Ke Kumu Hawaii, Volume II, Number 25, 10 May 1837 — Page 100
100 KUMU HAWAII. (MEI,
K. Ka inoa hookahi ko'u lohe maopopo ana i keia. Mamua, manao au he makana wale no ko'u manawalea ana i na mea e kukuluia'i ko Iesu aupuni. Pela paha ka manao o na 'lii a me kanaka makeia poe aina.
G. Ua kuhi hewa no oukou. Aohe makana ia. He aie oukou na ka Haku, a me ka oukou poe kumu kekahi, a ua kauoha ia mai oukou "e hookaa aku i ka oukou aie a pau."
KAHI MELE.
NA ELEMAKULE.
Na elemakule, na elemakule
Aloha oukou, na elemakule,
He nawaliwali, he kolo pupu
He ma, makapo, he mai, kuapuu,
Ua hina ke poo, ua mino ka ili,
Aloha oukou, na elemakule.
Ua ike oukou, na elemakule,
'Na aupuni kahiko, hewa, pouli,
Ko Kamehameha, ko Kalaiopuu,
Me ko Kahekili, ko lakou a pau,
Auhea ka pono o kela manawa?
E hai mai oukou, mai hoohewahewa.
Na kapu oolea, na heiau, na pule,
O keia pae aina, oukou ka ike,
Ua ino, kaumaha, he mimilo make,
Aole anei, e na elemakule?
U'auana oukou ma ka po anakua
I keia wa hoi, ua malamalama.
Auhea oukou e ka poe kahiko?
Ua auwi ka la, mai hoopanee aku,
E mihi i ka hewa, e u manaoio,
E imi e aku i ke aupuni o Kristo,
O ko'u manao keia, a o ko'u ponoi
O kuu inoa, ea, he Kumu Hawaii.
L.
HELU 5.
NO KE KAAPUNI ANA IA OAHU.
A pau ka pule ana, ma Heeia, alaila, iho iho la makou ma ke ala iho a hiki ilalo, ma ke kihi o ka loko nui o Heeia. Hele aku la makou maluna o na lio, mawaena konu o ua loko la, ma ka welau hema o ua loko la ko makou hele ana aku, a pae aku la ma ka welau akau o ua loko la, me ka maluhia.
Na ke Akua no i malama ia makou mawaena o ia loko a pae aku i uka, a pii aku la makou i kahi ala pii, a iho aku la i Heeia kea, holo aku la makou a hiki i Waihee. Ua akoakoa na kanaka malaila, o ko Kahaluu, a me ko Waihee, a me ko Kaalaea, o na kane, a me na wahine, a me na kamalii, a o lakou nui hookahi haneri, a me kana limakumamalima, 155. Halawai iho la makou ilaila, a hai aku la kekahi o makou i ko ke Akua makemake ia lakou. Mare iho la o Kineka i kekahi kane, a me kekahi wahine, no Kahaluu laua, o Kekua ka inoa o ke kane, o Poo ka inoa o ka wahine, a pau ka mare ana, pule iho la, a pau ka pule ana, haawi mai la laua i ka moa.
A pau ia, ae ae la makou maluna o na lio, a hele aku la makou mawaena o ke kai o Maluaka, a kau ma Kaalaea, a holo aku la makou a hiki i Waiahole, ua akoakoa na kanaka, o ko Waiahole, a me ko Waikane, o na kane, a me na wahine, a me na kamalii, a o ko lakou nui, hookahi haneri, a me kumamaha, 104. Halawai iho la makou malaila, me ka hai aku ia lakou i ka olelo a ke Akua. A pau ka olelo ana, pule iho la, a pau ka pule ana, hai aku la na kanaka. A ma ia hope iho, hoomakaukau iho la makou e ai i na mea o ke kino, he wahi poi, a he wahi kalo ka ai, a he manu pelehu ka ia, a hoomaikai aku la makou i ke Akua i ka mea nana i haawi mai ia makou i ka ai, a me ka ia, e pono ai ko makou mau kino. Ai iho la makou, a pau ka ai ana, a pule iho la, a pau ka pule ana, hana iho la na noho o na lio o makou a paa, alaila, holo aku la makou a hiki i Kualoa, ua akoakoa na kanaka malaila, o ko Hakipuu, a me ko Kualoa, o na kane, a me na wahine, a me na kamalii, a o ka nui o lakou 137. halawai iho la makou me lakou ilaila, a me ka hai aku ia lakou i ka olelo a ke Akua, a me ka pule aku i ke Akua e hoohuli mai ia lakou mamuli o kona makemake.
