Ke Kumu Hawaii, Volume II, Number 18, 1 February 1837 — Page 72

72 KUMU HAWAII. ( FEBERUARI,

manaonao loa, he kaikamahine ua wela i ke ahi baka. Aia no kona makuakane i ka lepa paha i hea la hoi, a o kona makuwahine i kahawai; a waiho aku i ke keiki me ke ahi baka a wela ae la ka hale, a moa kona io a lihaliha ke nana aku me ka menemene loa, alohaino no.
                He moopuna na Mela o na Kahinu kona makuwahine, o na Uku kona makua.
Na H. WAILEPOLEPO.

KAHI MELE.

HE WAHI MELE.

U'oki, e na kamalii,
E noho a noonoo,
Paani anei ma ke kae
O kela lua po?

U'oki, ano e huli mai;
E ao pono hoi oukou,
O haule koke ae
Ma kahi aa mau.

Ke hamama la ka po
No na keiki nei;
E ale wale ia oukou
I pau koonei maikai

Ke hookoke la ke'lii
E hooweliweli ai;
Nana oukou e hoopii
Ka lunakanawai;

E hoikeia mai
Na hewa no a pau;
Hea aku, e hoopai;
Pehea la oukou ?

Hiki anei ke ku e
'Ko Iehova mana mau,
I ka mea e poho ai,
Na kipi i ka po?

Hehee aku no ka la,
Mahina, na hoku;
Ku ae oukou e nana,
Puiwa! pilipu!

Ko ka lani, ko ke ao,
Lilo wale aku no;
Kupanaha! kamahao!
Haalulu no oukou.

Hea aku no oukou,
I haule koke mai
Na pohaku, mauna no,
E nalo aku ai.

Hea make hewa, ka!
E poino no oukou;
Huli, mai hookuunana;
A wikiwiki no. L. L.

HELU 3.
HE MANAO NO KA POE I BAPETISOIA ILOKO O KA HAKU.

                Pomaikai kakou na hoahanau ina ua lilo pu ko kakou mau naau me ko kakou mau inoa ia Iesu Kristo. Auhea oukou, e na hoahanau. Eia, ninau aku nei au ia oukou a pau, Pehea ko oukou manao? He mea kohu pono anei ka molowa? Ina he kanaka molowa noho wale; hana ole, kekahi hoahanau maloko o ka ekalesia; mamuli o ka Haku anei kela hoahanau?
                Eia ko'u manao; aole loa e hiki ka ke kumu o kela manao; Tim. 5: 8: "A i hoolako ole kekahi i kona a me ko ka hale ponoi ona iho no hoi, ua hoole i ko ka mea manaoio ole.''
                E hoolohe i kela olelo, o ka hoahanau molowa ua hoole ia i ka manaoio ole." Aka ua ike no kakou i kekahi mau hoahanau ma keia pae aina e noho molowa ana, - ua kaulana ko lakou molowa. - Ike na kanaka a pau ua molowa loa, noho hoopalaleha kahi mau hoahanau ma keia pae aina. Ea! no ke aha la i ole hemo lakou iwaho o ka ekalesia, ua i mai la ka Haku, ua haalele lakou i ka manaoio a ua oi ko lakou hewa i ko ka mea manaoio ole." Ua oi aku ko lakou hewa" a ke noho nei lakou iloko o ka ekalesia!! Pehea ka pono, e na hoahanau?
                E heluhelu oukou i keia mau pauku. Kanawailua 13. "Eono o na la e hana ae a e hana'i i kau hana a pau." Pela anei
ka hoahanau molowa hoopalaleha i kekahi mau la?
                1 Tesalonike 4: 14. "E imi oukou e noho malie me ka hana aku i ka oukou hana iho, a me ka oukou mau lima iho e hana'i."
                2 Eia hoi. 1 Tesalonike 3: 11, 12. "Ua lohe hoi makou, e, aia hoi iwaena o oukou kekahi poe e hele hokai ana aole e hana maoli ana, ...... A oia poe, o ka makou ia e kauoha aku nei me ka hooikaika aku, ma ko kakou Haku, ma o Iesu Kristo la, e hana maoli me ka noho malie, a e ai hoi i ka lakou ai ponoi iho."
                Pehea ka poe hoopalaleha a palaualelo i keia wahi pauku? Ua hana maoli anei lakou? O ka poe hoopili me ai ana i kela makamaka a i keia makamaka, ua ai anei lakou i ka lakou ai ponoi iho?
                Ua maopopo, o ka poe molowa, ua hehi wale lakou i ka ke Akua olelo. - Ua hewa anei ka poe moe kolohe a me ka poe ona? ua hewa pu no hoi ka poe molowa i ka ke Akua olelo. Aohe e hiki ia kakou ke manao ua hahai, ka hoahanau molowa, palaualelo mamuli o Iesu, aole Iesu i hoopalaleha. E heluhelu i kana hana; ma ka wanaao no kona ala ana a haalele i ka moena, a i mai la mea nana au i hoouna mai oiai ka la. Ioane 9:4.
                E noonoo kakou, e na hoahanau a pau loa i hewa loa o ka noho wale, hana ole. a o ka palaualelo a pau, a e haalele kakou i na mea kohu ino a pau e like me ke kauoha a ko kakou Haku.
Na ALOHAKANAKA.

KA MARE ANA O KE LII.

Honolulu, Feb. 2, 1837.
                Ua mareia e Mr. Binamu o KAUIKEAOULI ke Alii o ko Hawaii nei pae aina, me KALAMA, ke kaikamahine a Naihekukui
                Ma ka hale pohaku o Kekauluohi laua o Kanaina, o kekahi mau makua o na kaikamahine la, malaila ka mare ana o laua, a me ka ahaaina mare a na Lii, a me ka mele ana i ka himeni mare. A pau ia mau mea, hele pu ae la lakou i ka pule, ma ka luakini, ia po, i ka halawai loa. "E mahaloia ka mare no na mea a pau." A ua mahalo nui ia keia mare ana e na hoaaloha oiaio o laua.
                                E OLA LOA KE LII:
                                E MALU NUI KONA AUPUNI.

NO KA PUAA A ME KE KEIKI.

                No ka naaupo ua hoolaka na kanaka i ka lakou holoholona a ai pu no me ka puaa.
                A i ka la akahi o Ianuari 1836, pau ae la kahi keiki i ka puaa, a mumuku kona lima, no ka mea ua maa no lakou i ka noho pu. Aia ka makuakane i ka mahi ai, a o kona makuwahine i kahakai; a pau ae la ka lima o ke keiki, ALOHA INO A hoi mai ka makua, pepehi ia ka puaa a make ia. Aia hoi ka hewa o ka hookuli; nani kona huhu ia ia iho no kona pepehi ana i ka puaa, a hoola ae la no paha i ka hookuli.
                Ma Lahainalalo keia mea a'u i lohe ai.
Na H. KAWAILEPOLEPO.

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki $,50. a na mea e lawe i ka pepa a pau.

OAHU: MISSION PRESS. - R. TINKER, Editor. E. O. HALL, Printer.