi loa ia lakou, aole paha he hapa kolu i koe.
                O ka moe kolohe, oia ke kumu o keia emi ana; ina aole e pau koke keia hana ino ana, ina i hoopai mai ke Akua i keia lahuikanaka i ka make, aole paha mea i koe.
                6 Eia hoi kekahi uku no ka moe kolohe ana. O ka make.
                Ua kauoha mai ke Akua i na Iudaio e hoopai i ka poe moekolohe i ka make.
                Ina i hoopai ole ia ka poe moe kolohe ma ke ao nei, e hoopaiia lakou ma ka po pau ole.
                Eia ka olelo, 1 Korineto, 6:9. "Mai kuhi hewa oukou aole ka poe moe kolohe – e komo iloko o ke aupuni o ke Akua.
                Hebera, 13: 4, E hoahewa mai ana ke Akua i ka poe hookamakama a me ka poe moekolohe.
                Epeso 5:5, "Aole o ka mea moe kolohe e noho ana i ke aupuni o Kristo a me ke Akua."
                Hoikeana 21:3, "Aka o ka poe - moe kolohe, e loaa ia lakou ko lakou puu ma ka loko e aa mau loa ana i ke ahi a me ka luaipele, oia ka lua o ka make."
                Hoikeana 22: 15. Aia mawaho – na moe kolohe.
                O lakou, o ka poe moekolohe, aole e komo iloko o ke aupuni o ka lani."
                Auwe ka poe moe kolohe! Ua noho lealea lakou ma keia ao; a ua maa lakou malaila, pehea lakou i kela noho ana mahope?
                Aole mea e lealea ai lakou ma ka lani, ke komo malaila; no ia mea aole o lakou makemake e komo.
                Heaha ka lakou hana ma ka po?
                Malaila ka uwe ana a me ka uwi ana i na niho; aole mea e lealea malaila.
                E ka poe moe kolohe, ano ko oukou manawa e huli ai ika mihi. J. S. E.

KAILUA, Aperila 1, 1837.

                E kona aina e. Aloha oukou.
                1 Eia na manao no ko makou halepule ma Kailua nei, i papaia e ko makou alii a me ka makou kumu; O ka hiamoe, o ka walaau, o ka hawanawana, ina i hana kekahi kanaka a me kekahi wahine ma keia mau mae, e uhauia kona lae i ka laau.
                2 Eia no kekahi mau mea i papaia, aole e pono ke papale ke kane i loko o ka halepule, aole e pono ke noho ilalo i ka wa e pule ai ke kahuna, aole e pono ke nana i ka palapala i ka wa e hoikeia'i ke ano o ka olelo a ke Akua, aole hoi e pono i na wahine ke komo iloko o ka hale o ke Akua me ka uhi ole ia o ke poo, ke hooikaika nui nei na wahine i papale.
                E na mea a pau e komo ana iloko o na luakini o Iehova, ma keia mau aina, mai Kauai a Hawaii nei, hoomaopopo oukou i neia mau manao. Na'u na NAIHE.

KE KUMU HAWAII.
WENEDE, AUGATE 2 1837.

                MAI AMERIKA MAI. Ua ku mai, Iulai 29, ka moku kia lua, o Peru ka inoa, o Kilham ke alii. Holo mai maluna ona he mau misionari eha e noho pu me Mi. Li ma ka muliwai o Kolumebia. Mi. Leslie a me kana wahine me ka laua kaikamahine a ekolu. Mi. H. K. W. Perkins. Miss Margaret Smith, he wahine kane ole. Holo mai no hoi Mr. H. Peirce, Mr. Sheldon, Mr. Grey, Mr. Jarvis, a me Mr. Robinson. Mai Bosetona mai ka moku, o Ianuari, 23 o ka la, kona holo ana.

                MI. IOANE Mc DOWALA. Ua make ia. He kanaka kaulana, ma Nu Ioka, no ka mea hooikaika nui ia o hoohuli i ka poe moe kolohe, a me ka poe hookamakama mai ka hewa i ka aoao pono. Na ke Akua e pani i keia hakahaka.

