Ke Kumu Hawaii, Volume II, Number 3, 3 Pepeluali 1836 — Page 12

12 KUMU HAWAII. (FEBERUARI,

ka mea i kapaia ai he pono; — O ka nalo ana o ka hilahila o ke kanaka i ka lama, aole ia e hilahila ke kii aku i ka hai wahine, a me ke noi aku i kela mea keia mea a me na alii, aole loa ke kanaka e hilahila i keia mau mea, no ka mea, ua hoohalike aku la ka inu lama me ka hehena olelo hehena, hele a ka hehena. Pela hoi na alii a me na kanaka hui pu ma ia manao hookahi.
 

NO KE MAKE MA KA HEIAU.

                Inu iho la ka wahine i ka lama a ona, a komo aku la i ka heiau, make koke no ia i ka ona ana i ka lama, a komo hewa i ka heiau; aole nae i hoohewa ia ka lama, kapaia ka lama he pono, a he maikai, a he mea lealea e oluolu ai.
                Pela hoi ke kane ke inu i ka lama iloko o ke kapu, a ona, a komo hewa aku i ka hale noa me ka wahine o ka make iho la no ia no ka inu ana a ona i ka lama, a komo i ka hale noa me ka wahine, oia ka mea ona i make ai.
                Aole kapaia aku ka lama he mea hewa, kapa aku no he pono. Ua ikea no ka make ana o ke kane a me ka wahine i ka lama, aole nae i kapaia aku ka lama he mea hewa, a he mea e make ai.
 

NO KA MANAO HOU.

                Puni aku la na alii a me na kanaka i ka lama; paakiki aku la ka naau ma ia mea, a hiki mai ka olelo a ke Akua e hana ana ko Hawaii nei ma ia mea hewa loa; - aha paha makahiki o ka olelo a ke Akua i Hawaii nei, huli iho la kekahi poe alii a me kekahi mau kanaka i ka olelo a ke Akua.
                A mahope iho hooikaika aku la o Kaahumanu i na alii a me kanaka a pau loa, e hooki i ka inu lama, a e huli i ke ola o Iesu, a maluhia iho la ke aupuni, aole nui ka inu lama. A make aku la ia huli hou iho la alii a me na kanaka i ka inu lama a hiki i keia wa; aole lakou i ike, he mea ia e make ai ke kino me ka uhane pu no. [Ua ike paha lakou.]
 

NO KA HEWA O KA INU LAMA.

I ka makahiki o ka Haku 1835, mailaila mai ko'u ike ana aku i ka nui o ka hewa o ka lama. O ka lama ke kumu, a he nui na hewa e ulu ana maluna ona. Nui loa ka poe e paa i hao no ka inu lama. Ua make kekahi poe no ka inu lama.
                Eia na mea i make maloko o keia makahiki.
 

ELIMA KANAKA I MAKE.

                O Pauma ka mua. Inu ia i ka lama a ona; hele aku la ia iwaena o ka poe ona e hakaka ana, uwao ae la ia, a ku aku la kona ai i ke kui, make loa iho la ia.
                Ekolu hoi haole i make no ke okohola inu lakou a ona i ka lama mauka o Honolulu a hoi aku i ka moku, a au aku la kekahi i Pakaka napoo iho la i ke kai a make loa. Pela no hoi kekahi ma ka Uapo o Kaloka ka au ana aku i ka moku aole i hiki aku, poho iho la a nalowale. A o kekahi ma ka Uapio Kanikela ka au ana aku, a make koke iho la i ke kai a make koke ana i ke kai. No ka inu ana i ka lama a ona nolaila ka make koke ana o lakou, a o kekahi mau mea, poakolu ka waiho ana ilalo o ke kai, a lana ae la iluna; ua pau i ka aiia e ka papai.
                A i kekahi mau la i hala iho nei, i ka la 29 o Detemaba, he kanaka aipuupuu no Hariaka, hele aku ia kanaka ke alii e noi i lama nona, a loaa mai la ka lapalapa lama, a inu iho la, a ona, a haawi aku la i kekahi, a hiamoe iho la ia, o ka make loa aku la no ia, aole i ala hou mai.
                Ua make keia poe a elima maloko o keia makahiki i hala aku nei. No ka hoopaa, a me ka hoohua i ka inu lama ko lakou mea i make ai a elima.
                E na mea a pau loa i makemake i ka lama, e nana oukou i keia poe a elima i make i ka lama. O ka lama ke kumu ia no ka hewa. E ka poe inu lama a pau loa, e haalele aku oukou ia mea ino e make ai ke kino a me ka uhane i ka po i ke ahi pio ole eha mau loa.
NA PAULO KANOA.
 

