Ke Kumu Hawaii, Volume II, Number 23, 13 ʻApelila 1837 — Page 92
92 KUMU HAWAII. (APERILA.
kekahi poe kanaka ui paha a me ka ikaika, e ao pono aku ia lakou, a ninau aku, No ke aha la oukou i noho ike ole ai? manao au, ua loaa ia oukou ka ike, aole ka! no ke aha la? no ka malowa paha kekahi, a no ka makemake ole paha. Pehea? ina noho oukou pela, e hiki anei ke ola mau ma ka lani? aole loa—aohe mea molowa - aohe mea makemake ole, aohe mea haumia iki malaila. E wikiwiki oukou i ke ao ana mai i pau wawe ka naaupo a i loaa hoi ka naauao a me ke ola. L. L.
KAHI MELE.
HAUOLI DAVIDA I KA MALAMA MAU ANA MAI O KA HAKU.
Iehova ko'u kahuhipa;
Aole o'u mea e nele ai.
Nana no wau i hoomoe iho ma na aina uliuli:
Ua alakai oia ia'u ma kapa wai lana malie.
Ke hoala mai nei oia i ko'u uhane:
Ke alakai nei no oia ia'u ma na ala maikai no kona inoa.
Oiaio, ina e hele au ma ke awawa malu o ka make.
Aole au e weliweli i ka pono: no ka mea, o oe pu kekahi me au;
O kou mana, a me kou kookoo, o ko'u mau mea ia e oluolu ai.
Ke hoomakaukau nei oe i ka papaaina na'u ma ke alo o ko'u mau enemi:
Ua kahinu mai oe i kuu poo me ka aila.
Ua piha a hu ko'u kiaha.
Oiaio, e hahai mau ana ia'u ka pono a me ke aloha i na la a pau o ko'u ola ana;
A moloko o ka hale o Iehova o wau e noho mau loa aku ai.
HALAWAI LOA MA WAIALUA
Auhea oe, E ke kumu Hawaii?
Eia kekahi manao ia oe: Ma ka la 7 o keia malama ua hoomaka makou i ka halawai loa ma Waialua nei, a ua hana mau makou malaila a noa ka Sabati, eono mau la. He mau la maikai, aole anu, aole wela. Aole lehulehu ka poe hele mai i ka halawai: ua piha no nae ka luakini. Aole nui na malihini nolaila ua kaawale na kamaaina; aole paa i ka lawelawe no na malihini.
Ua hele nui mai na kamalii naauao no Waialua a no Koolau hoi. Ekolu haneri kamalii ma ka halawai: a ma ka Sabati eha haneri. Hookahi halawai a makou me na kamalii wale no, i kela la i keia la, a ma na halawai e ua hui pu ia na kamalii me na kanaka makua.
Ua nui ka lohe i ka ke Akua olelo i ua mau la la: a ua maopopo ka iho ana o ka Uhane Hemolele iwaena o makou. Ua hoomahuahuaia ke aloha o ka poe hoahanau, a ua lohe kekahi poe mawaho i ka olelo me ka manao e huli io mai, a e haalele loa i ka aoao o ka Diabolo. O kekahi poe, palaka loa ua mihi io paha kekahi. O ke Akua ka mea ike maopopo ko lakou ano.
Ua manao kekahi poe kamalii he manawa pono keia e ala, e ku iluna a e hele io Iesu la e like me ka hoi ana o ke keiki uhauha i kona makua.
Eia kuu makau nui, o hoi aku kekahi poe mahope i ko lakou palaka a me ka nanea, e like me ka puaa i holoiia i kona kio lepo.
Ina i hoohuli io ia mai kekahi poe na Akua ka mana, nana ka hana, a ia ia no ka hoonaniia aku i ke ao pau ole.
Eia kekahi. Ua nui loa ka poe hele ole i keia halawai, eia no lakou iwaena o makou; ke hiamoe nei lakou ma ke kae o ka make mau, aole nae makau, aole noonoo. Auwe lakou! Eia ko lakou manao no Iesu Kristo. "Aole o makou makemake ia ia nei i Alii maluna o makou."
E pule nui oe me makou no lakou. e hoopakele mai ke Akua ia lakou.