                E NA HOALAWEHANA; Ua poina paha ia oukou i ka makole a me ka naaupo o ka mea nana i hooponopono i ke Kumu Hawaii. Ea, e hoomanao, a e kokua mamuli o keia hana. Uuku loa na pepa a oukou i hoouna mai ai i keia mau malama. No ke aha oukou e kakau ole. Heaha ka hana ma ko oukou wahi? Heaha ko oukou manao i na kanaka o Hawaii? Ina aole makapo oukou, e pono ke hoike mai ma ka pepa i ka olelo e pono ai keia aupuni. Aloha ia oukou.

                O KE ALII. Hoi mai o Kauikeaouli ma, mai Lahaina mai, Iulai 20.

                O NA MOKU MANUWA. Holo aku la o Sulphur laua me La Venus mai Oahu aku O .Monede, Iulai 24, ko la ua la i holo aku ai.
                UA HOLO AKU LA MA KAUAI, i keia mau la, Kanekele Beritania ma, Mi. Lada ma, a me Mi. Diela ma.

HELU 2.
HE WAHI MANAO KUMU,

                3 Ua lohe au, ua olelo iho oukou, Aole e ala hou mai ke kino.
                Alia oukou e olelo ae pela, a e noonoo iho, i akaka. Pehea la oukou i ike ai ia mea? He mana no ko Iehova e hana'i pela; a he manao no kona e hana'i pela, no ka mea, ua paa ma kana olelo i ke kakauia E noonoo pono oukou, ua kanu iho paha oukou i kekahi kumu maia uuku; ua kanuia ma ka lepo, aohe mea e ae e kokoke ana, o ka lepo a o ka lewa. A ulu mai no ia i kumu maia nui elua paha anana ke kiekie a hua mai i ka opuu maia. Nohea mai keia mea nui? Noloko mai anei o ka lepo? E i mai paha oukou, ua ulu wale mai no ia. Ae aku no au, ae, ua ulu wale no, a pehea kona ulu ana? E hiki anei ia oukou ke hooulu mai a e hoonui mai i ka mea kanu, ia oukou wale iho no? Aole no e hiki. A heaha ia mau mea, e lilo i kumu maia? Ma ka milimili ana, he wai ka nui, a o ka lepo maoli kekahi. A o ka mea e hiki ia ia ke hoolilo i ka lepo a me ka wai i kumu maia, aole anei e hiki ia ia ke hoala hou mai i ke kino o ke kanaka? E nana oukou i ka ululaau; nawai i hoopiipii mai kolaila mau laau? I ka ulu ana, heaha ka mea e komo aku ai i mea e hooulu mai ai? O ka mea nana e hiki ia ia ke hooulu mai a nui, aole anei e hiki ia ia ke hoala mai i ke kupapau a e hookomo hou i ke ea iloko o ia mea? O ka mea nana i hana mua na mea a pau, aole anei e hiki ia ia ke hana hou i kekahi mea ke naha ia a ke make paha? Ua hiki no. A o ka mea nana i hana na mea a pau, oia no ke Akua, a ua hiki no ia ia ke hoala hou mai i ke kupapau e like me kona hooulu ana mai i ka maia maloko mai o ka lepo, a e like hoi me kona hookupu ana mai i ka ululaau noloko mai o ka lepo.
                Nolaila, o ka oukou olelo ana, aole e ala hou mai, ea, ua hala ia manao ana. Ua maopopo ia mea i ka poe noonoo, no ka mea, i ka po e hiamoe ai na kanaka, a i kakahiaka, ala mai, a pela no na hua i kanuia ma ka lepo e ka poe mahiai, a waiho no ma ka po o ka lepo, a i ka ulu ana mai, ulu mai no ma ka la, pela no ke ala ana mai ona kanaka i ka la mahope, no ka mea, ma ka po e moe ai, ma ka la e ala ai.
                Ina e paa ko oukou manao, aole he Akua, e kupu wale mai no na mea kanu, aole na ke Akua e hookupu mai, aole anei e ala wale hou mai ke kupapau ke kanu ia? Owai ka mea e hiki ke hoole? Aole e like ka manawa e ulu mai ai ke anoano ke kanuia, ulu koke mai kekahi a loihi loa ke kupu ana o kekahi me he niu ia. A pehea la oukou e ike ai, aole e ala hou mai ke kupapau kana-