Ke Kumu Hawaii, Volume II, Number 10, 11 May 1836 — Page 39
1836.) KUMU HAWAII. 39
Aka aole ia i make ai i ka liona no ka mea na ke Akua i malama aku ia ia.
Ua hoouna mai ke Akua i kona anela e pani i ka waha o na liona, i eha ole ai Daniela ia lakou, no kona hala ole.
E na kamalii, E pule anei oukou i kela la i keia la e like me Daniela?
KE KUMU HAWAII.
WENEDE, MEI 11, 1836.
NO KE ALII. Ua holo aku ke alii o Kauikeaouli ma Wailuku, Satude, Aperila 23.
LIMAIKAIKA. Ua holo mai Limaikaika ma, a me Mi. Lidia Berona, mai Wailuku mai, Aperila 28.
NO KE HOIKE O KO WAIKIKI, Aperila 19.
O NA KUMU, 17
O NA HAUMANA.
O na kane, 256
O na wahine, 277
527
Ua heluhelu lakou a pau.
O ka poe palapala lima, 385
NO KO WAIALUA.
Waialua, Aperila 8, 1836. Eia no makou ma Waialua ke noho nei. I ka manawa a kakou e noho pu ai ma Waialua nei i ka halawai loa, aole akaka ka manao o ka lehulehu o ko Waialua poe kanaka; i keia mau la mahope mai, ua akaka iki ka manao o kekahi poe. I keia Sabati i hala iho nei ua mahuahua ka poe ma ka pule, a ma ka oi o ka la hoi, a ma na halawai kakahiaka a pau.
Aole paha i haalele ka Uhane Hemolele i na kanaka; ke kikeke mai nei oia ma ka ipuka o ko lakou mau naau. Ua hookomo paha kekahi poe ia ia maloko, aole paha, o ke Akua ka mea i ike. Eia ka mea e weliweli ai ia'u, o ka olelo a ke Akua ma Kinohi 6; 3. "Aole e noho loa kuu Uhane me kanaka."---Ua nui kuu makau o hookuli na kanaka i ka ke Akua olelo me ka hoopaakiki o ka naau e haalele ka Uhane ia lakou.
E pule nui oe no makou ma Waialua nei e aloha mai ke Akua ia makou.
No kou hoahanau, NA EMEKONA.
HE MANAO NO NA LEI.
O kuu nana ana i na hoahanau ma ka hale o Iehova, manao au ua like ke ano o kekahi mau hoahanau koikoi ke nanaia, me ke ano kahiko o keia pae aina; aole like iki me ka ke Akua olelo, hele me ka hilahila ole i ka luakini o Iehova e like me ka hele ana i ka hale paani! e like me ka poe i manao nui i ka nana maka o kanaka a i ka mahalo o kanaka ia lakou! aole e like me ka poe makau ia Iehova a manao nui i ka haka pono ana o kona maka ia lakou. Manao au; auwe! he poe hoahanau kohu hanohano keia, mamuli o ko ke kanaka mahalo; aole mamuli o Iesu, i kohu haahaa. No ka mea, nana'ku kuu maka a ike ua nui na lei i apo i ka ai a me ka lae a me ka piko o ke poo o kekahi poe hoahanau.
E hai maopopo mai oukou i ke ano.
He ano kahiko anei; he ano hou anei ia?
He mea kohu naau kahiko; kohu naau hou anei keia hoohanohano ana i ke kino?
He mea kohu mihi, haahaa anei; he mea haaheo wale anei?
Pehea ko oukou manao i ka hoahanau e lilo ma kakahiaka Sabati, i kona aniani e hooponopono wale ana i na lei a me ka oho, a kani e ka bele; hele mai la ia i ka hale o Iehova me ke kino hoohanohano wale ia, paapu i na lei a me na mea kohu hoohanohano, wale a me ka haaheo no hoi! Ua makaukau anei oia e hoolohe pono i ka ololo a ke Akua?—Aole anei e aho ke lilo ke kakahiaka sabati i ka pule; i ka mihi a me ka heluhelu i ka olelo a ke Akua me ka noonoo? Aole anei e aho ke hele hilahila mai i ka hale o ke Akua, me ka helelei ana o ka waimaka; me ka makau; me ka haahaa; me ka lei ole, a me ka hanohano ole?
