Ke Kumu Hawaii, Volume II, Number 23, 13 April 1837 — KA HALE PULE O EWA. [ARTICLE]

KA HALE PULE O EWA.

He hale pohaku lepo ia. He 15 anana ka loa, a he 7 hoi ka laula, a he 15 na kapuai ke kiekie o na paia. Ua puniia ua hale nei i ka lanai, a ua akoia maluna, mai kaupaku a ka lanai i ka laui i peaia. Ua hoomaikaiia ka hale i ka puna maloko a me waho. A ua

hanaia ka awae maikai, i kuaiia i ke dala, a na hoahanau ekalesia ma Honolulu. I ka la 10 o ka malama o Feberuari iho nei ua paa ka hale, a ia la Sabati iho halawai makou ilaila i ka pule, a ua piha loa ka hale a hu iwaho. KA PULE HOOMAU. I ka la 14 o Feberuari, i ke 3 o ka hora ahiahi ka hoomaka ana o ka pule hoolilo i ko makou hale pule; i hale no ke Akua. Maanei no na hoahanau Kumu o Mi. Kemita a me Mi. Emekona. Himeni no makou, "He pono no kakou maanei," [Him. 139,] a pule aku la, alaila himeni hou ae la, "No Iesu ka honua," [Him. 141,] ma ka leo o ka Himeni Misionari. Alaila hai mai Mi. Kemita i ka olelo hoolilo mamuli o keia kumuolelo, Mataio 12; 13. "E kapaia ko'u hale, he halepule." A mahope iho, pule aku la o Mi. Bihopa i ka pule hoolilo, e haawi aku ai i ka hale a makou i hana'i no ke Akua, i hale hoano nona; i kahi e halawai mai ai oia me kona poe kanaka. O ka hoomaka ana ia o ka pule hoomau ma Ewa. Ia ahiahi iho no, ha-

lawai hou makou. A ia la ae, ia la ae, eha halawai nui ana ma ka hale pule, a he mau halawai liilii no hoi o na kanaka ma kauhale. I ka hora 8 o kela kakahiaka keia kakahiaka, halawai no makou me na kamalii maloko o ka hale kula. Ua piha ka hale ia lakou, a ua hoomanao mai kekahi poe o lakou i ka mea a na kumu i olelo ai. I ke ahiahi o ka la hoomalolo, hiki mai o Mi. Binamu me kekahi mau hoahanau o Honolulu, e kokua mai ia makou i na hana a ke Akua i ka la Sabati: noho no lakou a pau ka halawai ana. I kakahiaka o ka la noa, ua okiia ka halawai loa ma Ewa, a ua hoihoiia ae na kanaka i hele mai, mai Koolau mai, mai Honolulu mai, mai Wai alua mai, a mai Waianae mai. Hoi aku la lakou me ka olioli i ko lakou pomaikai ana i na mea a lakou i lohe ai. Aka, o ko Ewa nei poe i manao he pomaikai io ko lakou i ka halawai ana mai o ke Akua me lakou ia mau la. He manawa no ia o ko ke Akua mana e hoohuli ana i ka poe hewa mai ko lakou aoao mai i ko ke Akua pono. Ua haneri paha o na kane a me na wahine i hoike mai i ko lakou makemake e mihi i ka hewa a imi aku i ke ola no ka uhane. Akahi no a launa mai lakou me ke kumu a me ka olelo ana i hai aku ai. Aole no i akaka ka huli io ana o ia poe a pau. Aole o'u manao he mihi io ka nui o lakou. Aka, ua akaka ia'u he mihi no ko kekahi poe mahuahua, no ke ano hou o ko lakou manao i kohu i ka malamalama o ke ola. Ke ulu nei no ka pono ma Ewa nei. I ka wa i halawai ai makou maloko o ka hale kula, he uuku ka poe i hele mai i ka la Sabati, e hoolohe i ka olelo a ke Akua. I neia manawa hoi, ua piha ka hale hou o makou a hu iwaho ma ka lanai. Manao iho la makou he hale akea keia a makou i hana'i: aole kona pilikia no, ina he nui aku ina ua pono. He manao nei makou he nui ko ke Akua lokomaikai ia Ewa i keia mau makahiki iho nei, no ka mea, i noho haunaele na kanaka o anei me ka uha uha wale, a hiki i ka manawa a ke Akua i hoomalu mai ai ia Ewa i kona kanawai hoopono. A.B.