Ke Kumu Hawaii, Volume III, Number 3, 5 July 1837 — Page 10
10 KUMU HAWAII. (IULAI,
Ma Puilani he kanaonokumamawalu. Ma Alakahi ewalu. Ma Onomea he kanawalukumamalua.
Moe iho la makou ilaila a launa mai la kekahi mau kanaka malaila, i mai la ke konohiki ia'u, "E halawai hou i ke kakahiaka. Ae aku la au.
A kakahiaka halawai hou makou, a hai aku la au i ka ke Akua olelo ma ka haiao ua kakau ia ma ka Roma 12. 2; Mai hoohalikeia oukou me ko ke ao nei.
A pau ia halawai, hele aku la makou a hiki i Kawainui ua akoakoa na haumana he iwakaluakumamakolu. Ma Kulaimano he kanakolu. Ma Pepekeo umikumamalima. Ma Makahanaloa he kanawalukumamaiwa. Ma Kaupakuea kanaiwakumamahiku. Ma Laimi he iwakaluakumamakolu. Ma Honomu he kanalimakumamahiku. Ma Kuahua kanalimakumamakahi. Ma Hakalau hookahi haneri me kanaonokumamahiku. A moe iho la makou ilaila, a kakahiaka hele aku la makou a hiki i ka Maee, aole i akoakoa na haumana no ka nui o ka ua, I aku au ia lakou. A hoi mai makou hoike keia wahi. Hele aku la makou a hiki i Umauma ua nui loa ka wai o kahawai aole e hiki ke au aku; i aku la makou i kamaaina, Pehea makou e hiki ai? I mai la lakou, Ma ke kaula e hiki ai, haawi mai la lakou i kaula a iho aku la makou i kahawai, nana aku la makou i ka wai he nui loa, kau mai la ka makau ia makou. I mai la kamaaina, Aole keia he wai nui, he hiki no ma ke kaula. I aku la au, No hea la ka ole, i mai la lakou, E hoolei aku ka piko o ke kaula mao ma kela kapa; apo mai la na kanaka, a hoao aku la ke kamaaina mamua a hiki mao. Pela ko makou hana ana a pau ma kela aoao. Aka na ke Akua no makou i hoopakele mai i keia make. Hele aku la makou me ka hoomanao ia ia i kona malama ana mai ia makou, manao iho la makou ua pau ka mea keakea mamua o ko makou hele ana. A hiki aku la makou i Honohina he nui loa ka wai o kahawai o Nanue aole e hiki ke au aku aole mai ke kaula. Noho iho la makou ilaila i kekahi mau hora, a ahiahi emi mai la ka wai. Hele aku la makou a hiki i Puuohua, moe iho la makou ilaila, a kakahiaka, aole i akoakoa na haumana; i aku la au ia lakou, A hai mai makou, hoike. Hele aku la makou a hiki i Laupahoehoe, hoike mai na haumana he kanawalukumamahiku. A moe makou ilaila e malama i ka la kapu, hoike aku la au i ka ke Akua olelo, ma ka haiao, ua kakauia ma ke Kanawailua 32: 29. "Aohe mea nana e hoopakele ae mai kou lima aku." Ma ke ahiahi, aia ma ka Halelu 14: 1. "I iho la ka aia iloko o kona naau, Aohe Akua.'' Na KAAPA.
HELU 6.
NO KE KAAPUNI ANA IA OAHU.
