Ke Kumu Hawaii, Volume II, Number 25, 10 May 1837 — Page 99

1837.) KUMU HAWAII. 99

KE KUMU HAWAII.
WENEDE, MEI 10, 1837.

MAI AMERIKA MAI.

                Ua ku ma Honolulu nei Aperila, 23, ka moku kia kolu, Jones ka inoa, o Dominis ke alii. Holo pu me ia kana wahine a me ka laua keikikane, a me Ioane wahine, a me na wahine opiopio elua no Beritania mai, Miss Taylor kekahi, a me Miss Charlton kekahi.

KA HALAWAI O NA MISIONARI.

                I ka la Wenede, i ke kolu o keia malama i hoakoakoa ae la na kumu misionari no Hawaii, no Maui, no Molokai, no Oahu nei, a me na kumu hou mai Amerika mai, ma ka hale kula o Mi. Kemita. Ua hoonohoia o Mi. Gelina o Wailuku i lunahalawai, a o Mi. Kamalina laua o Mi. Tineka i mau kakauolelo.
                Monede, Mei 8. Pae mai la i keia kakahiaka ka moku Hooikaika mai Kauai me na kumu kane a me na wahine a me na keiki a lakou, a me kauka Aneru. Ua akoakoa makou a pau he 40 na kumu kane, ekolu wale no o makou i koe, o Mika Rikeke me Polena i holo ma Amerika, a o Mika Laimana ma Hilo.
                                Na kane, 40.
                                Na wahine, 43.
                                Na keikikane, 33.
                                Na kaikamahine, 25.
                                146

NO KA BELE.

                Aloha oukou. Ua loaa ia makou ka manao lakahi. Ua ae like na hoahanau a me ko makou mau alii, e hana i hale pule hou, a ua loa ka hale hou. No ka bele. He bele kahiko keia ua naha keia bele, he uuku kona kani ana He kahiko ka Bele he hou ka hale. Olelo mai o Iesu: Mataio, 9. 16, 17. Aole ke kanaka e hoopili i ka apana lole hou maluna o ka lole komo kahiko, o moku ka mea kahiko i ka mea hou a nui aku la ka nahae. Aole ua kanaka e ukuhi i ka waina hou iloko o na hue ili kahiko, o nahae na hue, kahe aku la ka waina a make pu hoi ia hue; aka e ukuhi lakou i ka waina hou iloko o na hue ili hou, koe pu ia mau mea i ka malama ia.
                NO KA BELE HOU. I ka malama o Sepatemaba, kuka iho la makou na hoahanau a me ko makou mau alii, e kuai ai i Bele hou. Ua kuikahi ka manao e ku ai. E na hoahanau, ua houluulu makou a halawai ma ko makou hale kula o Hanamaulu. Ua hoakaka aku au ia lakou i ka olelo a ka Haku a me ke ola hookahi o Iesu. Ina e hana kakou i keia hana me ka manaoio ia Iesu a me ka haawi aku o ka naau ia ia a me ko kakou uhane i ke Akua e haawi pau loa kakou ia Iesu i ola ai ko kakou uhane ia ia. E na hoahanau, ua hele mai nei kakou ma Puna nei e hana i pia kokua no ka Bele. Aole kakou i hele mai e hana i pia kuai lole no kakou, a i mea a i, ai mea no na kino o kakou. E na kane, a me na wahine, na makua, aole e ola ka uhane ke hili nai nui ka manao i ka hana. Ma ka manaoio ia Iesu e ola ai. E hana kakou i keia me ke kanalua ole, a me ka hoi hope ole, a me ka ohumu ole, a me ka manao ino ole, E hana ma ka maikai kakou me ka oluolu i hoopono ia mai ka kakou hana ana.
                "Ua oi aku ka ka wahinekanemake i hoolei ai iloko mamua o ka lakou a pau. No ka mea, ua hoolei lakou i kau wahi o ko lakou waiwai nui iloko o na makana no ke Akua; aka o keia wahine, ua hoolei pau lea ia iloko i kana mea uuku e ola ai." Luka 9: 3. 4.
WAIMEA Kauai. Na'u na D. OLELOA.

NO KA MANAWALEA ANA.
HE KAMAKAMAILIO. Helu 1.

