Ke Kumu Hawaii, Volume III, Number 3, 5 July 1837 — Page 12
12 KUMU HAWAII. (IULAI,
maalea a lalau i ka eheu o kona pio: kaawili hou ka nalopaka a hemo kona eheu, aka ua hihia kona wawae. Alaila makau ka lanalana no ka eha i loaa ia ia, a kolo maalea oia a kokoke aku, o aku la ia i kahi manamana a lalau i kekahi wawae o ka nalopaka a huki ikaika a nahu iho la; no ka mea ua hihia ka nalo. Pela i nana pinepine ka lanalana maalea a nawaliwali ka nalopaka i ka eha nui. Aloha ino ka nalo! kupaka hou iho la ia, aka ua paa loa i ka hihia: aole hemo. Paki mai la kekahi wai me he waimaka la ma kona lae; kapalili iho la ia, o ka make no ia, no ka mea, ua hihia."
E ka mea heluhelu, aole anei i like kanaka me kela nalopaka? Hele lealea lakou iloko o ka hewa me ka makau ole. Aole noonoo lakou i ka punawelewele o ka diabolo e hihia ai lakou, a hihia a paa loa iloko o ka hewa. Nui na punawelewele o ka diabolo e kau ana ma kela wahi keia wahi e hihia ai ke kanaka a make mau loa. E makau e mamua oukou i ka hoowalewaleia, o lilo oukou a hihia like me ka nalopaka. ALOHAKANAKA.
KAHI MELE.
KA MANAO I KA MAKE.
1 Ua hanau wau inehinei,
A apopo e make ai;
Pehea la kuu manao?
Heaha la ka hope o'u?
Ka make anei ma ka po?
Ke ola oia mau?
2 Pehea la wau e lilo ai
Na lealea kino nei?
Kokoke kela ao;
Aole emo, a kii mai
Iesu ka Lunakanawai,
E lawe aku ia'u.
3 E ala, e kuu uhane, e,
E mihi a e huli mai,
Ano e makaukau;
Mai kali iki, o poho
Ma ka onohi o ka po,
Ma kahi make mau.
4 E Iesu, e kokua mai,
Kuu Ala, me kuu Alakai,
Maanei a kela ao;
E hoopau mai i kuu makau.
A hoopae lanakila ia'u
'Ka lani oia mau.
L. L.
KANAWAI VI.
Mai pepehi kanaka oe.
O ke kanawai no ka pepehi kanaka ana. Kinohi 9:6. " O ka mea nana e hookahe i ke koko o kanaka, e hookaheia no kona koko e kanaka.'' Eia hoi. "Aole i kauia ke kanawai no ke kanaka hoopono, aka no ka poe pono ole,— ka poe pepehi kanaka. -1 Tim. 1; 9.
O ka mea pepehi i ke kanaka, a make, e oiaio no, e pepehiia oia. Pukaana 21:12. E nana i Nahelu 35; 21. 22.a me 30.
Eia kekahi pepehi kanaka pili ole i ke kanawai. Ina i aihue kekahi ma ka po me ka wawahi i ka puka, a e pepehi aku kekahi ia ia, aole e pili ke kanawai i ka mea pepehi aku. Pukaana 22: 2.
Eia hoi, Kanawailua 19: 4, 6. Ina i pepehi kekahi i kekahi me ka inaina ole, a pela aku. O ko ke Akua manao i ka poe pepehi kanaka.
Halelu, 5: 6. "E hoowahawaha mai ana o Iehova i ke kanaka koko i hoopunipuni."
Halelu 55: 23. O ke kanaka koko aole ia e pakele a pau ka hapalua o kona mau la.
Ioane 8: 44. O ka diabolo, he pepehi kanaka ia, mai ke kumu mai.
E pepehi maoli wale ia no ka mea pepehi kanaka? Aole. Gal. 5: 21. "O ka pepehi kanaka, o ka ona ana - aole e loaa ia lakou ke aupuni o ke Akua."