I ke kakahiaka, houluulu na kane kamalii, ma ka hale, a o ko lakou nui, he kanaiwakumamalima (95.) Halawai iho la makou me lakou, a na Tineka no i hai aku ia lakou i ka olelo a ke Akua. A pau ka olelo ana, pule iho la, a pau ka pule ana, hoi mai la makou i ko makou hale i moe ai, ai iho la kekahi, a kii aku la au e hopu i kuu lio, a paa, hoi mai la au a hana i ka noho, a me ke kaula waha, a paa, hoi aku la au, a ai iho la makou, he wahi poi i uala, a he wahi moa ka ia, na Kuke no, ai iho la makou a pau ka ai ana, a pule iho la, a pau ka pule ana, alaila, hele aku la makou a hiki i PUNALUU, ua akoakoa na kanaka, o na kane, a me na wahine, a me na kamalii, ma loko o ka hale, o ko lakou nui 74, a halawai iho la makou malaila, a na Kuke no i hai aku la lakou ma ka pono o ke Akua. A pau ka olelo ana, pule iho la a pau ka pule ana, alaila, hele aku la makou a PUHEEMIKI, e hoakoakoa ana na kanaka malaila, o ko Waiono, a me ko Kapano, o na kane, a me na wahine, a me na kamalii, a o ko lakou nui, he kanahakumamaiwa 49. A o Tineka, a me Kuke, a me Kamaukoli, noho iho la lakou ma ia halawai, a hele e aku la maua me Wahinealii mamua a hiki i KALUANUI, e hoakoakoa i na kanaka. Noho iho la maua malaila, a hele mai la na kane, a me na wahine, a me na kamalii, a maloko o ka lanai, kahi e halawai ai ana kanaka, a hiki mai la o Kuke ma. Ua akoakoa na kanaka, alaila, halawai iho la makou malaila, a pau ka halawai ana me ka hai aku i ka pono o ke Akua, a me ka pule, alaila, hele aku la makou a hiki i HAUULA, aole he halawai malaila. Hele aku la makou a hiki i LAIE, e noho ana o Paki, ka wahine a Peke, aloha mai la oia ia makou, aloha aku la makou ia ia, a noho iho la makou malaila e kali ana i na kanaka, noho iho la makou a liuliu iki iho alaila, hele aku la makou ma kekahi hale aku e ai, owau, o Wahinealii, a me Kamaukoli, ma ka lua o ka hale o Paki, a haawi mai la oia ia makou he mau anae eha, a me kahi poi i kahi umeke laau, ai iki iho la makou a pau ka ai ana, ua hoouna e aku makou me Kuke i kahi keiki ona, e holo e mamua i Kahuku, e olelo aku ia Kahehuna, eia makou me ke kumu me Tineka, malaila e ai ai ka aina awakea, a e houluulu ae i na kane, a me na wahine, a me na kamalii, ma kahi e halawai ai. Noho iho la makou, a hele mai la na kanaka o Laie, o na kane, a me na wahine, a me kamalii, a akoakoa maloko o ka hale, kahi e halawai ai, a o ko lakou nui he kanalima kumamalima, 55. Halawai iho la makou malaila, me ka manao e hai aku i ka pono o ke Akua, o Tineka, a me Kuke, na laua no i hoakaka aku ia lakou i ka pono o ke Akua. A pau ka olelo ana, pule iho la a pau ka pule ana, alaila, hana iho la makou i na noho o na lio a paa, alaila, hele aku la makou.
Na'u na PUNIHAOLE.
KE KUMU HAWAII.
WENEDE, IULAI 5, 1837.
NA HALEPAIPALAPALA. Eia kekahi mau mea i paiia ma ka Halepaipalapala ma Honolulu, i ka makahiki i hala aku nei.
Himeni Pakoli, Himeni Hoolea, Himeni Kamalii, Kumu Hawaii, Kumu Kamalii. Kumumua, Kelukamalii, Huliano, Ai o ka la, Hoikeholoholona. Ikemua, kekahi palapala a Ke Kauoha Kahiko, a me na mea e ae.
Eia ka nui o na aoao a pau i paiia i ka makahiki hookahi, (8,980,712,) ewalu miliona, eiwa haneri me kanawalu tausani, ehiku haneri me ka umikumamalua.
Ua paiia ma Lahainaluna kela palapala keia palapala - eia ka helu ana i na aoao, 438,820, eha haneri me kanakolukumamawalu tausani ewalu haneri me ka iwakalua Ua paiia no hoi na palapala honua; -eia ka helu ana,
Amerika Hema, 350
Amerika Akau, 300
Amerika Huipuia, 300
Asia, 275
Aferika, 275
Europa, 300
Palapala Honua, 300
Moana Pakifika, 300
Keia pae aina, 225
Na mauna, 300
2925
NA EKALESIA MA HAWAII NEI. O na ekalesia a pau mai Hawaii a Kauai, he umikumamalima. Ua komo iloko o ua mau ekalesia nei na kane a me na wahine hookahi tausani, elua haneri me kanalimakumamaiwa, (1259.) Ua make kekahi poe, ua okiia kekahi poe. I keia manawa, o ka poe hoahanau a pau, hookahi tausani me kanaha kumamaiwa (1049.) Ua lilo 159 kanaka i poe hoahanau, i ka makahiki i hala aku nei.
NA HALAWAI LOA. He halawai loa ma