NO KA HALAWAI AHIAHI.

                Mai haalele oukou i ka halawai ahiahi.
                Nohea mai ia mea kupanaha ma keia pae aina? No hea mai la? No ka walea ana paha i ka hana ana ma na kakahiaka o na la noa a noho wale ma ke ahiahi — aole hana. Nohea mai ka hana pela? aole no ke Akua mai. I mai la ke Akua peneia, "Mai hoopalaleha i ka hana - o ka mea a pau i loaa i kou lima e hana'i, e hana no me kou ikaika." Rom. 12: 11 — Kekahuna - 9 - 10 — O ko ke Akua makemake no, e paa na kanaka i ka hana ma ke kakahiaka, a ma ke ahiahi no hoi mai ke ao a po. A pela no ka hana a kekahi poe a ka poe molowa ole — hana no lakou ma ke ahiahi o na la noa a pau - a hiki mai ke ahiahi o ka la Sabati, e waiho ka! lakou i ka hana no ke Akua, i ka hana no ka uhane i ka halawai a noho wale a me ka molowa. No ke aha la ka noho ana pela? no ka ua paha - nolaila paha kekahi, aole nolaila kekahi, no ka mea like pu na ahiahi ua a me na ahiahi malie, na wahi ua a me na wahi ua ole - noho wale no ma ka hale, aole hele i ka halawai - no ka noho ana paha ma kahi loihi, aole kokoke mai i ka hale pule, nolaila paha, ka hele ole ana o kekahi poe i ka halawai ahiahi - ke manao la lakou ma paha halawai lakou ma ke ahiahi ina paha e hoi aku lakou ma ka poeleele - nolaila paha kekahi, aole paha nolaila kekahi, no ka mea like pu ka poe noho kokoke loa a me ka poe noho ma kahi loihi, haalele pu lakou i ka halawai ahiahi -Pela no kekahi poe ua ike pono oukou ia wahi - ua akaka loa no ia mai Hawaii a Niihau - no ke aha la ia mea kupanaha? no ka makemake ole ma ka halawai - no ka hewa o ka naau a no ke ku e o ka naau i ko ke Akua kanawai - nolaila wale no ka haalele ana o kekahi poe i ka halawai ahiahi — Ina makemake oukou ma ko ke Akua hale ina hele no oukou malaila ma na ahiahi a pau o ka la Sabati - aole noho ma ko oukou hale iho e hiamoe paha, a e lealea paha — aole hiki ke hana ia mea inoino -He mea inoino no ia, he mea ku e i ke Akua, ua like ia me ka hoowahawaha aku ia ia a me ka hehi ana i kona kanawai malalo iho o ka wawae - He naau po loa ia he hoomaloka a he hookamani ka hoi. O ua poe la ke hoolilo aku nei ia i ko ke Akua la i ka uhauha a me ka pono ole, a ke hoohalike ae nei lakou me ka poe halawai ole a me ka lilo loa ma ka hewa. Mai hana iki oukou pela, e hoomanao oukou, ua like ke ahiahi o ka la Sabati me ke kakahiaka, ua kapu loa, ua ike no oukou ia mea a nolaila e malama ia wa a e hoano ia me oukou e malama a e hoano ai i ke kakahiaka - a kani ka pu, e pau oukou i ka hooakoakoa ana ma ka halawai — me oukou e hana'i ma ke kakahiaka, pela hoi oukou e hana'i ma ke ahiahi e hoolilo aku i ka manao ma ke Akua — a me ka pepeiao ma ka hoolohe ana i kana olelo. Pela oukou e malama ia a e hoano ai i ka la Sabati ma ka halawai.
L. L.
 

A CARD.

                The subscriber avails himself of this opportunity of presenting his sincere thanks to those friends, who so kindly contributed towards the comfort of Mrs. Johnstone during her voyage: and he feels that his special acknowledgements are due to the Trustees of the "Oahu Charity School," for their liberality in providing a passage, &c. in so fine a vessel and under so very agreeable circumstances.  A. JOHNSTONE.
Honolulu, Jan. 30.
 

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.