Heaha ka hope o ka pepehi kanaka? O ka mea pepehi kanaka, aole ana ola loa e noho ana iloko ona. 1 Ioane 3: 15. Hoikeana 21: 8. 22:15. Mat. 23: 35. 27: 4, 5.
Owai ka makua o ka poe pepehi kanaka?
O ka Diabolo - Ioane 8: 44.
O ka pepehi maoli wale no anei ka pepehi kanaka?
Aole. O ka inaina he pepehi kanaka ia. Mat. 5: 21, 22.
J. S. E.
KE ALII PUNI I KA MAALEA O KA POE HEWA.
I ka wa kahiko loa, ua hoonoho kekahi alii nui i mau kaukaualii maluna o kona aupuni, hookahi haneri o lakou a me ka iwakalua. Hoonoho iho la ke alii i mau luna, maluna o lakou. Aloha nui ke alii i kekahi o ua poe luna la, no ka mea he kanaka maikai oia. Nolaila paonioni iho la kona poe hoa a opuinoino aku ia ia. Imi nui lakou i kahi e hoohihia ai ia ia, i huhu kona alii ia ia; aole nae i loaa, no ka mea he kanaka pololei oia. Ike lakou aole ona kina, hele aku la lakou i ke alii me ka maalea a malimali aku a kono lakou ia ia e kau i ke kanawai e papa ana i ka pule, i ole pule kekahi kanaka, i na akua a pau loa, aole hoi ia Iehova. Ae naaupo aku ke alii i ko lakou manao, aole ike oia i ko lakou maalea; no ka mea, ua maa kona punahele, i paonioniia, i ka pule pinepine ia Iehova i kela la, i keia la, a ike no lakou i kona haipule. Olioli lakou i ke kau ana i ke kanawai, no ka mea, manao lakou aole e haalele kela kanaka i ka pule. Ku paa no ia: Hoomakakiu lakou ia ia a hoi aku i ke alii a hoopii aku me ka i aku. Aole malama o mea i kou kanawai:pule mau no ia. Alaila ike ke alii i kona hihia, a mihi loa iho la ia a walania maloko, no ka mea nui kona aloha i kela kanaka haipule. Imi loa kona manao i kahi e hoopakele ai i ua kanaka nei a po ka la. O kona manao no ia e pakele kona punahele, aka ua holo ka olelo, a hele aku kela poe hewa ia ia i ka wa napoo ka la a i aku, "Ike oe e ke alii ua paa loa na kanawai o keia aupuni; ua kakauia kou inoa a ua paa." Pela i hihia ai ke alii i ko lakou maalea; aole hiki ia ia ke hoole i kona kanawai a kaumaha loa kona manao. Ae aku ke alii ia lakou e hoolei aku i ke kanaka haipule ilalo o ka ua liona e make i na liona huhu, a i aku ke alii ia ia, "Ea, e hoopakele no kou Akua ia oe."
Hoi aku ke alii i kona hale me ka naau kaumaha loa. -- aole ona hiamoe iki i kela po, no kona aloha nui i ke kanaka i hooleiia i na liona e ai lakou ia ia.
A kakahiaka nui hele wikiwiki ke alii i ka lua liona, a puka aku, kahea aku la ia i ke kanaka maloko; nui loa kona olioli i kona lohe ana i ka leo e o mai ana, a i kona ike ana ua paa ka waha o na liona i ke Akua, a ua malama ke Akua i kana kauwa haipule. Alaila hoopakele ke alii ia Daniela, no ka mea o Daniela no ia, a kauoha aku la ke alii e malama - e aloha, a e makau na kanaka a pau i ke Akua o Daniela.'' He poe hoomana kii lakou.
Unuhiia e ALOHAKANAKA.
Hilo, Iulai 4, 1837.
Ua make iho nei o Keaholawaia, i ka la ahiku o Iune. Aia i ka hora e kokoke aku ana i ke kani ana a ka moa i ka wehe ana ae o ko alaula, o ke ao. He luai koko kona mai i make ai, eha ona malama i ka ai i kela mai; a make aku la.
He 47 kona mau makahiki mai kona hanau ana a hiki i ka make ana ona.
Na KAAPA.