Ke Kumu Hawaii, Volume II, Number 8, 13 April 1836 — Page 32
32 KUMU HAWAII. (APERILA,
i minamina i ka waiwai o ko laua hale; elua mea minamina a laua, o ka pu a me ke aho. Na MAALO.
KAHI MELE.
KA LAWEHALA WELIWELI.
Auwe! Hohonu e ka po!
Ke kau nei au maluna!
Loihi kahi ola mau!
Auhea hoi kuu kokua?
E apo mai, e Iesu e!
O lilo kuu uhane nei
I ko ka make lua.
He lokomaikai kou manao
I kii mai e hoohuli;
Popilikia loa wau,
I kuu naau hookuli:
Kokua mai, o Iesu e,
O nalo kuu uhane nei,
I ko ka po pouli.
Kaumaha au i kuu ala,
Kokoke e palemo;
Me na pohaku kuu kina,
Nou wale no ka hemo.
Hoolana mai, e Iesu e,
O make kuu uhane nei,
Ano, aole emo.
Eia'e ko kaua enemi,
Ua kii mai e kiola,
Ua nui no na mea ku e---
Auhea la kuu Hoola?
Hoola mai, e Iesu e,
O make mau kuu uhane nei,
Nou wale no kuu ola.
H. B.
HILO, Ianuari 22, 1836.
Aloha oukou a o'u hoahanau a pau iloko o Kristo.
Ke hoike aku nei au ia oukou i ko'u hele ana, a me ka'u hana ana, i ko'u kaahele ana i ka aina o Puna.
I ka Wenede elima o Detemaba, i ka hora eiwa holo aku la au, a me kekahi hoahanau i hele pu me a'u, a me ka'u wahine, a me kekahi poe kanaka i hele pu me makou. I ko makou hele ana aku mai Hilo nei aku a hiki ma Puaaloa, ma uka o Waiakea kokoke ma Panaewa, ike aku la au i ka hale e ku ana malaila, i aku la au i kekahi e hele pu ana me au, "E kipa kakou ma ka hale,'' a kipa aku la makou. A i ko makou kipa ana ma kela hale, hai aku la au i ke aloha o ke Akua ia lakou. I aku la au ia lakou, "Ua kaheaia mai oukou e ka Haku o Iesu, e hele i ona la, i ola oukou. A pau ka'u olelo ana aku ma ke kauoha a ko kakou Alii nui maluna, alaila hele aku la makou a hiki ma Kuolo i ke awakea. Komo makou i kekahi hale, launa mai na kamaaina ia makou, hanai mai lakou ia makou i ka ai, a pau ka ai ana, heluhelu iho la au ma kekahi mokuna o ka Palapala Hemolele, ma ka palapala mua a Ioane 3: 1----24. A pau ka'u heluhelu ana, alaila olelo aku la au i ka poe e hele pu ana me au, a me na kamaaina ma kela hale, ma ke aloha o ke Akua. I aku la au ia lakou, E aloha aku oukou i ka Haku, ia Iesu Kristo. No ka mea ina ole e aloha aku kekahi i ka Haku ia Iesu Kristo, e hoomainoinoia oia, i ka wa e hiki mai ai ka Haku. A pau ka'u olelo ana aku ia lakou, hele aku la makou a hiki ma Waipahoehoe ma uka o Keaau i ke ahiahi, a hoakoakoa mai la ka poe kanaka malaila, no ko lakou ike ana ia makou, i aku la au ia lakou, E hoakoakoa mai, houluulu ae la lakou a piha kahi hale, hai aku la au ia lakou ma ka olelo a ke Akua, a kauoha aku ia lakou e aloha aku i ka Haku ia Iesu Kristo, e like me ka'u olelo ana ma Kuolo. A pau ka'u olelo ana, poeleele iho la. Moe makou a kakahiaka. Noho iho la ka'u wahine ma Keaau, me ka hoike aku i ke aloha o ke Akua imua o kona mau makamaka malaila.
Hele aku la makou ma ke alanui mawaena, ma Kaunamano, a puka ma Pulama i ke ahiahi. Hoakoakoa mai la kekahi mau kanaka, a me na kamalii. Hai aku la maua me Kauhema ia lakou i ka olelo a ke Akua, alaila iho aku la i kai i Kamanao. Poeleele hiki makou ma ka puka o kahi hale malaila, nui na kanaka e noho ana maloko, he poe malihini kekahi no Kau, a he kamaaina no hoi kekahi. I ko'u ike ana ia lakou, olioli iho la au e hai aku ia lakou i ka lokomaikai o ke Akua i ko ke ao nei.
I aku la au ia lakou. "He wahi manao ko'u ia oukou.'' I mai la lakou, "E hai mai.'' A hai aku la au ia lakou i ko Iesu hiki ana mai i ke ao nei, e hoola i ka poe i nalowale iloko o ka hewa. A pau ka'u olelo ana, a me ka'u noi ana aku ia lakou e huli i ka Haku, i ola lakou, hele aku la makou ma kekahi hale e moe ai i ua po la.
