Ke Kumu Hawaii, Volume I, Number 26, 23 December 1835 — Page 204

204 KUMU HAWAII. (DETEMABA,

                O Midiana kona wahi i noho ai ia manawa.
                O Zipora kana wahine.
                O Geresoma ka inoa o kana hiapokane.
                He kanaka maikai o Mose.
                He, mea naauao ia.
                Ua malama ia i na hipa.
                He papale ma kona poo.
                He mauu malalo o kona wawae.
                He kookoo loihi iloko o kona lima akau.
                He kuhi ana i ka lima hema i ka lala laau.
                He laau kupanaha ia.
                He laau e lapalapaia ana e ke ahi.
                Aole nae i pau ka laau.
                Ua makau o Mose ke nana aku ia mea.
                O ka Haku nui iloko o ka lapalapa.
                Kamailio pu ka Haku me Mose.
                Ke olelo mai nei ke Akua i na kamalii i keia manawa, ma ka palapala hemolele. E heluhelu malaila, a e malama i ko ke Akua leo.

Helu 7.
NO KA HALAWAI MA KA LA SABATI.
NO KA LOHE ANA I NA OLELO.

                A hala ka manawa himeni, a ku ae ke kahuna e hoakaka'ku i ka ke Akua olelo, i ka olelo mai ka lani mai, e hoolohe pono mai oukou, e pule malu iloko o ka naau i iho mai ka Uhane Hemolele, e wehewehe mai i ka manao i ike i ke ano o ka olelo, i paa hoi ke ano maloko, i ulu hoi ia me ka hua ana i ka hua maikai. A i ka lohe ana e pule pinepine pela, aole no oukou wale iho no no na kanaka e e lohe pu ana me oukou e pule naau no lakou i lohe pono lakou, a i nininiia mai ka Uhane ia lakou, i pau lakou i ka mihi, a me ka paulele ia Iesu i ano hou ko lakou naau, a i loaa hoi ia lakou ke ola pau ole. He nui loa ka olelo, i hai ia'ku ia oukou — no Iesu no ka nui, no ka hewa o kanaka kekahi, no ka make kekahi - no ke ola hou ana kekahi, no ka la hookolokolo hoi kekahi— no ka lani kekahi, a no ka po pau ole kekahi, no ka oukou hana i ola oukou, oia no kekahi, e lilo ko oukou manao ma keia mau mea.
                Ina paha e hai aku ke Kumu i ka hewa o kanaka, e hoomanao ae oukou i ka pili ana o ia olelo ia oukou, a oukou no kekahi poe hewa, ua paumaele no ko oukou naau i ka hewa. A ina paha e hoike aku ke kumu i ka make mau ana o na kanaka ke paulele ole lakou ia Iesu, ina paha e i iho oukou iloko oukou iho ka, no makou no ua olelo la, pau loa makou i ka make, ke paulele ole makou ia Iesu - nolaila, e naauao makou a e paulele kanalua ole ia Iesu a make makou. Ina paha e hoakaka'ku ke kumu i ka nui o ko Iesu aloha, e hoomanao oukou no oukou no ia aloha a e pono hoi ia oukou ke aloha aku ia ia me ko oukou naau a pau, a me ka ikaika a pau. Ina e hooikaika aku ke kumu ia oukou e mihi koke, e mihi no; e lilo ko oukou manao i ka mihi me ke kuihe ole e lilo loa ka manao ma na mea a oukou e lohe ai. Me oukou e makemake ai ka ai, pela oukou e makemake ai i ka ke Akua olelo; me oukou e inu ai i ka wai, pela hoi oukou e inu ai i ka wai ola, oia no ka olelo a Iesu Kristo.
                No ke aha la ka hai aku i ka olelo a Iehova maloko o ka luakini? Aole anei i lohe ae oukou? a i ike hoi oukou i ko ke Akua manao a me kona ano, a me ke ano o ko oukou noho ana, a me ka oukou e hana'i i pono oukou a i pomaikai io hoi? No ia mau mea no. Nolaila e hoolilo oukou i ko oukou pepeiao a me ko oukou manao ma ka hoolohe i ka manawa i hoikea aku ai ia mau mea. Mai lilo ka manao a me ka pepeiao a me ka maka ma na mea e ae. L. L.

KA HELU ANA O KANAKA

KONA, KAUAI, A ME NIIHAU.

Kanaka Makua. Kamalii. O lakou a pau. Kanaka a pau i ka makahiki 1831.
Nuololo, 49 9 58 53

Miloli, 39 3 42 55

Haeleele, l0 5 l5 11

Olapa, 7 1 8 15

Kolo, 66 23 89 85

Ohaiula, 6 3 9 9

Kaheluiki, 94 17 111 124

Kahelunui, 26 10 36 65

Nohomalu, 8 4 12 41

Kaawaloa, 13 3 16 24

Opelu, 6 2 8 19

Kaunalewa, 13 4 17 23

Waiawa, 15 5 20 17

Paka, 27 5 32 34

Pokii, 27 10 37 38

Kekaha, 155 30 185 252

Waimea, 584 80 664 1978

Makaweli, 382 96 480 640

Kekupua, 141 38 179 199

Hanapepe, 508 95 598 826

2171 445 2616 4508

Niihau, 728 265 998 1079

                Aloha oe e Tineka, Eia mai ka papa e hoakaka i ka nui o kanaka, mai Nuololo a Hanapepe. Mai ka makahiki 1831, a i ka makahiki 1835, ua emi loa lakou 1,992. Eia na mea i emi ai lakou. O ka make, oia ka mea nui paha, aka, aole pau loa ilaila. I ka makahiki 1831 ua noho mai na alii maanei a me ko lakou ohua; maanei no hoi na kumu, ia manawa. Aka, i keia helu ana i ka makahiki 1835, ua noho na alii ma Oahu, a me ko lakou ohua. A ua hele aku kekahi poe mai Waimea aku a i Waioli, e noho pu me ke kumu hou ilaila. Pela no kekahi poe ma Koloa. No keia mau mea ua emi loa na kanaka o Kona nei. Na WINI.