Ke Kumu Hawaii, Volume III, Number 3, 5 July 1837 — Page 9

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
BUKE 3. HONOLULU, OAHU, IULAI 5, 1837 Pepa 3.

HE REINADIA.

                1. Ua like ke kiekie o ka Reinadia me ko ka bipi wahine uuku. He iwilei kona kiekie a oi iki aku, a he anana ka loa.
                2. He ahinahina ka hulu o ka Reinadia i ka hooilo, a i ke kau hoi, aneane keokeo. Ua manoanoa kona hulu ma kona kino a puni, nolaila, ua mahana ka Reinadia, a e hiki ia ia ke noho ma na aina anu. Malalo o ka ai, ua loihi kona hulu, a lewa wale ilalo.
                3. Ua uuku kona mau wawae a ua loihi e like me ko ka lio keiki; ua pokole kona huelo; ua kiekie loa kona mau pepeiaohao a ua manamana nui.
                4. Ua makemake ka Reinadia i ka hau a me ke anu, a make koke no ia ke lawe ia ma na aina anu ole. Ma Lapelani kona wahi i loaa nui ia'i. He aina anu loa ia a paapu i ka hau.
                5. Ma ia aina anu, he mea maikai loa ka Reinadia. I ole ia holoholona, aole ola na kanaka malaila. Oia ko laila lio a me ka bipi a me ka hipa. Nana no e kauo i kona kahu. He waiu kona e like me ka bipi a he ono loa kona io. A o kona ili, oia ka lole o kanaka, a no ka mahana loa, he mea ku pono no ia i kela aina anu.
                6. O ka limu i ulu wale ma na pohaku maloko o ka hau, oia kana ai. Me kona mau wawae no ia i eli ai maloko o ka hau a loaa ka limu. Ai no hoi ia i na lau a me na lala laau.
                7. He manao no ko ke Akua i ke kanaka, no ka mea, ma kahi e ola ole ai ka lio a me ka bipi a me ka hipa no ka nui loa o ke anu, hana no oia i ka Reinadia i mea nana e kauo i kona kahu a e haawi mai hoi i ka waiu a me ka ai a me ka mea e mahana'i.

HILO, Iulai 3, 1837.
                I ka la umikumamaiwa o Aperila, hele aku la au ma Hilo Paliku, e hoike i na kula, me kekahi mau hoahanau elua. Ma Paukaa ka hoomaka ana o ka hoike. O na haumana a pau i ka hui ana hookahi haneri me kanalima.
                I ka pau ana o ka hoike, olelo hooikaika
aku au ia lakou, a pule aku la i ke Akua, a hele aku la makou a hiki i Pahoehoe, ua akoakoa na haumana he kanaonokumamakolu; a pau ka hoike, i aku au ia lakou e hoomakaukau oukou no ka hoike mahope. Hele aku la makou a hiki i Piihau, hoike mai na haumana he kanawalukumamaiwa.
                Ma Papaikou he kanalima. Ma Kaieie he kanahakumamakolu.
                Ma Kalaoa he kanahikukumamalima.