Pehea ko oukou manao; e hai maopopo mai i paiia ma ke Kumu Hawaii:---I mai la paha kekahi: Aole au i manao nui i ka lei a me ka hanohano, aka no kuu aloha i na makua i hana, a hapuku nui i na lei me ka luhi a hooili mai i waiwai ia makou, nolaila kuu malama 'na; no ke aloha. Minamina ka oe i na lei, o pau i ka mu, no ka hooluhi hewa ana o kou makua e mahuahua na lei a hihia kou uhane! Aole anei oe e minamina i na kii kalaiia a kou mau kupuna i hana me ka hooluhi hewa? Aole anei oe i minamina i na heiau a na kupuna i kukulu me ka luhi, e hooluhi hewa a e hoomana kii? Aole e huli oe mamuli i na heiau a me na kii no kou aloha i na kupuna i hooluhi hewa? "E ao, e na hoahanau o noho ka naau ino hoomaloka iloko o kekahi o oukou i haalele ai ai i ke Akua ola.''
Ea! e na hoahanau puni hanohano; ka poe i minamina a aloha aku i na aoao kahiko, e noonoo oukou i neia mau pauku.---I Korineto ix. 25. O ka poe i hooikaika i ka uku, na pakiko no lakou ma na mea a pau. Ma ka lei mae wale lakou, aka me ka lei mae ole kakou." No ke aha la i hooikaika na hoahanau ia manwa "ma ka lei mae ole?" Ua minamina anei lakou i na "lei mae wale," na lei hulu, a me na lei pua? Oko Helene poe naaupo, ua nui loa ko lakou mahalo i ka mea i loaa ka lei mae wale" aka, aole lakou i paulele ia Iesu Kristo. O ka poe o lakou i huli mai mamuli o Iesu, haalele wale lakou i kela mau lei lapuwale.
Eia hoi kahi pauku I Timoteo ii. 9. Pehea hoi e kahiko na wahine ia lakou iho, me na kapa kohu pono a me na maka hilahila, a me ka noho malie: aole me ka lauoho hoonioni a me ke goula, a me na momi, a me na kapa komo he nui ke kumu kuai." Heaha ke ano o kela pauku? Ua pono anei kakou i kela pauku, e na hoahanau, ke manao nui kakou ma na lei mae? ma ke goula; ma ka momi; ma ka lauoho hoonionioia i na lei a ia mea aku ia mea aku?
Eia hoi kahi pauku I Petero iii. 3: "A i ko oukou kahiko ana, aole i ko waho i ka hili ana i ka lauoho, a me ke komo ana i ke goula, a me ka aahu ana i ka aahu. Aka e kahiko oukou i ka naau oloko, me ka mea palaho ole, o ka manao akahai a me ka noho malie. Pela i kahiko ai na wahine haipule ia lakou iho i ka wa mamua."
Heaha ke ano o kela wahi . "I ko oukou kahiko ana, aole i ko waho." Ua papa mai ai ke Akua i ke aha ma keia pauku? I ke kapa anei? I ke kapa hanohano wale no anei?
Heaha paha ka manao o ka Uhane Hemolele i kona palapala ana i kela wahi? Aole anei keia kona manao, ua hewa kakou he manao nui ma ka hoonani ana "i ko waho?" Manao anei kakou ua mahalo mai o Iesu Kristo, ka Uhane Hemolele a me na anela hemolele, ia kakou no ko kakou lei a me ko kakou hoohanohano ana i ke kino? Ua olioli nui na anela ke mihi hookahi kanaka hewa, wahi a ka Haku.
Heaha paha ka manao o Keopuolani, a o Kaahumanu i ko laua nana mai ana ia kakou e noho iho nei? Mahalo mai anei laua? Olioli anei laua no ka nani o na lei i neia wa? E na hoahanau, e hoolohe kakou i ka olelo a Kristo a e kahiko kakou i ko loko "aole i ko waho." E hooikaika kakou ma ka lei mae ole aole ma na lei mae wale.
Na ALOHAKANAKA.
KA HUA O KA HONUA
O ka hua o ka honua, na na mea ia a pau, a o ke alii pu kekahi i hanaiia e ka aina.
O ka mea makemake i ke kala, aole pau kona ono i ke kala, a o ka mea makemake i na mea nui, aole ia e ana i ka nui o ka waiwai. He mea lapuwale keia.
I ka mahuahua ana o na mea maikai, mahuahua no hoi ka poe e pau ai ia mau mea; a heaha ka pono i loaa mai i ka poe nana ia mau mea? O ka ike wale ana o ko lakou mau maka.
Ua lea ka hiamoe o ka poe hana i ka lakou ai uuku ana, a me ka ai nui ana; aka, o ka maona nui o ka mea waiwai, he mea ia e lea ole ai kona hiamoe ana.
NO KA KE AKUA HANA.
Ua ike au, o na mea a pau a ke Akua i hana'i, e mau loa no ia, aole hiki i kekahi ke hoonui, aole hiki i kekahi ke hooemi; a na ke Akua no i hana mai i makau lakou imua ona.
SOLOMONA.