Ke Kumu Hawaii, Volume II, Number 13, 22 June 1836 — Page 51

1836.) KUMU HAWA II. 51

no ua kailiia 'ku kona uhane, me ka hemahema mau.
                Auhea oukou? E makaala, ua kokoke mai ka Haku. Aole liu a komo no kakou a pau iloko o kela ao paa ole. E malama ia oukou o lilo auanei na uhane o oukou.
W. P. A.

KA MANAO O NA MISIONARI I NA KUMU KANAKA MAOLI.

                O ko makou manao keia, aole e pono i na hoahanau, a me na kumu kula, ke houluulu i na kanaka, a e olelo aku i na anaina kanaka pule, ke haawi ole, a ke ae ole kana kumu, a me ka Misionari no ka aina i hoakakaia'i ia mau hana.
HONOLULU, Iune 9, 1836.

E KA MAKUWAHINE, E HELE NO WAU.

                I ka wa mamua hookahi kanaka opiopio, he keiki kamakahi a kona makuwahine, a he wahinekanemake no ia.
                A i ka wa i lilo ai ia i kanaka makua, a loaa ia ia ka waiwai a kona makuakane i waiho ai nona, hele aku no ia me ka poe hewa, ka poe lealea, ka poe haaheo, a me ka poe hokai wale i ka waiwai. A ike aku la kona makuwahine i ka pono ole o kona manao, a me kana hana, ao aku la no ia ia ia, a hoakaka aku ia ia i ka hope o ka aoao hewa, oia hoi o ka make o ke kino a me ka uhane. Aole nae ia i hoolohe i ka leo o kona makuwahine. Hookuli no ia, a hele no ia mamuli o kona manao iho, aole ia i malama i ka olelo maikai a kona makuwahine. A i kekahi la lohe no ia e hele ana no kana keiki e ai pu, a e inu pu hoi me ka poe lealea i ka ahaaina awakea. Olelo aku kona makuwahine ia ia, a ao aku ia ia mai kakahiaka a awakea, a nui ke aloha e kona naau ia ia, alaila olelo ikaika aku no ia ia ia e hule mai ia ma kona manao, aole hoi e hele aku i ua ahaaina la; aka aole ia i ae iki mai i ka mea a kona makua i ao aku ai ia ia. Hookuli no, a hoopaakiki no ia i kona naau, a olelo aloha ole aku ia ia. "E ka makuwahine, e hele no wau, aole au e hoolohe ma kau." I mai la ka makuwahine ia ia, "E Ioane e, a i hele oe i kela ahaaina, alaila e komo no au i kuu keena mehameha, a pule aku au i ke Akua nou, a ike hou aku au i kou maka." A hele aku la ua kanaka la i ka ahaaina olioli, a noho pu iho la me ka poe lealea; aka ea, aole i loaa ia ia ka oluolu malaila, no ka mea, ua paa keia manao iloko o kona naau. "Aia no ko'u makuwahine iloko o kona keena mehameha e kukuli ana, a e pule hakoko aku ana ia Iehova no'u.
                Aohe like kana hana me ka'u, a me ka keia poe olioli e hana nei." Aohe oluolu iki kona naau, nolaila hoi malu aku la no ia, a loaa ia ia kona makuwahine e pule ana; a kukuli iho no ia ma ka aoao o kona makuwahine, a hilinai ma kona ai. Mai ia manawa mai lilo ia i kanaka pono, a oluolu loa iho la ka naau e kona Makuwahine, a hoomaikai aku no ia ia Iehova no kona hoohuli ana i ka naau o kana keiki.

                Ua like ia kanaka me ka momokuahi i unuhiia mailoko mai o ke ahi a waiho ma kapa. Aole loa e makehewa ka pule a na makua haipule.
                He mana ka pule a ka poe haipule oiaio I mai la o Iakobo, "O ka pule ikaika a ke kanaka pono ke lanakila nui ia.''
A.T.

KA HOOPILI ANO E ANA ME KA MEA HOOMALOKA.

