Ke Kumu Hawaii, Volume II, Number 19, 15 February 1837 — HE MAKE I KA HEKILI. [ARTICLE]
HE MAKE I KA HEKILI.
MAKAWELI, Kauai, Sep. 1836. Aloha oukou e ka poe e heluhelu ana i keia Kumu Hawaii. Ke hoakaka aku nei au ia oukou i kekahi mea a makou i ike
maopopo ai ma Kauai nei; he keiki no Kapuniai. Ua make i ka hekili i ka malama o Sepatemaba i ka la 17, ma Mana kona wahi i make ai. Penei kona make ana. Kui iho la ka hekili mua; olelo ae la ua keiki la, "A naha ka pali." Olelo hoi kekahi, "Kani mai la ka pu o ka pa ulaula." Olelo aku la o Elia i ua keiki la, "O kii, e kala i ka lio." Holo aku la ua keiki la, a hiki i kahi o ka lio, anapu mai la ka uila mua, papaea aku la o Kaihuhanuna, paeapaea, paeapaea hou aku la no. Kui iho la ka hekili, kani ihola me he pu la; ike na kanaka o kekahi hale i ke kia ahi i ka iho ana mai, mai ka lani mai, mai ka lima o Iehova, a ku mawaho o ua hale nei, a komo mai la ke ahi iloko, a loaa na kanaka e moe ana a kiolaia kekahi kanaka.