                Kawailepolepo. Aloha oe e Gelina e. Eia ko'u wahi manao ia oe. Ka olelo au i hoakaka i kela Sabati, no ka manawalea ana. Pehea ia wahi?
                Gelina. Aole anei oe i lohe i ko'u?
                K. Ae ua lohe au, aka aole moakaka ea ia. E hai hou mai ia'u.
                G. Aole anei oe i ike i ka'u poo-olelo?
                K. Ae, ua ike au, aia ma ka palapala Pilipi mokuna IV: pauku 17. "Aole ka makana ko'u e imi nei, aka, ke imi nei au i ka hua e nui ai ko oukou pono.''
                G. Oia a eia kekahi mea a'u i hoakaka, I ko ka ekalesia manawalea ana i na mea e kukuluia'i ko Iesu aupuni mawaena o lakou, aole pono lakou ke manao ia mea he makana.
                K. Pehea la e kukulu ia'i ko Iesu aupuni ma ka honua?
                G. Nui ka hana a ke Akua i haawi mai ai, i kukulu ia'i kona aupuni. O ka malama ana i na kumu hai olelo, a me na kumu ao palapala; o ke kukulu ana i na luakini a me na hale kula, a me na mea like.
                K. Ae, ua maopopo keia, a ua pono ka ekalesia ke hana ia mau mea.
                G. Pono no. Aka i ka manawalea ana a kekahi poe, i ka lakou hana ana paha, a i ko lakou haawi ana i kekahi mau mea e pau ai ka nele o ka lakou kumu - i mea paha e kukuluia'i ka hale kula, a me ka hale pule hoomaikai lakou ia lakou iho, no ka mea, manao lakou ia lakou iho, he poe lokomaikai wale. Ka inoa, e hana ana lakou i ka luakini — e haawi paha i makana.
                K. Aole anei lakou e kuhi hewa ana?
                G. Ka inoa, e kuhi hewa ana no lakou. He makana ka! E noonoo oe. Makana ia wai? i ke Akua anei? Hemahema anei ke Akua i haawi kanaka ia ia i makana? Makana anei ia Iehova nona ka lani, a me ka honua, nona ka hanu o ke kanaka a me kona ola? Makana ia wai? i ke kahuna pule paha. Kuhi hewa ka poe e manao ana i makana na ke kumu. I ko Paulo manao, aole makana, aole ona makemake i makana. Heaha kona makemake malaila? Aole anei e hiki ia ia ke hana? Oiaio no. Eia kana i ka poe Epeso. Oihana 20: 34. "ua ike no oukou, ua hookauwa mai keia mau lima no ko'u hemahema, a no ka poe me au."
                K. Pehea ko Paulo manao i ko ka ekalesia manawalea ana?
                G. I kona manao, he aie ka lakou na ka Haku, a na ka lakou poe kumu kekahi.
                K. Ua hoakaka ia mai anei keia ma ka ke Akua olelo?
                G. Pela no. E heluhelu oe i kakahi olelo aia ma ka palapala mua a Paulo i ko Korineto - mokuna 9: pauku 7 – a hiki i ka pauku 15. Eia ka olelo: "Owai ka mea hele i ke kaua me ka uku ole ia mai? Owai ka mea kanu i ka malawaina a ai ole i kona hua? Owai hoi ka i hanai i na holoholona a ai ole i ka waiu o na holoholona? He olelo kanaka anei keia mea a'u e olelo nei? aole anei i olelo mai ke kanawai i keia mau mea? No ka mea; ua palapalaia mai ma ke kanawai o Mose, mai hana a paa i ka waha o ka pipi nana e hehi i ka palaoa. Ke malama nei anei ke Akua i na pipi? Ke olelo mai la paha oia ia mea no kakou wale no. Uapalapalaia no kakou no, i laua ai ka manao o ka mea mahi ai i kona mahiai ana. A o ka mea hoiliili me ka manao lana e loaa ia ia ka mea i laua ai kona manao. Ina makou i lulu aku i ko ka uhane maluna o oukou he mea nui anei ke hoiliili makou i ko oukou mea ma ke kino. Ina i loaa keia pono maluna o oukou na kekahi poe e, aole anei he oiaio na makou kekahi? Aole hoi makou i lawe i keia pono, ua hoomanawanui makou i na mea a pau o hihia auanei ka olelo maikai a Kristo ia makou. Aole anei oukou i ike i ka poe hana ma na mea laa, ua ai lakou i na mea laa? a me ka poe hoaaipuupuu ma ke kuahu, ua ai lakou i ko ke kuahu? Pela no hoi i kauoha mai ai ka Haku i ka poe hai aku i ka olelo maikai e ola no lakou ma ka olelo maikai."