A pau ka olelo ana, pule iho la makou, a pau ka pule ana, alaila, hele aku la makou a hiki i Kaaawa, halawai iho la makou malaila me kekahi mau mea, he mau kane, he mau wahine, he mau kamalii, a o ko lakou nui he iwakalua, a me kumamalima 25 halawai iho la makou me lakou me ka hai i ko ke Akua makemake, aole i ko makou, a pau ka olelo ana, alaila pule iho la makou, a pau ka pule ana, alaila, hele aku la makou, a hiki i Kahana, loaa aku la ia makou o Manaiula, a me Auhea, ma kahakai ma keia kapa aku o ka muliwai, e lawaia papai ana, aloha aku la makou iu laua, aloha mai la laua ia makou, a hoi pu aku la makou, a hiki i ko lakou hale me ko laua makua kane o Kuke, aloha aku la makou ia ia, aloha mai la oia ia makou, aole kamaaina, o Kuke no ko makou kamaaina, noho iho la makou a liuliu iki iho, alaila, haawi mai la oia ia makou i kahi hakina ape. Ai iho la makou, i ka hakina ape, no ka mea, he wi lakou aole he ai, no ka mea, he malihini no lakou malaila. Ua hele ke kamaaina ma kuahiwi, i ke kauo waa, o Pule kona inoa, oia ke kiaaina ma Kahana, hiki makou ilaila, ua hala e aku ke kanaka nana i kii aku ia Pule e hoi mai, no ka mea, ua lohe lakou ia makou e hele aku ana. Kii aku la ke kanaka ia Pule e hoi mai, aole ia i hoi mai, me lakou pu no kekahi hoahanau o Kuamoo kona inoa, ma Waialua kona lilo ana i hoahanau ma loko o ka ekalesia. A lohe ia, ua hiki makou makai o Kahana, me ke kumu, hoi mai la no ia, me ke aloha ia makou a me ke kumu a i ke ahiahi po eleele, i ka a ana o ke kukui, hoomakaukau iho la ka makou ahaaina ahiahi, he mau wahi uala elua na Kuke ka ai, a he mau wahi papai kuahonu eha, ka ia, hoonani aku la makou i ke Akua i ka mea nana ka ai, a me ka ia, ai iho la makou a pau ka ai ana, pule iho la makou a pau ka pule ana, alaila, hiki mai la ka wahine a Kuamoo me kahi poi uala a me kahi moa, a waiho aku la ia no ke kakahi aka, alaila, hoomakaukau iho la makou e pule i ke Akua no ko makou moe ana, himeni iho la makou, a pau ka himeni ana, pule iho la makou, a pau ka pule ana. alaila, moe iho la makou malaila, i ka po, me ka maluhia, no ka mea, aole kekahi o makou i lilo aku i ka make i laila. Na'u NAPUNIHAOLE.
HAIKU, HAMAKUA, MAUI.
Aperila 23, 1837.
No ka make ana o kekahi keiki ma ka pali.
Eia kekahi keiki kea pua i lele i ka pali i ka la 17 o Detemaba i ka makahiki o ka Haku 1836. Penei kona make ana. Pii aku la ua mau keiki nei mai kahawai mai, a kokoke e hoea'e iluna o ka pali, ike aku la i kekahi pua e wai ho ana i ka pali, kii aku la ua keiki nei.
I aku la kekahi, mai kii aku oe ea. E hoi mai kaua, aole i pau ka pua o ka nahelehele, hoopaa aku la no ua keiki nei, kii no kela, o ka lele no ia, a haule i ka holopapa, paki aku la kona lolo i ka holopapa, aole ka iwi maloko o kona poo. Alaila hea ku la kekahi keiki i kona kaikuaana, lele o Kahue i ka pali, lele Kahue i ka pali. A lohe kona kaikuaana, hele mai me ke eehia, a me ke kaumaha loa, a ike aku la, ua ano e oia. Pela kona make ana ma kona lealea iho. Auhea oukou e na keiki, hookahi a kakou pali nui e lele nei, o ka lealea, oia ka pali e paki liilii ai ka lolo o na uhane i ke ahi pio ole.
He umi a me ke keu paha o kona mau makahiki.
Na'u na NEHEMIA PAELE.