A kakahiaka ae hele aku la makou ma kekahi ma Apua, a ma ke alanui lohe makou, ua pau na kanaka o Apua a me ka nui o na kanaka o Kealakomo ma uka. Nolaila haalele makou i ka hele ma Apua, kipa ma Kealakomo, aole nui na kanaka malaila, a ua hele aku ko konohiki i ka lawaia, nolaila aole i loaa ia makou ka halawai ana. Manao iho la au e helu i na kanaka olaila, ninau aku la au i kekahi mea, Ehia kanaka o Kealakomo nei? ehia kane ehia wahine? ehia kamalii? Aole ia i hai mai no ka makau ua kuhi o kauia lakou i ke kapa ma ke kino, o haawiia aku i ka piapa, nolaila hoi ka makau ana o hai ma. Alaila ninau hou aku la au i kekahi mea aole no i hai mai, a pela no i kekahi mea hou aku, aole no lakou a pau i hai mai.
Ahiahi hoi mai la ke konohiki, a hoakoakoa mai la i na kanaka. A hai aku la au ia lakou i ka olelo a ke Akua, alaila hoi mai la no makou ia ahiahi, a po hiki ma Leapuki. A kakahiaka, hai aku la au i ka olelo a ke Akua malaila. A pela no ma Kamomoa, a ma Pulama, a ma Poupou, a ma Kahaualea, a ma Ki, a ma Kupohua poeleele.
Moe makou ma Kaimu ia po no ka la Sabati, oia kahi pono no na kanaka e hoakoakoa'i i ke Sabati.
I kakahiaka hai aku la au i ka hiki ana mai o ka Haku i ke ao nei, o hoopai i ka make i ka poe hewa e like me ka lakou hana ana, a e hoola i ka poe pono, ma ka Hoikeana 22.
A pau ka halawai kakahiaka hele aku la au ma Kupahua o hai i ka olelo a ke Akua malaila, i ka hiki ana mai o ka Haku e hoola i ka poe hewa, ma Luka 19: 10. A pau hoi hou mai la au ma Kalapana, a olelo hou malaila, a hoi mai au a hiki hou ma Kaimu, elua a'u halawai ana malaila ia ahiahi i ke ahiahi poeleele kekahi.
A kakahiaka, hele aku la makou a hiki ma Kehena, hai aku au i ka olelo a ke Akua malaila, a ma Kamaili, a ma Opihikao poeleele, moe malaila. A kakahiaka, hele aku la makou a Kauaea, hai aku au i ka olelo a ke Akua malaila, a ma Keahialaka, a ma Pohaiki, a ma Pualaa, a hiki ma Kapoho i ke ahiahi, loaa ia'u kekahi poe hewa malaila, he poe ua pili i ke kanawai, a laweia ana lakou ma Hilo e paa ai.
Hai aku la au i ka olelo a ke Akua ia lakou, a noi aku ia lakou e mihi, i pakele lakou i ka make e hiki mai ana maluna o lakou.
A kakahiaka, hai aku la au i ka olelo a ke Akua i ka poe malaila, a ma Kula, a ma Koae, a ma Kahuwai, a ma Nanawale poeleele, a kakahiaka, hai aku au i ka olelo a ke Akua ma Waiakahiula, a me Kaohe, a ma Keonepako, a ma Makuu, a ma Waikahekahe, alaila hiki ma Keaau i ka poaha o ka lua o ko Sabati o Ianuari, loaa ka'u Wahine malaila. Elua au hai ana aku i ka olelo a ke Akua i na kanaka malaila.
A i ka poaono, puka makou ma Hilo, a halawai pu me na hoahanau me ka olioli i ka Haku.
Na'u na BARENABA.
NO NA MOKU.
HOLO MAI.
Mar. 14. Adaline, Buckley, Nuburipota, 28 mal. 900 bar.
Mar. 27. Convoy, Bancroft, mai Nowete, o ka hulu ilio ka ukana.
30. Wilmington and Liverpool Packet, Foster, Nu Bedofoda, 28 mal. 2250 bar.
Aperila 3. Howard, Worth, Nantucket, 6 mal. 300 bar.
Chelsea, Beadle, Nu Ladana, 17 mal. 750 bar.
7. Sarah and Caroline, Steele, mai Bosetona mai, 130 mau la ka holo ana.
HOLO AKU.
Mar. 20. Diana, Carter, i Kina.
26. Bolivar, Nye, i Monetere.
Apr. 2. Griffon, Little, i Mazatlan.
6. Unity, Hart, i na Mokuhema.
OAHU: MISSION PRESS.---R. TINKER, Editor.
E. O . HALL, Printer.