Ua kokua mai o Bihopa a me Pareka a me kamita ia makou ma keia pule mau, me kekahi mau hoahanau no Oahu nei.
Aloha oe, e ke kumu Hawaii.
Na'u na EMEKONA.
Waialua, Maraki 22, 1837.
Kaluaaha, Maraki 24, 1837.
Auhea oe e Tineka. - Aole pinepine kuu palapala ana ia oe i keia manawa i hala aku nei.
Ia makou i noho, ai i Lahaina, aole pono ia'u ka palapala, no ka mea, no eha ko'u mau maka. kekahi manawa. a ua eha loa na maka o kahi keiki kekahi manawa, a ua lilo au i ka malama ana i ka mai kekahi manawa. A he hana ka'u kekahi manawa: a hoi mai makou, nui loa no ka hana i loaa i kuu mau lima. Aole wa kaawale.
O ke kala kamalii kekahi hana nui i loaa ia'u i keia manawa. Elua haneri a'u haumana a me na haumana keu he kanakolu. Ma ka hale hookahi no makou e kula ai. He hale nui nae.
Umikumamawalu anana kona loa a me ka iwilei: aha anana hoi ka laula a me ka hapa. E aho iki ka'u kula kamalii i keia wa. Noho malie no na haumana, aole walaau nui. E mahuahua ana no ka akamai o kekahi poe o lakou i ka heluhelu ana, a me ka helunaau, a me ke kakaulima, a me ka hoikehonua. E kolu ko'u mau hora e kula ai, a puka ka ha i ka la hookahi.
Ke hooikaika pu nei me au ma keia kula na kumu ekolu mai ke Kula nui. a me kekahi mau kumu piapa maoli. Ke manao nei au e lilo paha auanei keia kula i kula maikai loa ke hiki mai kekahi kumu hou e ao i na haumana.
O ke kula Sabati hoi kekahi hana i loaa ia'u. Ma ke kakahiaka i ka hora ewalu keia kula a i ka iwa a me ka hapa. Elima haneri haumana o keia kula a keu. He poe kamalii wale no. Elua paha haneri o lakou ua hai i na pauku ehiku o ka ai o ka la.- a pau ia olelo maoli aku i kekahi olelo a ke Akua, a pau hoi ia, ninau aku au ia lakou i ka olelo a lakou i lohe ai. No ka nui loa o na haumana ma keia kula. aole i ao nui ia lakou i keia wa. Aia hiki mai ke kumu hou e ao nui ia paha I ka pau ana o ke kula Sabati, o ke komo nui ia o na haumana a pau i ka hale pule.
Eia hoi kekahi hana a'u i na kamalii; he kula pakoli. Elua paha kanaha ma keia kula. Makemake loa na kamalii keia kula. O ka poe noho malie wale no e komo ana i keia kula. A ina komo no kekahi a walaau iho ua hookuke koke ia no ia Nolaila. noho pono kamalii.
E hoopau no au i keia olelo: no ka mea, e holo koke ana ka waa i Lahaina.
Aloha oe,
Na'u na HIKIKOKE
WAILUKU, Maui, Maraki 19, 1837.
E na hoahanau a pau, mai Hilo a Kauai. ka poe e manao ana e hookomo i na kaikamahine iloko o ke kula ma Wailuku nei. Eia kekahi manao Aole o'u makemake i na kaikamahine nui na kaikamahine uuku ka pono loa Eha, Elima, a eono paha makahiki ka pono. i kuu manao. Ina hiki ia lakou ke hele, a ke olelo aku, ua hiki pono ke komo.
I ko oukou holo ana i Honolulu i ka ahaolelo, aole anei e pono i holo pu me oukou ka poe kaikamahine a oukou e manao ana he hookomo iloko o ke kula nui? Nui ka maua makemake e hoomaka i ka hana ma keia wahi kula.
Aloha oukou a pau, GREEN.
MARE.
Ua mareia ma Waialua Robert Barker no Nu Ioaka, me Kailimeau, Ianuari 7. Na Emekona ka mare ana.
OAHU: MISSION PRESS—R. TINKER, Editor. E.O. HALL, Printer.