                Eia ke kaao no kekahi kanaka opiopio ma Amerika, ma ka aina o Merelane. I ka wa he iwakalua ona mau makahiki, ua hoomaopopoia mai la i kona naau, ka pono ole o ke kanaka. Ike aku la ia ua make ke noho loa, a huli ole mahope o ka ke Akua olelo. Mihi iho la ia, me ka ue nui. Pule ikaika aku la ia i ke Akua e aloha mai, i kalaia'ku kona hewa. A liuliu iho la, ua loaa ia ia ke naau oluolu. Ua hoolilo mai ia ia ia iho i ka Haku. Ua ku ekalesia a ahaaina pu me ka poe hoahanau. Aole ona mea hemahema ia manawa i ka ike ana aku. Ua malama no i ka olelo a ka Haku, a hooikaika pu me ka poe malama i ka pono. A ike aku la ia i kekahi wahine, manao iho la ia e mare laua. He wahine maikai no ia, he ui, a he waiwai no hoi kona. Aka, aole ona malama i ka ke Akua olelo, ua wahawaha kona naau i ka poe pule. Ua ae mai i ka mare me ua kanaka la. I iho la kona naau, "E hiki no ia'u e hoohuli i ka'u kane ma ka lealea."
                Ua mare iho la laua. Ma kekahi mau manao ua like pu ko laua noho ana: Aka aole i nui na la i hala ia laua e noho pono ana, a hoowalewale iho la ka wahine i ke kane, i iho la,
                "Auhea oe! e ke kane? He manao ko'u ia oe, e haalele oe i ka pule. Ua wahawahaia mai kaua ilaila. E haalele oe i ka pule a hele kaua i ka lealea me na makamaka o kaua. Ua ike no oe e nuku mai lakou ia oe no ka nui o kau pule, a me kau malama ana i ka ke Akua olelo. No ka lealea ka'u i mare ai me oe. Aka, he pono ole kou e noho nei, aole au oluolu iki ia oe. E haalele oe i ka pule a ua pono kaua."
                I aku la ke kane, "O ka oluolu ko'u makemake no ia: Aka ma kau i olelo mai nei, ua ike au, aole a kaua pono ilaila. Ua maopopo ia'u ia wahi. Malaila no wau, a mai make. Ua pau koke ka lealea au i olelo mai nei, aole e mau, a ua awahia loa kona hope; O ka make mau loa no ia."
                Ike aku la ka wahine aole e ae mai ke kane i kona manao, a hoole iho la ia, aole e hele me ia i ka pule. I ka laua pule ohana, noho aku la ka wahine ma kahi e, aole i hookokoke mai. Ue iho la ke kane, a pule aku la i ke Akua nona. Hooikaika hou aku ka wahine ia ia, e haalele i ka pule. Imi maaloa iho la ia e hoohihia mai, a hoohina mai i ke kane. Hooikaika aku ke kane ia ia e haalele i kona manao, a e hele pu me ia ma ka pono. Aole oluolu iki mai ka wahine. Mau no ke ku e ana, a me ka hoole ana i kana kane. Ue nui aku la ka kane. I iho la ia ia ia iho, "Owau wale no: Aole au e hooikaika hou aku ia ia. E waiho au i ka pule ohana. Na'u wale iho no ka'u pule. Ma kahi mehameha a'u e hooikaika'i, malia paha e oluolu mai kela ia'u." Ike aku la ka wahine ua haaleleia ka pule ohana, lana mai la ka manao maloko ona, a hooikaika hou aku la i ke kane e haalele i ka pule a pau loa, aole pule mehameha, aole hooikaika iki ma ka pono o ka Haku. Hana pinepine iho la ua wahine nei, a ae aku ke kane. Haalele iho la ia i ka pule a pau. Alaila haalele aku la ke Akua ia ia. Mahuahua nui ae la ka hewa maloko ona. Ua puka aku no ka hewa ma kona waha, a ua ikea iloko o kana hana a pau. A liuliu ua ikaika loa ia ma ka aoao o ka hewa aole ona lua iloko o ke kolohe.
                Ia mau la hele aku la ua kanaka nei i kahi i haiia aku ka olelo a ke Akua, ua lohe, makau loa iho la ia. Ua manao ia e waiho i ka hewa a huli hou ma ka pono o ka Haku. Aka aole e hiki ia ia, ua like ia me ke kanaka i hikikiia i ke kaula, a paa iho la. O ka hewa ua nui loa, me he pali la. Aole ia e hiki aku i ke Akua i ka pule ana aku ia ia. Me he mea la i paa i ka hao e noho ana iloko o ka hale paahao o ka enemi nui. Ue nui aku la ia, me ka haalulu. Hoowalewale hou iho la kana wahine, a hooikaika aku la ia. "E haalele i ka pule, aole manao hou ilaila," a ua ae hou ia i kana wahine. Ma ia hope mai, aole ona manao iki ma ka pono, ua lawe hala me ka ikaika o kona naau a pau.
                Ia manawa iho make iho la ua kanaka nei i ka mai, he mai nui loa kona. Ike aku ia he mai kona, a makau loa iho la, me ka haalulu nui i kona hewa. No ka naau wiwo ona, aole i hiki ia ia e pule aku i ke Akua. I aku la ia, "Pehea la e hiki ia'u e pule? Ua haalele au ia ia, a ua haalele mai hoi ia ia'u. Pehea la ko'u pono i ke Akua? ua ike mai ia ia'u, he hewa nui loa ko'u. Ua hoeha wale aku au i kona Uhane Hemolele. Ua pale aku au i kona makemake. Ua hoopau aku la au i kuu malu, a me kuu manaolana, a ua make au, aole wahi o ka pono. Auwe i kuu make. Auwe i kuu make i ke ahi pio ole!" Pela i ue ai ua kanaka nei me ka ue nui. I iho la, "Eia hoi au ma ke kae o ka make. Kokoke haule ko'u uhane iloko o na lima o ke Akua Ola." I aku la i na hoahanau pule, "E oukou, e pule oukou i ke Akua ia'u. Malia paha ua hoolohe mai i ka oukou pule. Ina e hoopakele mai oia ia'u i keia make ua huli au. Ua haalele au i ka hewa, a ua malama no hoi au ia ia."
                Pule nui aku la na hoahanau, a ua hoolohe mai ke Akua i ka lakou pule, a ua maha iho la ka mai: Aka, i kona hana ana, aole ia i hoopaa ma kona manao e malama i ke Akua, ua hoopoinaia i kona manao huli